VERMICIELLE Â PUVERIELLE

VERMICIELLE Â PUVERIELLE

Chello ca ce vo’ pe sseje perzone

6 ova fresche ‘e jurnata,

600 gramme ‘e vermicielle,

250 gramme ‘e ‘nzogna,

200 gramme ‘e pancetta tesa tagliata a varriglie suttile,

100 gramme ‘e caso pecurino rattato finu fino,

Sale  duppio ‘na vrancata,

sale fino e ppepe niro mmacenato a ffrisco q.n. s.

‘nu tuppeto ‘e prutusino lavato,asciuttato e ntretato finu fino.

 

 

Cpmme se fa

Arvere ‘e vermicielle   dinto a otto litre d’acqua vullente salata (vrancata ‘e sale duppio); scularle vierde vierde,e mantenerle ‘ncaudo.

Fraditanto dinto a ‘na prupurziunata tiella a ffuoco miccio fa accumplià duiciento gramme ’e ‘nzogna senza farla piglià ‘e fummo o ‘e culore e metterve a suassà ‘e vvariglie ‘e pancetta;revacà e vermicielle dint’â tiella  cu ‘sta ‘nzogna e ‘sta pancetta, ammiscà e derrammarle cu ‘o ccaso; accuncià  ‘e sale fino e ppepe niro mmacenato a ffrisco,  ammiscà a ffuoco miccio.

’Mpiattà dinto a cquatto piatte funne caude  e mmantené ‘ncaudo; fraditanto dint’â stessa tiella agnadí n’ a’ ppoco ‘e ‘nzogna e a ffuoco allero farla accumplià e, una â vota, frijere a uocchio ‘e vojo ll’ova, accuncià ‘e sale fino sulo ‘o gghianco sistemanno n’ uovo pe purzione ‘ncopp’ê vermicielle; serví súbbeto cumpletanno ‘e piatte cu ‘o pretusino lavato,asciuttato e ntretato finu fino.

Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria  e  servute a ttiempo  (temperatura) ‘e stanza pe magnà.

Mangia Napoli, bbona salute! Scialàteve e cunzulàteve ‘o vernecale!

Raffaele Bracale