HNK RIJEKA – NAPOLI [E.L. 5.11.20] 1 A 2 ‘A VEDETTE ACCUSSÍ

HNK RIJEKA – NAPOLI [E.L. 5.11.20] 1 A 2

‘A VEDETTE ACCUSSÍ

 

 

Quase tutto a pposto guagliú! Ma pecché “quase”? E mmo ve dico.Mmerzo ê ssette d’ajeressera ‘o Ciuccio jette a Ffiume a gghiucà p’’a cuppetta aiurupea contro ê lucale d’’o Rijeka e, ‘o vvi’ lloco ‘o “quase”, doppo ‘na mez’ora ‘e juoco rijalata a ll’avverzarie [ca signajeno    ô 13’ cu Muric(ce) cu ‘nu bbellu tiro a ggiro da fora ca ‘o Lungagnone manco vedette partí], aramadde (finalmente) primma ca fenesse ‘o primmo ajone (tempo) ‘o Napule accumminciaje a ffà ‘o Napule, e ô 43’ Demme nce dette ll’uno a uno, po ll’arrancua fove tutta ‘a nosta e, ccumme era justo ca fósse, ô 59’e cuane (partenopei) cumpletajeno ll’arialla (rimonta) e surpassajeno ll’avverzarie cu ‘nu tiro ‘e Politano ca Braut(te) facette addivintà ‘nu daffimarma (autorete) ca ce jette a cciammiello e ccumme ‘o Cielo vulette s’affuzzaje (si vinse) cu ttutto ca ‘o Napule scennette ‘ncampo cu ‘na mmerdosa  muntazzimma(divisa) blu-savoia jettatoria!

Passammo ê ppaggelle:

MERET[‘o Lungagnone] 6  Nun ce putette fà niente ‘ncopp’ô tiro ‘e Muric(ce) però tenette allerta ‘o Napule ‘int’ê mumente cchiú cumpricate cu ‘nu paro ‘e tacculle  (interventi) difficultuse.

 DI LORENZO 6  Sufferette ‘nu poco p’’a primma mez’ora, ma po furnette

n’ atalossa (prestazione) ‘e sustanza pure si nun fove troppo priciso quanno jabbraje  (crossò).

 

MAKSIMOVIC[‘O ‘Ntontero] 5,5  Ce mettette troppu tiempo a ppiglià ‘e mmesure ‘e Kulenovic(ce) e Mmenàlo ca ‘o mannajeno spisso ô manicomio scennenno palla ô pere.

 

 KOULIBALY[‘O Ggialante] 5 Me dispiace, ma nun fove ‘nserata cu cchiú ‘e ‘nu sfregazzo (sbavatura) asasa (soprattutto) p’’o primmo ajone (tempo) cu Kculenovic(ce) e Mmenàlo. Se facette nutizzià (ammonire) e s’’o mmeretaje.

 

RUI 6 –‘E bbuono ‘o jabbro (cross) ca ô 59’ addivintaje  ‘o daffimarma (autorete) ‘e Braut(te) e cquacche ata palla misa sotto porta cruata, ma pur’isso p’’a primma mez’ora jette ‘int’ê chiavette.   [da ll'80'  GHOULAM 6 ‘e stima.]

 

 DEMME 7  Bbravo a ffarese truvà ô posto justo ô mumento justo a rrecogliere e mmettere dinto ‘na pennellata ‘e Ciruzzo; p’’o riesto  fove chiammato a ccustruí ‘o juoco e ‘o ffacette bbuono.

 

LOBOTKA 6-  Êsse avuto ‘a fa ‘e cchiú asasa (soprattutto) mimmaddanno (verticalizzando), ma nun truvaje ‘ spazzio p’’o ffà e sse cuntentaje ‘e scuntate  pasiglie (passaggi) urizzuntale. [dô 60'  RUIZ[Anemalonga] 6  Trasette pe ddà tartibbo (ordine) e zzarribbuo (palleggio) â  munavara (manovra) e cchello facette.]

 

POLITANO 6  Dint’ô primmo ajone (tempo) quanno ‘e ccose nun ghievano p’’o dderitto fove uno d’’e cchiú ppusitive e pp’o riesto se facette apprezzà accentrannose cu ‘o mancino; nun ce scurdammo ca fove isso a ccercà ‘a porta cu ‘nu tiro ca Braut(te) menaje dinto.[dô 69'  LOZANO 6- Trasette cu ‘o ggenio ‘e fà e ppoco mancaje ca nun facesse signà a Ddemme p’’a siconna vota. Peccato.] c

 MERTENS [Ciruzzo] 6  Cumplessivamente ll’atalossa (prestazione) soja nun fove eccezziunale ‘ma fove isso a ppennellà pe Ddemme ‘a palla ‘e ll’uno a uno e ppiciò se mmereta ‘o seje pure pecché, sfurtunato, a ll’arrancua cugliette ll’afachia (traversa)!

 

ELMAS[‘O Turco] 6 Se dette da fà e agruppino (vivace) cupuliaje (dialogò cu ‘e cumpagne prupunennose sotto porta e ‘nu paro ‘e vote jette vicino a ssignà. [dô 62'  INSIGNE 6  Trasette tuccanno quacche ppalla tanto pe ffà atto ‘e presenza, ma niente ‘e cchiú.]

 

PETAGNA 5,5  Avette troppi pochi pallune da sfruttà e nnun riuscette a ffarese apprezzà manco da Gattuso. [da ll'80' ZIELINSKI 6 ‘e stima].

 

all.  GATTUSO 6  P’’a primma mez’ora se magnaje ‘o fecato sbraitanno  e  sbrazzannose malamente. Po a ll’arrancua (ripresa) truvaje a chiave justa pe sferracchià (assalire) ‘e cruate e ll’arnassa  (vittoria) arrivaje. Bbuono accussí!

arb.: GESTRANIUS 6 Tutto summato facette tutto ‘o duvere suojo.

E femammoce cca, cuntente ‘e cumme è gghiuta, pure si puteva jí meglio. Nun cercammo peleje e cuntentammoce; e   mmo,  si ‘o Cielo ‘o vvo’, ce sentimmo llunnerí ca vene pe cuntareve che succede dummeneca ‘ncampiunato a Bbulogna contr’ê murtadelle.

 Staveti bbe’.R. Bracale Brak