AZ ALKMAAR – NAPOLI [E.L.3.12.20] 1 A 1 ‘A VEDETTE ACCUSSÍ

AZ ALKMAAR – NAPOLI [E.L.3.12.20] 1 A 1

‘A VEDETTE ACCUSSÍ

Niente ‘a fa… guagliú, che nervatura! Ajeressera ‘o Ciuccio jette ‘ncasa ‘e ll’ulandese ‘e ll’Az(ze)alkmaar(re) e s’êsse avuto levà ‘e pacchere da faccia pigliate ô san Paolo ê vintiduje d’uttombre, ma nun ce riuscette e ajeressera ne cacciaje sulo ‘nu russimmo (pareggio) p’uno a uno! Troppo poco pe cchello ca ce fossemo aspettato nujaute d’’a tribbuna-divano [ca doppo d’’o primmo ajone(primo tempo)  ggià penzàvemo  ‘e tené dint’â sacca ‘a cualificazziona ê sedicesime d’’a cuppetta aiurupea… E ‘mmece niente ‘a fa, guagliú pecché nunn’avastaje n’ajone (tempo) sulamente giacché ‘o  Napule,jucato ‘nu bbuonu primmo ajone  (primo tempo),nchiuso ‘ncopp’a ll’uno a zzero [stuco (gol)ô 6’ ‘e Ciruzzo] pe nnuje [asasa (soprattutto) pecché Pastacrisciuta ce mettette ‘na bbona pezza fermanno ‘nu bbellu tiro ‘a fora ‘e nun m’arricordo qua’ ulandese]. Ve dicevo ca ‘o Ciuccio, doppo d’’o primmo ajone,  quase se scurdaje ‘e scennere ‘ncampo pe ll’arrancua (ripresa) quanno ll’Az(ze) signaje ô 54’ cu Martins Indi[appustiato sulo a ‘nu metro dâ linia ‘e porta], cumannaje ‘o juoco e arresecaje mísemo  (addirittura) d’affuzzà (vincere), ma ancòra ‘na vota fove Pastacrisciuta  ca ce levaje ‘e ccastagne dô ffuoco mísemo  paranno ‘nu   ricore ‘e Koopmeiner(re)ca ancòra nun se fa capace! Da chillu mumento nujaute’ntribbuna divano ancòra sperajemo ca ‘o Ciuccio putesse recogliere ‘e tre ppunte, ma nun succedette pure pecché Petagna [trasuto ô 61’ ô posto ‘e Zielinski, fallette ddoje cunchiusione] e ffenette cu ‘nu gramo russimmo (pareggio) ca mo nce mette ‘int’â dellicata situazziona  d’affruntà ‘o Real Sociedad (de) ô san Paolo â semmana ca trase e ppe nunn’arresecà surprese ce toccà ‘e jucà ‘nu sibbacco (match) cu ‘o sanco a ll’uocchie, ‘nzomma ll’esame nun fenesceno maje!

Pacienza, passammo ê ppaggelle:

OSPINA[Pastacrisciuta] 8 ‘O meglio d’’e suoje ggià dô primmo minuto e ppe ttutto ‘o primmo ajone chiammato a spurcarese ‘e guante ‘nu paro ‘e vote; ‘o capo d’opera ‘o facette però  paranno ‘o ricore ‘e Koopmeiner(re),ca pure êva tirato bbuono.  ‘A parata ‘e Pastacrisciuta  tenette ‘o Ciuccio  primmo ‘int’a ll’jauallo (girone) e pp’’o memento nunn’è ccosa ‘e niente.

 

DI LORENZO 5  ‘E bbuono  ‘o missiddo (assist) pe Cciruzzo ô 6’,  ma po ‘ncopp’â ferza ‘e dritta sufferette paricchio ‘a fòja (furia) Koopmeiner(re) e s’êtte ‘a tené ‘a posta.

 

MAKSIMOVIC[‘O ‘Ntontero] 5 Nun lle pozzo perdunà ‘e nunn’avé dato n’uocchio ô 61’  a Mmartins Indi lassannolo sulo, ma p’’o riesto sibbacco   (match) aunesto ‘ncupertura.

 

 KOULIBALY[‘O Ggialante] 6  Atalossa (prova) attienta e dde sustanza nsi’ ô niajo (finale) quanno ll’Azz(e) ce pruvaje. 

 

GHOULAM 5 Cumbinaje poco e nniente. Peccato! [Dô 66’ Mario RUI 6  Trasette e sse facette vedé cu ‘nu missiddo (assist) a zzuco ‘e caramnella pe Ppetagna ca ‘o sciupaje!]

 

RUIZ [Anemalonga] 5,5  Êsse avuto ‘a fà assaje ‘e cchiú, ma nun ce riuscette suffrenno troppo ‘a pressiona auta ‘e ll’Az(ze).[Dô 57’  ELMAS[‘O Turco] 4,5 Inutile: tuccaje pochi pallune e nnun se facette maje apprezzà pe ‘na bbona jucata.]

 

BAKAYOKO 5  Tutto summato facette ‘o duvere suĵo cumme aculla (diga)’nnante â trasera (difesa), ma s’à dda dà ‘na calmata quanno trase dint’â muntaca nosta o  ce prucura ricure contro, cumme succedette ajere e nnun sempe ‘mporta tenimmo a Ppastacrisciuta!

 

 ZIELINSKI 5  Dduje passe arreto a ppietto ‘e chello fatto ‘ncampiunato contro ê pecurare d’’a Roma. [Dô 61’ PETAGNA 4,5 ‘E muvimente, ‘a fatica p’’a scuatra foveno bbuone, ma po annante â porta fallette ddoje granni  accasione e nnun ce ‘o ppozzo perdunà.

 

POLITANO 5  Che peccato, serata no: nun riuscette a essere periculuso né a ccupulià (dialogare) e pperdette cchiú ‘e ‘nu stibbacco (duello).[Dô 61’  LOZANO 5,5 – Pruvaje a ffà coccosa ma pur’ isso cumbinaje poco.

 

MERTENS[Ciruzzo] 7 Luttaje pruvanno a ffarese vedé ogne vvota ca ‘o Ciuccio scennette ‘nnante e ffove priciso e ppuntuale ô 6’ cu ‘nu taglio e ‘nu  scicco muvimento pe ttruvarese a ll’appuntamento cu ‘o pallone e mmenarlo dinto! Applavuso. [Dô 66’  DEMME 6,5  Meglio ‘e ll’ate; se mettette a prutezziona d’’a trasera (difesa) ô mumento d’’a sufferenza, facennose apprezzà.  

INSIGNE 4  Êsse avut’’a essere cchiú respunzabbile pigliannose ‘a scuatra p’’a mana, cumme ll’êva ditto  Gattuso e nnun ne fove capace.

 

all.  GATTUSO 5,5  Forze nun sapette taffezzà (motivare) ê suoje cert’è ca doppo ‘nu bbuonu primmo ajone (tempo) a ll’arrancua ‘a scuatra sufferette troppo. Mo tiranno ‘e ssomme, pe ssapé cumme va a ffení nce attocca aspettà ancòra  ‘a tarra (sfida) ô san Paolo contro ‘o Rial Sociedad(de). Se puteva fà ‘e cchiú ajeressera!

arb. BUQUET 5,5 Êsse avut’’a siscà meglio, ma ‘o perdono visto ca nun avette a ddispusizziona ‘a Varra [ca, pe sparagnà, nunn’è prevista].

E fermammoce ccà. Mo si ‘o Cielo ‘o vvo’ ce sentimmo lunnerí pe vve cuntà che facimmo ‘ncampiunato  dummeneca  a Crotone contro n’ata scuatra assineja (satellite) d’’a vecchia zoccola. Facimmo corna. Ciuccio fa’ tu! Staveti bbe’. Raffaele Bracale Brak