NAPOLI – TORINO [23.12.20] 1 A 1 ‘A VEDETTE ACCUSSÍ

NAPOLI – TORINO [23.12.20] 1 A 1

‘A VEDETTE ACCUSSÍ

Che delusione guagliú! Ajere poco mancaje ca nu ce ‘ntussecavemo ‘e ffeste! Cumminfatte nujaute  ‘ntribbuna divano nce aspettavemo ca ‘o Ciuccio n’êsse fatto carne pe ppurpette d’’o Toro sciso ô Maradona e  ‘mmece chi t’’o ddà?! C’êttem’ ‘a cuntentà sulo ‘e ‘nu russimmo (pareggio) cuoveto all’urdemi minute e pperdettemo ll’ accasione ‘e allungà ‘o passo  arrassannoce dâ vecchia zoccola, sciaccata dâ Fiorentina.

Però stammo a Nnatale e vedimmo ‘o lato bbuono d’’a facenna:

‘o Napule pare ca se sta  spicializzanno a ffà risuscità ‘e muorte:

dummeneca ‘o ffacette cu ‘a  Lazzio, ajere quase nce riuscette  cu ‘o Toro. Che delusione! ‘Nu sibbacco (match) ca ‘o Ciuccio êsse avuto affuzzà  (vincere) largo e  ssenza prubleme  se cunchiudette cu ‘nu stentato russimmo (pareggio) p’uno a uno E ffove ll’addaffa (rete) d’ Insigne ô 92’ a rrussimà (pareggiare) chella d’Izzo ô 56’ i a salvà i’o Napoli dâ terza mazziata cunzecutiva.Che malincunia!

Passammo ê ppaggelle:

MERET[‘O Lungagnone] 4,5  ‘Nu paro ‘e tacculle (interventi), ma niente ‘e straurdinario; però ‘ncopp’ô tiro spuorco d’Izzo s’addurmette cu ‘a zizza ‘mmocca e mmanco tentaje ‘e fa coccosa facennose fottere dô retuorno (rimbalzo) d’’a palla!

 

DI LORENZO 5,5  Facette quaccosa, ma troppo poco e ‘nnaccasione ‘e ll’ addaffa (rete) cranata fove sfurtunato cuglienno malamente ‘e capa ‘a palla e ffavurenno a Izzo. 

 

MANOLAS[Chitelassa] 6  Cantaje e ppurtaje ‘a croce risultanno ‘o meglio d’’a trasera (difesa) nosta, custretto spisso a mmeterce ‘na pezza ê ffessarie ‘e ll’ate.

 

MAKSIMOVIC[‘O ‘Ntontero ] 5 Belotti ‘o mettette ‘ndifficurtà mentr’isso passava ‘a serata a sciulià cchiú ‘e ‘na vota, né se cagnaje ‘e scarpine.

 

HYSAJ[Mezacucchiara] 4, 5  Nun se vedette praticamente maje a ‘mpurrà (spingere) e ppe gghionta ‘e ruotelo se perdette a Izzo ‘nnaccasione ‘e ll’ addaffa (rete) cranata. [Dô 71’  RUIZ[Anemalonga] 5  Nunn’è cchiú isso, pareva ll’aseno ‘mmiez’ê suone e ccumbinaje ‘mpratteca poco.

 

BAKAYOKO [‘O Mammone] 5 Taminno  (Prezioso) a ll’epata  (in fase) ‘e ruttura, ma nun se vedette quanno se trattaje ‘e tajennà (impostare) e gghiucaje tantii pallune fora mesura e ‘mpricise. [Dô 71’ RUI 5 Tutto summato nun facette cose bbone, ma manco malamente.]

 

DEMME 6  Steva jucanno facenno bbuono  ‘o ssuĵo quanno ‘o vallo lle dètte ‘na bbotta dint’ê rine i avette ascí dô campo… peccato! [Dô 28’  ELMAS[‘O Turco] 5  Serata no, nun cumbinaje manco ‘o saciccio.]

 

 POLITANO 4,5  Pur’isso ‘nfra ‘e cchiú scarze; aizaje porvera stutannose chianu chiano. [Dô 63’ LOZANO 6  Custretto a ttrasí pure si ancòra nun pronto facette coccosa ‘e cchiú ‘e Politano currenno, cercanno palla e ccunquistanno ‘nu paro ‘e timmurrie (calci di punizione)!]

 

ZIELINSKI 6,5  Fove ll’unico a ccercà ‘a porta ‘e pere e dde capa i ‘o missiddo (assist)  p’ Insigne ô 92’ tamennaje (impreziosí) ll’atalossa (prestazione) soja.

 

INSIGNE 6,5 Ll’addaffa (rete) soja fove accussí bbella e taminna (preziosa) ca lle perdunaje ‘e nun avé fatto quase niente nsi’ô 91’. 

 

PETAGNA 5  Cuntrullato a mmestiere dê tre ccentrale granate nun truvaje maje spazzio, ma luttaje. [Dô 71’  LLORENTE[‘O Spetaccuso ] 4,5  Inutile.]

 

all. GATTUSO 5,5 Ll’addaffa (rete) d’Insigne servette a nnun ce fa chiagnere, ma nun annascunnette ‘e prubbleme: ‘o Napule visto ajere fove bbatejo (lento) cunfuso, senza ficre (idee), gheraddo (involuto)ece facette vedé ca  pesava troppo ‘o fatto  ca mancajeno pedine ‘mpurtante arreto i annanze. Mo Rino tene diece juorne  pe ccercà ‘e mettere a pposto ‘na scuatra ca nunn’ è cchiú chella  masculla  (brillante) ‘e primma. E sperammo ca ce ‘a fa!

arb. VALERI 4,5  Nun ce facette granni fetenzie, ma fove troppo ‘e maneca larga cu cierti crapune cranata i asasa (soprattutto) cu ‘o vallo ca trasette a ffà male ê spalle ‘e Demme e cu ‘nu denucchio ‘o jette a ccogliere ‘ncopp’a ll’uosso pezzillo d’’o prozo, struppiannolo e isso nunn’’o jettaje fora!

 E ffermmoce cca. Jette cumme jette e ppacienza. Mo se torna a gghiucà dummeneca 3 gennajo i ‘o Ciuccio va a Ccagliari; sperammo ca torna cu ttre ppunte dint’â sacca, ne fósse ora! Si ‘o Cielo ‘o vvo’ ve ne parlo lunnerí 4. Bboni ffeste pe ttutte quante e ca ll’anno ca vene fósse meglio ‘e chisto ca se ne va! Ciuccio fa’ tu. Staveti bbe’.

R.Bracale Brak