CAGLIARI – NAPOLI[3.1.21] 1 A 4 ‘A VEDETTE ACCUSSÍ

CAGLIARI – NAPOLI[3.1.21] 1 A 4

‘A VEDETTE ACCUSSÍ

E nce vuleva, nce vuleva guagliú! Ll’êvem’’a ‘ncignà ll’anno nuovo cu ‘o pere justo! E accussí succedette ajere a ll’ora d’’a tiella quanno ‘o Ciuccio jette a ccardà ‘o pilo a ll’isulane â casa lloro affuzzanno (vincendo) pe cquatto a uno i avesse pututo pure fà ‘e meglio si, doppo ca Zielinski ô 25’ êva sbluccata ‘a facenna cu ‘na bbella chiantella da fora,   ‘o ‘Ntontero ô 60’ nun se fósse accuvato cu ‘o prozo ‘nterra lassanno libbero e ffranco a Joao Pedro ca da poche passe, futtenno a Ppastacrisciuta  [ca nun ce putette fà niente], angappaje ‘o passiggiero russimmo ( temporaneo pareggio) Menu male ca steva scritto ca ‘a nacchèlla (trasferta) d’ajere êva ‘a essere ‘a nosta e ca pe ttutt’’a mubbara (partita) êssem’ avut’’a vedé ‘nu Napule cumminto, allero e sciampano (spumeggiante) cumm’â sciampagna ca pe quase tutt’’e nuvanta minute jucaje sott’â porta ‘e ll’isulane, tiranno e ccercanno ‘e signà cosa ca  succedette p’ati ttre vvote[ ‘na vota ô 62' ancòra cu Zzielinski, po ô 74' cu Llozano, e ppo a ll’ 86’ cu Insigne ca mettette dinto ‘o primmo ricore a ffavore avuto dô Napule!  â faccia ‘e chi ce vo’ male e dde chi se penzava ca ‘o Ciuccio avenno nchiuso ‘o duimila e vvinto cu ddoje sciaccate e ‘nu gramo russimmo casalinco nun êsse accumminciato ‘o duimilavintuno affuzzanno ‘nnacchèlla (vincendo in trasferta). E ‘mmece accussí fove e mmo cumme a mmo ‘o Napule s’è piazzato quarto ‘ncrassifica a 28 punte[cu ‘na mubbara (partita) mancante, 31 addaffe (reti fatte e ssulo 13 pigliate.] P’’o mumento cuntentammoce e ppassammo ê ppaggelle:

OSPINA [Pastacrisciuta] 6 Nun fove  chiammato a ffà straurdinarie   e nnun tenette itimme (responsabilità) ‘ncopp’a ll’addaffa (rete) pigliata!

 

 DI LORENZO 7  Se cumpurtaje a mmestiere dint’â marala ‘e patenza(nella fase difensiva)  e ddinto a cchella arnasceta (propositiva); ‘e cchiú mettette ‘o pere suĵo ‘int’â perna ‘e  Zielinski

 

 MANOLAS[Chitelassa] 6  Cumannaje ‘a trasera (difesa) cu ‘nu sulo sfregazzo (sbavatura) però senza cunsequenze! [da ll'86' RHAMANI s.v.]

 

MAKSIMOVIC[‘O ‘Ntontero] 4,5 – Nun lle pozzo perdunàd’esserse fatto piglià p’’o prozo da Joao Pedro ‘nnaccasione ‘e ll'1a1: so’ fessarie ca nun se fanno!

 

RUI 6  êsse avuto fa ‘e cchiú ma se cuntentaje ‘e jí vicino ô stuco(gol) da fora cchiú ‘e ‘na vota. [da ll'86' GHOULAM s.v.]

 

RUIZ[Anamalonga] 6 ‘Sta vota fove  urdinato ‘mmiez’ô campo e ppericuluso quanno s’accustaje â muntaca (area di rigore) isulana.

 

BAKAYOKO[‘O Mammone] 6 – Nun sunaje ‘a trummetta, ma ll’atalossa  (prestazione) soja zzamitta (silenziosa) fove ô ssolito taminna (preziosa). [dab ll'86' LOBOTKA s.v.]

LOZANO 7,5 – Ese facette vedé macano  (ovunque): ajutaje  ‘e cumpagne, zumpaje ll’ommo, dette spettaculo saillanno  dribblando e sse levaje ‘o sfizzio ‘e signà;ch’ato à dda fà?

 

ZIELINSKI 8.5  Funnamentale p’’e mucatte (schemi) ‘e Gattuso ajere ll’atalossa (prestaziona) soja fove ‘mpratteca matàla (perfetta)cunnita cu ddoje addaffe (reti) una meglio ‘e ll’ata! Applavuse. [dô 77' ELMAS s.v.)

INSIGNE 7,5 - Core ‘e capitano se dette da fa ggià da subbeto e mmettette ‘a cerasella ‘ncopp’â pizza doce signanno ‘o primmo ricore avuto [finalmente!] dô Napule.

 

PETAGNA 7 Anniddo (roccioso) lla ‘nnante dduje d’’e quatto stuche (gol) arravajeno da sponne soje. [dô 77' POLITANO s.v.)

 

all.  GATTUSO 6,5  Avette chello ca vuleva ritruvanno ‘e meglie Zielinski, Lozano e Insigne e sse purtaje tre ppunte â casa; ô posto suĵo però êsse fatto a mmeno d’’o ‘Ntontero jucanno cu Chitelassa ‘nchietta cu RhamanI.

arb: MANGANIELLO 6 È piamuntese, ma facette ‘o duvere suĵo.

E bbasta accussí. Alliccammoce ‘e bbaffe ope ‘stu quatto a uno fora casa e ssi ‘o Cielo ‘o vvo’ sentimmo ggioverí ca vene pe ccuntareve che succere p’’a Pifanía ô Maradona contr’ô Spezzia. Staveti bbe’ R.Bracale Brak