ATALANTA – NAPOLI [21.2.21] 4 A 2 ‘A VEDETTE ACCUSSÍ

ATALANTA – NAPOLI [21.2.21] 4 A 2

‘A VEDETTE ACCUSSÍ

 

Oramaje guagliú ce  âmm’ ‘a stà attiente pecché nunn’è ca avimmo   ggià tuccato’o funno e, a ccumme stanno ‘e ccose,  pputimmo ancòra scennere ‘e cchiú… Sì, è overo ca stammo a cquaranta punte e c’êssem’’a salvà…, ma nun ne putimmo cchiú ‘e piglià pacchere dinto e  ffora! E ppirciò votta a vvení ‘a primmavera…, po’ essere ca ce levammo ‘a cuollo ‘sta iella nera ca ce sta secutanno, po’ essere ca, cagnanno ‘o direttore d’urchesta i ‘a chenca soja[miedece,priparature… et ceveza!] cagna museca e ttanti jucature finalmente nun se fanno cchiú mmale o se repigliano primma.  Ajere jenno a Bbbergamo contro ê lucale  Gattuso teneva ‘a speranzella ‘e se purtà â casa ‘nu zzero a zzero e ppe cchello ‘a scuatra, arrangiata!,  ca mannaje ‘ncampo pe cchello jucaje ma chi t’’o ddà. Nce riuscette sulo p’ ‘o primmo ajone (tempo), ma a ll’arrancua sbracaje e ppigliaje quatto palle, quatto e rriuscette a ssalvà ‘a faccia  sulo cu ddoje addaffe (reti) una signata  ô 58′ cu  Zielinski e n’ata ô 75′ mettenno a ffrutto ‘na daffimarma  (autogol) ‘e Gosenso e ttutte ‘e ddoje quanno Politano mettette dint’â muntaca (area di rigore) bercamasca ddoje bbelli ppalle. E lla fove Napule!  I abbuscajemo senza misericordia. E nce fove sulo ‘o tiempo ‘e spaventarece a mmorte quanno Caromecosta scuntrannose, si ‘nun me sbaglio cu Romero, cadette, sbattette ‘a capa, perdette ‘e senze e ll’êtten’’a purtà ô spitale addó po, pe ffurtuna, se repigliaje. Cunchiusione? ‘O Napule turnaje da Bbergamo cu ‘na vranca ‘e mosche ‘mmano e facenno ‘e cunte sott’ô lampione  cullezziunaje n’ata mazziata: dudece cumplessive e otto sulo ‘nfra ggennajo e ffevraro. Diciteme mo vuje addó putimmo jí cu  ‘na  scuatra scarreca e  mmuzabba (afflitta) da tanti chiabbe (assenze)?

A ‘stu punto forze nun ne vale ‘a pena, ma facimmo ‘e ppaggelle:

 MERET[‘O Lungagnone] 5,5  Sulo ‘nu paro ‘e bboni pparate, ma ‘ncopp’a ll’addaffe (reti) nun riuscette a essere stiappo (reattivo).

 

 DI LORENZO 4,5  Serata no; nutizziato (ammonito) i a raggiona  subbéto perdette ‘a tramuntana i a ddritta Muriel(lo)s’’o fumaje cchiú ‘e ‘na vota signanno pure.

 RRAHMANI 5 Fove miso ‘ndifficurtà quanno mo uno, mo n’ato’o puntaje dimustranno passe arrete a ppietto d’’o sibbacco (match) cu ‘a vecchia zoccola. Che peccato! 

 MAKSIMOVIC[‘O ‘Ntontero] 4,5  S’arrangia cu Zzapata dutante ô primmo ajone (primo tempo), ma po se ne scennette assaje a ll’arrancua (ripresa) permettenno a ll’ecchese ‘e signà e sbaglianno pusizziona ‘ncopp’â siconna addaffa(rete). [Dô 78' KOULIBALY[‘O Ggialante] 5  Trasette tarde i ô mumento sbagliato; nun se cagna ‘nu madaffio (difensore) ‘ncopp’a ‘nu tiro ‘e squina (corner) e isso   steva ancora capenno quaccosa quanno  Romero‘ncopp’a cchillu  tiro ‘e squina (corner)  lle passaje ê spalle signanno ‘o quatto a ddoje.] 

 

MARIO RUI 4,5 Atalossa (prestazione) scadente; durante ô primmo ajone abballaje sotto a Pessina,arresecanno d’essere nutizziato (ammonito); a ll’arrancua  (nella ripresa) Zapata lle magnaje ‘ncapa e ssignaje . [Dô 78' GHOULAM s.v.]

 

FABIAN RUIZ 5,5  Poca rrobba: ce mettette ‘a vuluntà, ma lle mancaje ‘a qualità: ‘e bbuono ‘na mimmadda  (verticalizzazione) azzeccata, ma po troppi pasiglie  (passaggi) sballate.

 

 BAKAYOKO 4 Lla ‘mmiezo nun riuscette a dd’ affuzzà (vincere) unu [ched’è uno?] stibbacco (duello) cu  Dde Run(ne)  e Freuler(re)!

 

 ZIELINSKI 7  Difennette e attaccaje menannose sempe dinto; ll’addaffa (rete) fove da granne jucatore. [Da ll 85' LOBOTKA s.v.]

 

 

 POLITANO 6,5  A ddoje facce: primmo ajone   (primo tempo) senza zuco, ma a ll’arrancua (nella ripresa) sagliette ‘e pressione, jucaje cchiú ‘e ‘na palla, mannanno ‘mporta a   Zzielinski cu ‘na palla overo bbella cumme bbella fove chella ca ce fruttaje  ‘a daffimarma  (autogol) ‘e Gosenso.

 

 OSIMHEN [Caromecosta] 4,5  Nun cummincette, se facette spisso ancercà (anticipare) e mmaje riuscette a essere periculuso: dint’a 94 minute sulo ‘na vota ‘e capa ‘mpignaje, pe scagno,ô purtiere d’’e lucale. Pe ffurtuna pare ca ‘a bbotta pigliata ‘ncapa nun fove facenna ‘mpurtante.

 

 ELMAS[‘O Turco] 5 Doppo scarza n’ora Gattuso ll’êtt’’a cagnà visto ca nun ce mettette né ccegna (grinta) né fficre (idee) e nnun riuscette a ccupulià (dialogare) cu nnisciuno.[Dô 53' INSIGNE 6  Tutto summato ce mettette ‘o ppoco ‘e taccheja  (energia)crijanno ddoje accasione nun sfruttate.]

 

all.  GATTUSO 4,5  D’accordo ô Napule mancajeno tanti jucature, ma nun se po’ gghí a gghiucà sulo pe se difennere; cumminfatte ll’Atalanta fove troppo cchiú fforte d’’o Ciuccio e n’êsse pututo fa seje ‘mmece ‘e quatto! ‘A veco difficile ca se magna ‘a pastiera!

arb. DI BELLO 6 Tutto summato fetenzie nun ne facette.

E ffermammoce cca. Mo, si ‘o Cielo ‘o ccuncede ce sentimmo viernarí pe ccuntareve che succede ô Maradona ggioverí contr’ô Granada. Staveti  bbe’ R.Bracale Brak