GENOA – NAPOLI [6.2.21] 2 A 1 ‘A VEDETTE ACCUSSÍ

GENOA – NAPOLI [6.2.21] 2 A 1

‘A VEDETTE ACCUSSÍ

E i’ mo guagliú che v’aggi’’a dicere, che ve pozzo dicere?’Na parola sola: Rassignammoce! Nce à cacato ‘o cane niro, nce ànnu cantato, nce ànnu menata ‘a favetta e nce ànno cuovete; ajere ‘o Ciuccio jette ô "Luigi Ferraris" pe ‘nu sibbacco  (match) contr’ ê crifune russe e bblù e êsse avut’ ‘a metterse ‘e tre ppunte dint’â sacca  e ‘mmece chi t’’o ddà? Turnaje cu ddoje palle dint’ô sacco e ccu ‘na vranca ‘e mosche ‘mmano giacché mentre ‘a bbanda d’’e nuoste attaccaje senza zuco né ccunnimma, ‘o Crifone  cuncreto e cquadrato ce mazziaje cu ‘na pareglia  [a ll'11' e ô 26') ‘e  ll’ecchese  Goran(no) Pandev(vo) ca apprufittaje ‘e doje fessarie d’’e centrale d’’a trasera (difesa) nosta, i a nniente servette  ‘o catàra (diagonale) ‘e  Politano ca ô 79' ce cuncedette ‘o stuco (gol) d’’a bbannera.E ddicere ca duranteê primme 45 minute ‘o Napule cullezziunaje 7 tire ‘mporta ca però nun apprudajeno a nniente.’Ncunchiusione n’atu bbrutto passo fatto, ati punte perze, ati jucature ammaccate! Passammo ê ppaggelle:

OSPINA[Pastacrisciuta] 6: Pigliaje dduje stuche (gol), ma sez’itimme (responzabilità) ca foveno tutte dê centrale d’’a trasera (difesa) nosta.

 

DI LORENZO 6,5: Atalossa (prestazione) taddidda (efficace) a dritta dint’ê ddoje epate (nelle due fasi).

 

MANOLAS[Chitelassa] 5: Me dispiace, ma nun ‘o pozzo salvà:'a ‘ntesa cu ‘o Ntontero mancaje ‘ntutto e ppe ttutto i ‘o Ggenova n’apprufittaje. ‘o cane mozzeca ô stracciato e ascette ô 69’  ammaccato doppo ‘nu cuntrasto cu Pandev(vo). Sperammo ca è ccosa ‘e niente!

 

Dal 69' Amir Rrahmani 6: corre pochi rischi in una fase in cui, va detto, il Genoa era essenzialmente impegnato a difendere.

 

 MAKSIMOVIC[‘O ‘Ntontero] 3 e ll’aggiu trattato: fove overamente ‘o peggio ‘ncampo e sse vedette quase súbbeto cu cchella  palla sballata pe Ddemme  ‘nnaccasiona  ‘e ll'azzione ca  purtaje  a ll'1-0 ‘e Pandev(vo); p’’o riesto trattaje ll’avverzarie cu ‘e guante ‘e seta ‘mmece d’’e ccasticà; no nun po’ essere isso a gghiucà ô posto d’’o Ggialante ajere fora pecché sfurtunatamente cuoveto dô Covíd(de)!

 

RUI 6,5: Bbona atalossa (prestazione) d’’o purtuchese ca da mancina mannaje dinto tanti pallune ‘nteressante cumme a cchillo ca Petagna ô 23’mannaje ‘e capa a cogliere ll’afachia  (traversa)

 

 ELMAS[‘O tURCO] 5,5: Sulo tanta zzureja (velocità) a mmità ccampo, ma troppa ‘ mprecisiona ‘nnante â porta.

 

 

DEMME 6:   Scarugnato, facette ‘o ssuĵo asasa (soprattutto) a ll’arrancua (nella ripresa mettennoce ficre (idee) cegna(grinta) e purmune e ssulo pecché pigliato ‘mmaddaddo (in contropiede) a ll’ 11’ nun riuscette a recogliere chella palla sballata d’’o ‘Ntontero ca ce custaje ‘o primmo stuco (gol); ô  71' cercaje ‘a porta periculosamente e nce vulette ‘nu granne Perin(ne) pe nnun’ ‘o fa signà!

[Dô 79'  BAKAYOKO: sv.]

 

ZIELINSKI 5,5:  Accumminciaje bbuono rennennose periculuso súbbeto doppo manco tre mminute ‘e juoco, po però perdette ll’usciola (bussola) i ‘o filo d’’o trascurzo e Ggattuso s’’o chiammaje ‘mpanca…

[Dô 54'  INSIGNE 6,5: Sparagnato forze p’’o stibbacco (scontro) ‘e miercurí p’’a Coppa Itaglia, dintì’a mez’ora ‘e juoco cugliette ‘nu palo e ffacette quacche bbona jucata ca nisciuno mettette a ffrutto. Peccato.]

 

POLITANO 7: Atalossa (prestazione) sustanziosa cunnita cu ll’addaffa (rete) ô 79’ ca però arrivaje tarde pe ffarece sperà. Peccato!

 

 PETAGNA 6,5: Se dannaje ll’anema lla ‘nnante cu ttanti sponne e ffacenno spazzio; nun saccio pecché primma ‘e ll’ora Gattuso s’’o chiammaje ‘mpanca tentanno ‘e cagnà carte ‘ntavula speranno forze ‘e sfruttà ‘a zzureja (velocità) ‘e Caromecosta ca però nun rispunnette a ll’appello!

 

[Dô 54' Osimhen[Caromecosta.] 5: Nervuso e ‘mpriciso lla ‘nnante cumbinaje poco e nniente.

 

LOZANO 7:  Ô ssolito isso se facette apprezzà sfurnanno ‘na cifra ‘e missidde (di assist) p’’e cumpagne ca però ô ssolito sciupajheno troppo permettenno a Pperin(ne) ‘e fa bbella fijura!

 

all.  GATTUSO 5: Fove overo ca ‘o Napule avette tante accasione e nnunn’’e sfruttajeno, ma isso nce mettette ‘o ssuĵo mettenno ‘ncampo ô ‘Ntontero ca fove ‘o peggio d’’e suoje.

arb.  MANGANIELLO 5 ‘A chiena i ‘a vacante: p’’e primme 45 minute siscaje senza sfregazze (sbavature) ,ma a ll’arrancua (nella ripresa) pigliaje cchiù ‘e ‘nu zzarro  e ssempe ‘ndanno d’’o Napule cumme  quanno  Mario Rui dint’â muntaca (area di rigore) genuvese fove arrunzato da Scamacca e isso lassaje correre…

E bbasta accussí, dammoce n’atu pizzeco ‘ncopp’â panza e nun fa niente si è ggià chiena ‘e mulignane (lividure).Mo si ‘o Cielo ‘o ppermette ce sentimmo ggioverí e vve conto che facimmo miercurí a Bbergamo pe ll’ejudo (ritorno) d’’a sfarnaja (semifinale) ‘e Coppa Itaglia.

Staveti bbe’. R.Bracale Brak