NAPOLI GRANADA [E.L.25.2.21] 2 A 1 ‘A VEDETTE ACCUSSÍ

 

NAPOLI GRANADA [E.L.25.2.21] 2 A 1

‘A VEDETTE ACCUSSÍ

E ppure chesto êvem’’a vedé guagliú: affuzzà (vincere) e ffà ‘a fina d’’e tracche:nun passà ‘o turno e essere custrette a ssalutà ‘a munnafasa (competizione) aiurupea datose ca ajeressera  ô Maradona ‘o Napule êsse avut’’a signà allimmeno tre addaffe (reti) senza pigliarne manch’una e ‘mmece ll’ejudo (ritorno) d’’e sediceseme d’’a cuppetta fenette ‘ncopp’ ô doje a uno pe nnujeaute cosa ca nun ce servette a ‘nu casecavallo e cce lassaje ll’amaro ‘mmocca vedenno ‘nu Napule mannato ‘ncampo a ccapa ‘e saciccio disurganizzato, spaisato e ssenza ficre (idee) anze cu una sola: chella ‘e farese jettà fora dâ cuppetta e llevarese ‘nu ‘mpiccio dê piere. Cumminfatte nun se po’ spiecà ‘e n’ ata manera ll’attijarra (scelta) ‘e Gattuso ‘e cagnà ll’urganizzaziona cullaudata  d’’a trasera (difesa) passanno da quatto a ttre madaffie (difensori) e ppe gghionta ‘e ruotele mettennole ‘ncampo ô pizzo sbagliato cu ‘o ‘Ntontero centrale ‘e miezo, Rrhamani a dritta i ‘o Ggialante a mmancina addó ca ‘o Ggialante êsse avuto stà ‘mmiezo, Rrhamani a mmancina i ‘o ‘Ntontero a  ddritta addó forze êsse fatto meno peggio ‘e chello ca facette a ccentro addó doppo cchiú ‘e ‘nu sfregazzo (sbavatura) ô 25’ se facette piglià ê spalle da Montoro ca cu ‘na cabbesera (colpo di testa) futtette ô Lungagnone fremmo cumme a ‘na statua ‘e sale; avastaje chell’addaffa (rete) ca russimaje (pareggiò) chella d’’o 3’ ‘e  Zielinski,    a ffarece ascí dâ cuppetta i a nniente  servette chella ca Anemalonga ô 59’ mettette dinto. Ce fosse vuluta ata forza, ata cegna(grinta) e ata azzaja (rabbia) asasa (soprattutto)  ô primmo ajone (nel primo tempo) quanno ‘e nuoste doppo d’avé signato ll’uno a zzero ô 3’, ‘mmece ‘e vattere ‘o fierro caudo arretrajeno ‘mparanza, ‘ncasinajeno ll’usciola e cumplicajeno ‘a facenna e gghiette a fferní ca ‘o Granada nce ‘o mettette a ppitoffio.

Passammo ê ppaggelle: 

 MERET[‘O Lungagnone] 4,5 Nun fove chiammato a ffà straurdinarie e rrummanette fremmo cumme a ‘na statua ‘e sale ‘ncopp’â cabbesera (colpo di testa) truidda (domabile) ‘e Montoro.

 

RRHAMANI 5  Miso ô pizzo sbagliato, s’êtt’ ârrangià, fove poco sicuro ‘ntajennanno (nell’impostare) e fforze êsse pututo cercà ‘e dà ‘mpiccio a Mmontoro ‘nnaccasione ‘e ll’addaffa (rete) d’’e spagnuole. 

 

 MAKSIMOVIC[‘O ‘Ntontero] 4 ‘E bbuono ‘na chiusura ô 5’, ma po troppi sfregazze (sbavature)cca e lla e asasa (soprattutto) ‘a fessaria fatta ‘nnaccasione ‘e ll’addaffa (rete ‘e  Montoro facennose piglià ê spalle : pesante zzarro ca nun lle pozzo perdunà. [dô 46’  GHOULAM 6  Trasette ‘ncampo e ffacette vedé cumme se fa ll’udé (terzino) Ma nun avastaje].

 

 KOULIBALY[‘O Ggialante] 6,5 Sempe priciso e muaddeddo (puntuale) nun se facette superà quase maje; mumazza (ottima) ll’atalossa (prestazione) soja. Ah si Gattuso ll’êsse miso ‘mmiezo!  

 

 DI LORENZO 6,5  Fove uno d’’e meglie, se magnaje ‘a curzia attaccanno e sse guardaje ‘a castagna difennenno.

 

 RUIZ[Anemalonga] 6  Salvaje ‘a faccia signanno ‘o doje a uno, ma cumplessivamente l’atalossa (prestazione) soja fove poco pusitiva: durante ô primmo ajone (nel primo tempo) ce dette ‘a ‘mpressiona ‘e passià p’’o campo senza sapé che ffà,meglio a ll’arrancua (nella ripresa) però  sbagliaje troppi pasiglie.

 

 

 BAKAYOKO[‘O Mammone] 6 Jucaje bbuone dint’ê primme minute tampunanno e ricuperanno palle cumme a cchella ca  Zielinski mettette dinto, ma po fove troppo casinista  e ccattejo (esuberante).

 

 

 ELMAS[‘O Turco] 5,5  Miso a ffà ‘o carggino  (esterno) mancino s’êtt’ârrangià e ffove troppo ‘mpriciso sufferenno contro a   Foulquier(re). [60’  MERTENS[Ciruzzo]  5,5  Ce pruvaje, ma se vedette ca nun sta ‘ncundizziona!]

 

ZIELINSKI 6,5  Fiove ‘o cchiú periculuso d’’e nuoste: nun sulo ll’addaffa (rete) pesante ô 3’, ma pure a ll’arancua (nella ripresa) dette prubbleme â trasera (alla difesa) d’’o Granada.

 

POLITANO 5   Serata no. Carta canusciuta se ‘ncapunette a ccercà ‘o pere mancino ma fove poco o pe nniente periculuso pure quanno trasette Ciruzzo e sse putette allargà ‘ncopp’â curzia.

 

INSIGNE 6  Quacche bbona jucata, ma meno ‘e chello ch’uno se fósse aspettato; bbelle ll’afachia (traversa) coveta cu ‘nu tiro ‘e timmurria (punizione) i ‘a palla p’Anemalonga mettette a ffrutto.

 

all. GATTUSO 4  Cumplessivamente ll’itimma (colpa) d’essere asciute dâ cuppetta fove tutta soja ca nun sulo mannaje ‘ncampo ‘na trasera (difesa) male sistimata e urganizzata: êsse avut’’a jucà cu ‘a trasera a quatto o allimmeno  mettere ‘o Gialante  a ccentro Maksimovic a ddritta e Rrahamani a mmancina e nnun ‘o facette e doppo d’’o terzo minuto ‘mmeced’urdinà tutte annante, urdinaje tutte arreto e dda chillu mumento però ‘o Granada mettette sotto ‘e cuane (gli azzurri),russimaje  (pareggiò) e ccu rraggione e ffenette pe ppiglià ‘o cuntrollo.

‘O sfarzetto (l’orgoglio) ‘e ll’arrancua nun servette a ‘nu casecavallo e mmo tiranno ‘e ssomme simmo asciute dâ   Coppa Itaglia, dâ cuppetta aiurupea e affannammo ‘ncampiunato. Diciteme vuje che facisseve ô posto d’’o presidente. I’ chiammasse subbeto a Ssarri!

arb: SIEBERT 6,5 Facette tutto e cchiú d’’o duvere suĵo.

E bbasta accussí. Ce simmo tirate n’ata mola e ppacienza. Sperammo ca mo jessemo meglio ‘ncampiunato e ssi ‘o Cielo ‘o ccunzente llunnerí vi dico che succede dummeneca ô Maradona contr’ô Bbenevento. Facimmo corna, Ciuccio fa’ tu! R.Bracale Brak