MILAN- NAPOLI[14.3.21] 0 A 1 ‘A VEDETTE ACCUSSÍ

MILAN- NAPOLI[14.3.21] 0 A 1

‘A VEDETTE ACCUSSÍ

 

 Vivó, vivó, vivó guagliú, canta Napule ca doppo d’ajeressera, vede cchiú vvicino  ‘o quarto posto ‘ncrassifica! E ggià pecché ajere a ll’urdem’ora ‘o Ciuccio jette a Mmilano e ppure si sulo p’uno a zzero nce ‘o mettette a ppitoffio ê diavule russe e nnire ‘e Piole ringrazzianno a ll’addaffa (rete) ô 49’ ‘E Politano ca mettette a ffrutto ‘na granna palla ‘e Zielinski ca fove uno d’’e meglie d’’e nuoste.Tre ppunte ‘mpurtante assaje e fforze  dicisive chille ca se mettetteno ‘int’â sacca ‘e nuoste. Cu ‘na mubbara (partita) mancante [chella da tuaffà (recuperare) contro â vecchia zoccola] ‘o  Napule affuzzanno (vincendo), doppo ‘nu bbuonu sibbacco (match) jucato a ttutto campo cu ‘a cegna (grinta) nicessaria, sistimato attiento e rraggiunanno,   se  purtaje ô   quinto posto ‘ncrassifica a zzamma  (quota) 50 punte… e nunn’è ppoco! P’’e primme quarantacinche minute ‘o pussesso ‘e palla d’’o Ciuccio custrignette ô Diavulo a gghiucà d’artauilatta (rimessa),ma turnato ‘ncampo l’atalossa (prestazione) d’’o  Napule fove subbeto cchiú cuncreta e ddopo ‘na surtita d’Insigne e ccumpagne ca spaventajeno ‘a trasera (difesa) d’’e lucale   già ô 49′ ‘o Ciuccio mettette ‘e ccose ‘nchiaro e cce penzaje  Politano a ttruvà ‘o sistema adatto pe ffà chiagnere a Ddonnarumma cu ‘na palla malegna ‘nchianaterra ca ruciuliaje repassatora (beffarda) azzicco ô palo luntano. E cchell’addaffa (rete) avastaje pe ffarece affuzzà (vincere) datose ca ‘e lucale p’’o riesto d’’o sbbacco (match) nun riuscetteno a rrennerse periculuse seriamente ca una ddoje vote nun cuntanno ‘na sceneggiata d’Hernandez(ze) ca cuntrullato dô Mammone se menaje ‘nterra cercanno ‘nu ricore ca però ll’ucummo (arbitro) Pasqua nun lle putette dà â faccia ‘e chillu zimmaro ‘e Mazzoleni ca ll’êsse dato.

Passammo ê ppaggelle:

 OSPINA[Pastacrisciuta] 6,5 Sempe attiento, pronto e ccuraggiuso dette ammanna(sicurezza) â sezziona (reparto) mantenenno ‘a porta acrata (inviolata) primma ‘ncopp’a ‘na cunchiusiona ‘e  Leao  e ppo ‘ncopp’a ‘na cabbesera  (colpo di testa) ‘e Rebic(cio).

 DI LORENZO 6,5  Prumosso dint’ê ddoje epate(fasi); confeziunaje ‘na bbona palla pe Zzielinski, po venette nutizziato  (ammonito) pe ‘nu carí (fallo) ‘ncopp’a Hernandez(ze) e nun ‘o vedimmo dummeneca ca vene  contro â Roma. Che peccato!

 MAKSIMOVIC[‘O ‘Ntontero] 6  Pe ffurtuna fessarie grosse nun ne facette; perdette quacche brica  duello cu Leao ma tutto summato riuscette a mantenerlo; nutizziato  (ammonito) pe ‘na trasuta a ccapa ‘e saciccio ‘ncopp’a  Ttonali. ‘E bbuono n’andivinata tacatamma (anticipo) ‘ncopp’a  Diaz(ze).

KOULIBALY[‘O  Ggialante] 6,5  Spisso ‘a vermutta ‘a vuletteno dô Ggialante ca sagliuto ‘ntusiello sbrugliaje cchiú ‘e ‘na situazziona ‘ntricata.

 HYSAJ[Mezacucchiara] 6,5  Chi se ll’aspettava?! Atalossa (prestazione)overamente pusitiva ‘e ll’arbanese ca fove ‘na spina dint’ô scianco p’’a trasera  (difesa) rossa e nnera ‘ntatacalla  (in sovrapposizione.)

 RUIZ[Anemalonga] 6,5 Affuzzaje (vinse) ‘a brica (duello) a ll’armidanno (a centrocampo) cu Kcessié e sfresaje (sfiorò)  cu ‘na granna bbotta, ‘o doje a zzero. Bravo!

 DEMME 6,5  Atalossa (prova) overo pusitiva cumme aculla (baluardo) ‘nnante â trasera (difesa).ê vvote s’allargaje troppo, ma fove sempe taminno (prezioso). Che fessaria chiammarselo ‘mpanca!  [da ll'80'  BAKAYOKO[‘O Mammone] 5 Tadamarraje (ringhiò),pe ssenza nente,ê spalle  d’Hernandez(ze) appena dint’â  muntaca (area di rigore) nosta dànno aggio ô diavulo lucale ‘e fà ‘na sceneggiata, menannose ‘nterra, cosa ca piacette a Mmazzoleni, ma ca,pe ffurtuna nosta,nun cummincette ll’ucummo (l’arbitro).]

POLITANO 7 Agruppino(pimpante)se facette vedé spisso cupulianno (dialogando) e prupunennose e ffove isso ca mettenno dinto ll’uttava addaffa (rete) ‘ncampiunato cu ‘na cunchiusione velenosa ce rijalaje ‘e tre ppunte d’oro ca jevemo ascianno. Cumprimente!  [da ll'80' MARIO RUI s.v.]

 ZIELINSKI 6,5   Fove ‘nfra ê meglie d’’e suoje;  periculuso avette ddoje bboni accasione,  ma ‘ncopp’â primma fove fermato   da Donnarumma, mentre fallette ‘e mancino ‘a siconna, retissante (clamorosa) sottoâ mez’ora. Pittato, doppo d’avé cupuliato (dialogato) cu Mezacucchiara ‘o missiddo  (assist) pe  Ppolitano.[dô 75'  ELMAS[‘O Turco] s.v.]

INSIGNE 6,5  Bbona atalossa (prestazione) d’’o capitano ca cu Zielinski se truvaje  a mmaraviglia. ‘Ncapo ‘e ‘nu quarto d’ora ggià se facette vedé tentanno ‘o tiro a ggiro e cce pruvaje pure a ll’arrancua (ripresa), ma senza frutto.

 MERTENS[Ciruzzo] 5 ‘E rummasuglie  (scorie) ‘e ll'additto (infortunio) se facetteno ancòra sèntere. Facette vedé sulo ‘nu tiro ‘mpriciso dô lemmeto; troppo poco!  Tomori s’’o magnaje e bbuono facette Gattuso a llevarlo doppo n’ora. [dô59'OSIMHEN[Caromecosta] 6  Ll’êsse vuluto fà ma ‘o vattetteno appena pigliaje palla e nne cacciaje sulo ‘nu tiro ‘e primma ‘ntenziona.]

all.  GATTUSO 6 Media ‘nfra ‘o sette p’’a ‘mpurtante  ll’arnassa (vittoria) e 5 p’’a fessaria ‘e levà  Demme e ffà trasí ô Mammone ca poco mancaje e facesse ‘a frittata

arb. PASQUA 6 Cca e lla pigliaje quacche zzarro e esaggeraje nutizziannoce (ammonendo) a quaccheduno ca mo à dda zumpà ‘a mubbara (partita) cu ‘a Roma; però nun se facette mettere ‘e ppurpette ‘mmocca da Mazzoleni.

E bbasta accussí, alliccammoce ‘e bbaffe e mmo si ‘o Cielo ‘o ccuncede ce sentimmo lunnerí ca vene e sperammo ca ve pozzo cuntà ca dummeneca ca vene a Rroma contr’ê pecurare lucale âmmu fatto bbella fijura mettennoce tre ppunte dint’â sacca! Ciuccio fa’ tu! Staveti bbe’ R.Bracale Brak