JUVENTUS – NAPOLI [7.4.21] 2 A 1 ‘A VEDETTE ACCUSSÍ

JUVENTUS – NAPOLI [7.4.21] 2 A 1

‘A VEDETTE ACCUSSÍ

Mannaggia ô demmonio scartellato guagliú! Si ve ricurdate parlanno d’’a sibbacco (match) d’ajeressera, doppo d’’e quatto arnasse (vittorie) cunzecutive d’’o Ciuccio c’ êvamo dato ‘nu punio ‘mpietto dicenno: “Ciuccio fa’ tu!” e ‘mmece ‘mmece ajeressera ‘ncopp’ô tturreno d’’o cessum-statio ‘e Turino, contro ô vecchia zoccola, pe ttutto ‘o primmo ajone (tempo) ‘o Ciuccio facette assaje poco arrennennose ô juoco cunfusiunario, manisco, ma murrabbío (lucroso) d’’e spetaccuse (lebbrosi jummerdine  i accumminciaje a gghiucà sulo a ll’arrancua  cusicché jette a ffení ca ‘a vecchia zoccola affuzzaje (vinse) ‘a mubbara (partita) ca se cunchiudette cu ‘nu scamuso ddoje  a uno p’’e lucale

grazzie ô stuco  (gol) ‘e  Ronaldo ô 13’  e cchillo ‘e  Dybala ô 73’ e ‘mpratteca nun servette a ‘nu saciccio ‘o ricore ca Insigne mettette dinto ô 90’ quanno ggià ‘e juoche erano nchiuse. Mo va a ssapé si ‘o Ciuccio riesce a repiglià da ‘stu cinchefranche avuto a Tturino e ssi tene ancora ‘a forza ‘e luttà pe ‘nu posto ‘nciampionsa!

Passammo ê ppaggelle:

 MERET[‘O Lungagnone] 5  Nun faticaje assaje; nun tenette quase  itimma(responsabilità) ‘ncopp’ô stuco (gol) ‘e Ronaldo, lassato sulo da Rrahmani, ma ‘ncopp’ô (diagonale) ‘mprivviso, ma telefonato ‘e Dybala êsse pututo fa coccosa e nnun ‘o ffacette.

 DI LORENZO 6,5  Atalossa (prestazione) ‘e sustanza ‘e ll’udé (terzino) pusitivo a ddritta  mo arreto e mmo annante. 

 RRAHMANI 5  Accummiciaje bbuono cu ‘nu paro ‘e chiusure ‘mpurtante,  ma po smarrunaje assaje ô 13’ quanno lassaje sulo a  Rronaldo ca futtette ô Lunganone; nun ce ‘o ppozzo perdunà!

 KOULIBALY[‘O Ggialante] 6  Tutto summato se mmeretaje ‘o seje pure si ‘ntribbuna-divano  nun ce piacetteno quacche sfregazze (sbavatura) quanno ascette. Peccato.

 HYSAJ[Mezacucchiara] 4,5  Sufferette assaje  ‘e gghuiucate ‘e Cuadrado e cchelle ‘e  Chiesa ca misemo (addirittura) ‘o cartiaje  quanno s’’o zucaje mettenno ‘mmiezo pe Rronaldo ‘a palla ‘e ll’uno a zzero. [Dô 76’ Mario RUI  sv.]

 DEMME 6,5  ‘Nu bbellu primmo ajone (tempo) quanno  pruvaje a urganizzà ê suoje strignenno ‘e diente.  [Dô 54’  POLITANO 5,5 Trasette senza cunchiurere ‘nu saciccio si nun cuntammo n’assuoccio cu Cchiesa.]

RUIZ[Anemalonga] 5  Serata no!  Troppo bbatejo (lento) e ttaffajo  prevedibile e asasa (soprattutto) poco matèleco  (cattivo) sciupaje ‘na bbella accasione d’’o lemmeto. [Da ll’89’ PETAGNA – sv.]

 LOZANO 5,5  Nun s’è repigliato ancòra e sse vedette. Ggiraje a vvacante,   e ssott’a ll’ora Gattuso ll’êtt’’a levà. [Dô 54’  OSIMHEN[Caromecosta] 6,5  Assaje meglio d’’o messicano se facette nutà ggiustranno dint’ô stritto, s’abbuscaje ‘o ricore pe ‘na fetenzia ‘e Chiellini  e nn’êsse avuto avé pure n’ato sempe pe ‘na caresía (fallosità) d’’o delinquente janco e nniro.

 ZIELINSKI 6,5 Serata ‘e sustanza d’’o pulacco ca fove ‘o manàro (faro) uffenzivo d’’e suoje; doppo pochi minute mannaje ‘ncopp’â loggia d’’o alazzo ‘e faccia ‘nu pallone da fravecà ‘mporta; po custretto a ffà ggirà palla a lluongo avette pochi pussibbilità ‘e dà qualità ô juoco d’’e cuane (azzurri) [ajere cu ‘na muntazzima (divisa) jettatoria ca purtaje male] però se prucuraje ‘nu ricore  pe ‘nu caucio dint’ô stinco ca lle dètte Alexandro, ma ca ll’ucummo (arbitro) Mariani, né chillu cecagnuolo d’’a varra Di Paolo vuletteno vedé; cumplessivamente putimmo dicere  ca ‘o Napule se truvaje a ddipennere sempe dê piede d’’o pulacco.

 INSIGNE 6,5  Bbona serata p’’o capitano cuano ca mettette dinto cchiú ‘e ‘na jucata ‘nteressante, trasfurmaje ‘o ricore ô 90’ e ffove ll’urdemo a dd’arrennerse.

MERTENS[Ciruzzo] 4,5  Me rispiace ma ‘e cchiú nun s’ammereta, cumbinaje assaje poco pigliato ‘ncusegna dê ggialante Chiellini e de Ligt. [Dô 76’  ELMAS[‘O Turco] – sv.]

all. Gennaro GATTUSO 5  ‘A scuatra soja p’’e primme quarantacinche minute restaje a gguardà che ffaceva ‘a vecchia zoccola, a ll’arrancua però facette ‘e cchiú  e dint’ a ll’urdema mez’ora criaje quacche  situazziona ‘mpurtante. A ccunte fatte sbagliaje a nun fà jucà Caromecosta, Mario Rui, Politano e Ppastacrisciuta  dô primmo minuto  ‘A mazzata pesa, ma da cca a gghí annante penzo ca coccosa ancòra se po’ ffà.

arb: MARIANI 4  Carta cunusciuta,surdo e ccecato ucummaje (arbitrò)a vvienetenne: nun vedette ‘nu ricore a ffavore d’’a vecchia zoccola e ppo manco n’atu paro a ffavore d’’o Napule, nutizziaje (ammonì) ‘e duje centrale cuane (azzurri) pe ccose ‘e niente e llassaje correre cchiù ‘e ‘na fetenzia d’’e spetaccuse (lebbrosi) janche e nnire.

E bbasta accussí. Jette cumme jette e ppacienza.Mo si ‘o Cielo ‘o ccunzente ce sentimmo llunnerí ca vene doppo d’’a nacchèlla (trasferta) ‘e dummeneca a ll’ora d’’a tiella  a Ggenova  contro â Sampedoria. Ciuccio fa’ tu! Staveti bbe’. R.Bracale Brak