NAPOLI – INTER [18.4.21] 1 A 1 ‘A VEDETTE ACCUSSÍ

NAPOLI – INTER [18.4.21] 1 A 1

‘A VEDETTE ACCUSSÍ

Mannaggia â capa d’’o Ciuccio, guagliú! N’ata granna accasiona perduta ajeressera ô Maradona addó êssemo pututo affuzzà (vincere) contr’ â Bbisciona e ‘mmece p’a fessaggina nosta nce refunnettemo ‘nu paro ‘e punte e c’êttem’ accuntentà ‘e ‘nu russimmo (pareggio) ca facette bbene sulo â scuatra d’’o zelluso. Nun me so’ muzzecato ‘a lengua: fesse, tre vvote fesse… Nhe chella ‘a jurnata s’era misa pe nnuje cu ssette parme ‘e sacicce: ‘a vecchia zoccola êva abbuscato, ‘e pecurare ‘e Fonseca ll’êveno pigliato ‘ncopp’ê recchie e nnuje ô 36’ stevemo affuzzanno (vincendo) apprufittanno ‘e ‘na fessaria d’ Handanovic(cio) ca ce steva facenno ‘o rialo ‘e ‘nu daffimarma (autorete), embé nuje ‘mmece ‘e attaccà a ccapa sotto tenenno ‘ntribbule e ppericule ‘a Bbisciona, turnate ‘ncampo pe ll’arrancua (la ripresa),  lassajemo ‘o pallino d’’o juoco a ll’avverzarie  cusicché jette a fferní ca arrivate ô 55’ ‘o Lungagnone nuosto facette ‘na granna fessaria, ca nun le perdono: nun ascette a recogliere ‘nu pallone ca lle passaje a ‘nu metro e mmiezo i ‘o lassaje arrivà ‘ncopp’ê piere d’Eriksen(ne) ca dô lemmeto, nun cuntrastato da Politano, ce futtette cu ‘na bbella [pe lloro] catàra (diagonale) cunquistanno chillu russimmo (pareggio) ca Conte êva vuluto scennenno ô Maradona. Cunchiusione? ‘O sibbacco (match) nuosto  d’’a 31a jurnata fenette ‘ncopp’ a ll’uno a uno cu ‘a Bbisciona cuntenta ‘e rummané primma ‘ncrassifica mentre ‘o Napule rusecaje appena ‘nu punto dint’â brica  (nella lotta) Ciampionsa a meno doje dâ vecchia zoccola; troppo poco a ppietto ‘e chello ca se fósse pututo recogliere. Fesse, fesse, fesse tre vvote fesse!

Passammo ê ppaggelle:   

MERET[‘O Lungagnone] 5,5: media ‘nfra ‘na granna  fessaria e ‘na bbella cosa; se purtaje ‘ncopp’â cuscienza ‘o russimmo (pareggio) d’’a Bbisciona pecché se lassaje passà ‘o pallone d’Hakimi a ‘nu metro e mmiezo e nnun ascette a ppigliarlo e se mmeretasse quatto, ma dint’a n’ata accasione facette ‘na bbona parata ca se chiammaje ‘o sette e cchesto va pe cchello…

 DI LORENZO 6  Mubbara (partita) ô ssolito sestimata arreto i annante.

 MANOLAS[Chitelassa] 7 Facenno ‘e cunte sott’ ô lampione putimmo dicere ca  jucaje overo bbuono senza sfregazze (sbavature), pulezzanno ‘a muntaca (area di rigore) nosta cu fforza e ccegna (grinta) nicessarie.Da nutà cumme ô niajo (nel finale) salvaje ‘ncopp’ ô solito  jabbro (cross) periculuso ‘e Hakimi.

 KOULIBALY[‘O Ggialante] 6,5  Mettette ‘a musarola a Llukaku cumbattenno cumme a ppoche cu cchillu mammasantissima. Peccato ca fove nutizziato (ammonito)…

Mario RUI 5,5 Asasa (soprattutto) a ll’arrancua (nella ripresa) sufferette troppo  contro a Hakimi perdenno spisso ‘o disaffìo (sfida) cumme ‘nnaccasione ‘e ll’uno a uno.

Fabian RUIZ[Anemalonga ] 6 Tutto summato ll’atalossa (prestazione) soja fove suddisfacente asasa (soprattutto) pe ccumme pruvaje a ffà ggirà ll’armidanno (centrocampo) allimmeno nsi’ a cquanno ‘a Bbisciona tenette ‘a zureja (ritmo) vascio. [Dô 91’ BAKAYOKO[‘O Mammone] s.z.]

 DEMME 6  Jucaje ‘nu sibbacco (match)attiento e taminno (prezioso)cu ccegna (grinta) e ppricisione; urdinato cumm’è nun se ne po’ ffà a mmeno!

 POLITANO 5,5  Nun cuntrastaje a Eriksen(ne) ‘ncopp’a ll’uno a uno e pp’’o riesto se vedette assaje poco pe cuncretezza uffenziva allimmeno  nsi’ ô 79’ quanno cugliette ‘o sette d’’a porta cu ‘na cagliosa. Peccato: êsse pututo fa ‘e cchiú!  [Dô 91’ HYSAJ[Mezacucchiara] – s.z.]

 ZIELINSKI 6   Fenuto ‘mmiez’ô bburdello d’’a midiana addó ‘a Bbisciona ‘a cummannaje fove meno lammajo (brillante) d’’o ssolito e nnun cercaje maje ‘a porta. Peccato. [Da ll’88’  ELMAS[‘O Turco] – s.z.]

 INSIGNE 6,5  Core ‘e capitano furnette n’atolossa (prova)carimma (generosa); annante se vedette poco ma dô pero suĵo partette ‘o jabbro (cross) ca Handanovic(cio) ‘nchietta cu De Vrij facette addivintà  ‘na frittata; spisso se facette vedé arreto pe cquacche ricupero ca se chiammaje ll’applavuso!

 OSIMHEN[Caromecosta] 5  ‘A scuatra ‘e Conte nun lle permettette ‘e fà ‘o juoco suĵo preferito, chillo a ccampo apierto e s’arrangiaje a ffaticà  spalle â  porta però cu pocu zuco e ccunnimma! ‘Nzomma ‘na delusione. [Dô 74’  MERTENS[Ciruzzo] 6  Trasette facenno chellu ppoco ca lle cunzentetteno ‘e fà. Ajere forze fósse stato meglio uno cumme a Ppetagna…

all.  GATTUSO 5,5  Forze pur’isso stranamente se cuntentaje d’’o russimmo (pareggio) e nnun sprunaje ê suoje âttaccà. Nun ce simmo.

arb. DOVERI 5,,5 Nun facette tutto ‘o duvere suĵo sparagnanno â Bbisciona quacche cartelline jalizze (gialle).

È gghiuta cumme è gghiuta e ppacienza. Jammo annante! Mo, si ‘o Cielo ‘o ccuncede ce sentimmo viernarí ca vene pe ccuntareve che succede ô Maradona ggiovedí a ssera contr’ô pappavallo ‘e Lotito.Abbiammo a ffà corne. Ciuccuio fa’ tu! Statevi bbe’. R.Bracale Brak