NAPOLI – VERONA [23.5.21] 1 A 1 ‘A VEDETTE ACCUSSÍ

NAPOLI – VERONA [23.5.21] 1 A 1

‘A VEDETTE ACCUSSÍ

Che nervatura guagliú e cche delusiona! Urdema ‘e campiunato ajeressera ô Maradona e nnujate ttifuse d’’a tribbuna-divano   nce aspettavemo ca fósse stata   ‘na festa! E ‘mmece, ‘mmece chi t’’a dà?! ‘Nu Napule [ca dette ‘a ‘mpressione ‘e nun starece pe nniente a ppietto ‘e ‘nu Verona ca [forze e ssenza forze e chi sa’ pecché… ] scennette ‘ncampo pe ffà ‘o sibbacco(match) d’’a vita] purtroppo se jettaje a mmare cu ttutte ‘e panne russimanno  (pareggiando) p’uno a uno, cosa [quase certamente dicisa dint’ô Palazzo]; ô Maradona succedette tutto a ll’arrancua  (nella ripresa) cu ‘o ventajo  (vantaggio) napulitano  firmato da  Rrahmani sulo ‘ncapo ‘e n’ora esatta i ‘o russimmo(pareggio) ‘e  Faraoni nove minute cchiú ttarde, russimmo ca aunito a ll’arnasse (vittorie) d’’e diavule russee nnire a Bbergamo e d’’a vecchia zoccola a Bbulogna nce facette nchiudere ‘stu campiunato ô quinto posto ‘ncrassifica, arreto â vecchia zoccola e   sservette a gghiettarce fora dâ Ciampionsa. Poveru  Ciuccio! N’ata tempurata (stagione) inutile!

Passammo ê ppaggelle:

MERET[‘O Lungagnone] 6 Atalossa  (prestazione) tutto summata  pusitiva, cu cchiú ‘e n’asciuta attienta e pricisa e ‘nu bbuonu taccullo  (intervento) ‘ncuollo a Ddimarco. Tentaje pure ‘e fermà ‘o tiro ‘e Faraoni, ma nun ce riuscette; peccato!

 DI LORENZO 4,5  Me dispiace, ma ajere facette troppi mancanze ‘e distraíto (distrazione); arreto facette ‘o bbuono i ‘o mmalamente  e cquanno scennette annante nun fove maje tadiddo (efficace).

 MANOLAS[Chitelassa] 6,5 Pronto, attiento e ppriciso asasa (soprattutto) a dritta ‘nchiusura facenno sempe tutto ‘o duvere suĵo.

 RRHAMANI 6 Nun sulo signaje ‘o stuco (gol) ca c’êsse pututo mannà ‘nCiampionsa, ma se cumpurtaje bbuono pure areto però êsse pututo fà coccosa ‘e cchiú ‘naccasione d’’o stuco  (gol) ‘e Faraoni.

 HYSAJ[Mezacucchiara] 3,5 Serata panurgosa (pessima)’e ll’arbanese; pe tutto ‘o sibbacco (match) nun cunchiudette ‘nu saciccio cu ‘a grossa fessaria, ‘naccasione d’’o stuco ‘e Faraoni, quanno se facette passà ê spalle e ‘mmece ‘e dà ‘nu sbuttulone a ll’avverzario fora dâ muntaca (area di rigore) l’accumpagnaje dinto senza tentà niente![Dô 72’ Mario RUI 5,5 Trasette a frittata fatta e pputette fa poco.]

 RUIZ[Anemalonga] 4,5 Quanno se trattaje ‘e caputià ll’azziona fove bbatejo (lento), ‘mpriciso e ccu  ppochi ficre (idee) sciupanno ‘o bbuono fatto cumme aculla (contenimento).

 BAKAYOKO[‘O Mammone] 3 Atalossa  (prova) panurgosa (pessima): bbatejo (lento) e  ‘mpriciso fove ‘o peggio d’’e suoje e arresecaje pure ‘e farese caccià. [Da ll’ 81’ PETAGNA 6  Trasuto troppo tarde poco mancaje ca a ll’urdemu siconno nun ce desse ‘a surisfazzione de farece affuzzà (vincere), ma cugliette ll’afachia (traversa). Peccato!]

 LOZANO 4,5 Mancaje ‘e cegna (grinta) e fficre (idee); facette coccosa ‘ncupertura, ma annante aizaje porvera. [Dô 67’  POLITANO 6,5 Trasette bbuono, crianno quacche periculo: si êsse jucato dô primmo minuto fosse stato meglio!]

 ZIELINSKI 5 – Pruvaje a ffà coccosa pe zzarrajà  (velocizzare) ll’azzione, ma pur’isso nun fove priciso, né ccercaje maje ‘a porta steccanno proprio dint’ô chiuovo! [Dô 72’  MERTENS[Ciruzzo] 5,5  Facette poco e ll’unicu lampo fove chillu cuntatto cu Udogie dint’â muntaca (area di rigore), cuntatto ca ll’ucummo (arbitro), senza sbaglià, nun cunzideraje ricore.]

INSIGNE 4,5 Ajeressera, manco ‘o capitano riuscette a ssaglí ‘ntusiello i a ffà ‘a faracca (differenza).Durante ô primmo ajone (tempo) sulo ‘na vota, addirittura doppo mez’ora [e ffove ‘o oprimmo tiro ‘mporta d’’e nuoste…] cercaje ‘e signà po s’avasciaje tentanno ‘e ‘mmentà coccosa, ma nun ce riuscette.

 OSIMHEN[Caromecosta] 4 Serata no: bbatejo (lento) e ccunfuso nun servette né ppe ffrijere, né pp’arrostere e Ggunter(re) s’’o magnaje…  

all.  GATTUSO 4 – Nun ce credette,sbagliaje furmazziona e ccagne, nun riuscette a  trasmette ê suoje ‘a taccheja (energia) ca nce fósse vuluta e s’arrennette pur’isso ô destino, forze ggià sapenno ca Dela êva diciso e nun cunfermarlo.

arb. CHIFFI 5 – Facette quase tutto ‘o duvere suĵo.

E bbasta accussí. Jette cumme jette e ppacienza! Se vede ca accussí steva scritto. Mo cumme a mmo nun saccio quanno e ssi ce sentimmo, però ‘na cosa ve dico: chest’ata delusione ‘e campiunato nun ce à dda fa scurdà ca simmo tifuse e avimm’’a sempe alluccà: CIUCCIO FA’ TU! Staveti bbe’!  Raffaele Bracale Brak