ALICE â SCAPECE

 

ALICE â SCAPECE

(alici alla scapece)

 

Chello ca  serve pe sseje perzone:

‘Nu chilò ‘e alice fresche ‘e jurnata,

‘Nu bicchiere ‘e  acito ‘e  vino janco,

‘Nu spiculo d’aglio ammunnato e ntretato fino fino,

‘Na fronna ‘e lauro frisco,

farina q.n.s.,

sale duppio e ppepe janco nacenato a ffrisco  q.n. s.,

 Tre  bicchiere d’uoglio ‘auliva dunciglio (e.v.p. s. a f.) ,

pane rattato quatte  cucchiare, 

‘Nu túppeto  ‘e menta lavato, asciuttato e spezzettato a mmano.

Comme se fa.
Lavà l’ alice,levarle capa, coda, spina e mmennute (visceri) e  arapennole a ffuoglie ‘e libbro,ma  mantenennole aunite p’ ‘a ‘sparda (per il dorso);’nfarenarle e frijerle dinto a dduje bicchiere d’uoglio ‘auliva dunciglio callentato.

Dinto a n’ata cummedità a ffuoco miccio fà callentà n’atu bicchiere d’uoglio dunciglio cu ll’aglio ntretato e ‘a fronna ‘e lauro; agnadí (aggiungere) ‘nu bicchiere ‘e  acito ‘e  vino janco e fà vollere tutto pe cinche minute.

Sistimà ll’alice fritte una vicina a ll’ata dinto a ‘na sperlonga ‘e purcellana,derrammà cu ‘o ppane rattato, sale duppio,  ppepe janco nacenato a ffrisco    e ricà tutto  cu ‘o zuco vullente d’uoglio e acito; agnadí (aggiungere) ‘a menta spezzettata, cummiglià   e primma ‘e  serví,  lassà arrepusà pe ‘nu paro d’ore.

Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja.

 

Magna Napule,  bbona salute! Scialàteve e aggarbbatéve ‘o vernecale!!

Raffaele Bracale