LEICESTER CITY – NAPOLI [E.L 16.9.21] 2 A 2 ‘A VEDETTE ACCUSSÌ

 

LEICESTER CITY – NAPOLI [E.L 16.9.21] 2 A 2

‘A VEDETTE ACCUSSÌ

Eccuce cca guagliú… Ajeressera ‘o Napoli ‘e  Spalletti, primmo ‘nserie A a nnatiggio chino (punteggio pieno) [9 punte] ‘ncignaje ‘e sibbacche (match) d’’a cuppetta aiurupea jenno ‘ncopp’ô campo ‘e ‘na scuatra ‘ngrese tosta e scamosa: ‘o  Leicester(re) e se ne turnaje cu ‘nu punto dint’â sacca doppo d’avé adderezzato ‘na varca ch’era stata spurtusata ‘na vota a ppoppa e  n’ata a pprora. Certo ce fósse piaciuto ‘e mantenere ‘a porta acrata (inviolata)…, ma nun ce riuscettemo che ce vulite fà? Jette accussí e ppacienza. Anze i’ ve dico ca putimmo essere surisfatte d’’a granna ruffalla (reazione) d’’e nuoste ca ‘nsotto pe ddoje a zzero, nun s’arrennettero cumbatteno cu ‘o sanco a ll’uocchie nsi’ a cche cu ddoje taffe (capolavori) ‘e Caromecosta [69’ e 88’] nun angappajeno ‘o doje a ddoje, russimmo (pareggio) ca nunn’è assaje, ma manco poco!

Passammo ê ppaggelle:

OSPINA[Pastacrisciuta] 6 – Poco primma ‘e piglià  ‘o primmo stuco(gol) ascette ‘nterra  salvanno ‘a porta; ‘ncopp’ê ddoje addaffe (reti) pigliate, senza itimme (colpe) soje, putette fà poco o niente.

 MALCUIT[‘O Tignuto] 5   Cercaje ‘e fà coccosa passanno ‘a mità ccampo pure si fove assaje poco priciso, ma arreto sufferette troppo cu Barnes(so),ca nun sulo signaje ma furnette  pure ‘nu missiddo (assist)ca ce facette chiagnere. Peccato! [da ll'84'  JESUS s.z.]

 RRAHMANI 6 Quacche vvota smarrunaje, ma ce mettette sempe ‘na pezza. Êss’ avut’’a sfruttà meglio ‘a palla d’’o doje a ttre! Ah si ll’êsse fatto!

 KOULIBALY[‘O Ggialante] 6,5 Nun tenette itimme (colpe) ‘ncopp’ê ddoje addaffe ‘ngrese e pp’’o riesto fove chell’aculla (muraglia) ca sapimmo.

DI LORENZO 5,5 – Jucaje spustato a mmancina, ma smarrunaje assaje ô 9’ perdennose a Pperez(ze) ca signaje. Nun ce ‘o ppozzo perdunà!

 RUIZ[Anemalonga] 5,5 Fove troppo poco priciso. Però nun le metto cinche, ma miezu zifo (voto) ‘e cchiú p’’o missiddo (assist) a Ccaromecosta ‘naccasione d’’o doje a uno.

ZAMBO ANGUISSA 6  Se facette sèntere ‘mmiez’ô campo cunfermanno d’essere ‘nu bbuonu jucatore ‘e sustanza. [da ll'84'  PETAGNA s.z.]

 LOZANO 4,5 E ll’aggiu trattato pecché fove ‘na iachibba (delusione) tutale:  cumbinaje poco e nniente, smarrunaje assaje e Spalletti ‘o tenette troppo ‘ncampo. [dô 64'  POLITANO 6,5 – Cagnaje ‘a faccia d’’o sibbacco   (match) facennose apprezzà pe fficre (idee) e ccegna (grinta); fove isso ca pennellaje p’’a capa ‘e Caromecosta ‘a palla d’’o russimmo (pareggio)]

 ZIELINSKI 5  Me dispiace, ma ‘e cchiú nun s’ammereta; zumpettaje ‘nfra ê llinie senza maje truvà ‘a manera ‘e fà male; lle capitaje ‘nu sciccu pallone sotto porta e nnun ne cacciaje niente! [dô 64' ELMAS[‘O Turco] 6,5 – Dètte prio (brio) a ll’attacco nuosto cullabburanno ê mmunavare (manovre) uffenzive, tiraje  ‘mporta, e ppigliaje parte a ll’azziona d’’o doje a uno!]

INSIGNE 6 Ce pruvaje sempe, ma spisso ‘e fficre (idee) soje nun foveno capite dê cumpagne.[dô 74'  OUNAS 6,5  Bbuonu urdemu quarto d’ora ‘nfra tammisse (guizzi) e ggiadille (spunti) cunfermanno ‘e puté serví ‘ncorzo d’opera!]

OSIMHEN 8,5 – Mammarrejo (Devastante).’Nu vero gerro (Un autentico trascinatore) ca dê primme minute tentaje ‘e pigliarse ‘a scuatra p’’a mana e ffacette ddoje granne  addaffe (reti) una meglio ‘e n’ata: ‘a primma cu ‘na magaria  i ‘a siconna ‘e capa saglienno ‘mparaviso pe truvà ‘a palla e mmetterla ‘mporta! Applavuse! 

all. SPALLETTI 6,5  Andivinaje ‘e cagne juste. Putimmo dicere ca ‘o russimmo (pareggio) d’ajere fove quase n’arnassa.Nun stongo esaggeranno e cchi nun ce crede se futtesse!

arb. MARTINS 6 Facette chello ch’êv’’a fa.

E ffermammoce cca dannoce appuntamento, si ‘o Cielo ‘o vvo’ pe marterí ca vene pe pparlà ‘e Udinese - Napule ‘e llunnerí vinte. Staveti bbe’. Raffaele Bracale Brak