SAMPDORIA -NAPOLI(23.9.21) 0 A 4 ‘A VEDETTE ACCUSSÍ

SAMPDORIA -NAPOLI(23.9.21) 0 A 4

‘A VEDETTE ACCUSSÍ

Guagliú che surisfazziona! Doppo cinche jurnate ‘e campiunato ‘o Ciuccio à jencuto ‘a mesura e ccu quinnece punte s’è ppiazzato, sulo, ‘ncimma â crassifica ‘nnante ê ddoje milanese. E ggià pecché  ajere, ‘mmerz’ê sseje e mmeza cu ‘a siconna nacchella (trasferta) cunzecutiva, Sampdoria-Napoli, sibbacco  (match) d’’a quinta jurrnata ‘e serie A ascette n’ata quaterna ‘ncopp’â rota ‘e  Ggenova i ‘o Napule se mettette dint’â sacca n’ati tre ppunte cauzante e sustanziuse affuzzanno (vincendo) cumme a Udine pe cquatto a zzero dicenno grazzie a Caromecosta [10’ e 50’] ô signurino Anemalonga [39’] i a  Zielinski[59’]! Nc'erano state verzaglie (segnali) ‘mpurtante contro ô Leicester(re), quanno ‘a scuatra luvarda (azzurra) êva dimustrato ‘e piglià pussesso d’’e cqualità ca tene e ca pure ajere facette vedé tenenno ‘mmano ‘e rretene d’’o juoco pe ttutt’’e nuvanta minute, lassano sulo ‘nu paro accasione ê duriane, ma cu ‘nu granne Pastacrisciuta pronto a mmetterce ‘na pezza!  Se vedette ‘ncampo ‘na scuatra quatrata  ca sapeva chello ca vuleva e ll’avette. Applavuse!

Passammo ê ppaggelle:

OSPINA[Pastacrisciuta] 7 Sicuro, attiento  e cuncentrato sfuderaje dduje granni tacculle (interventi) fermanno  ddoje cunchiusione malegne di Adrien(ne) Silva e d’ Yoshida dinte a ppoche sicunne e cquanno ancòra se steva ‘ncopp’ô zzero a uno!

 DI LORENZO 7 Atalossa (prestazione) ‘inteliggente ‘e ll’udé (terzino) ‘e dritta d’’o  Napule, prutacunista d’allimmeno ‘nu paro d’ antijsse  (recuperi) dicisive sfruttanno ‘o senzo d’’a pusizziona.

 RRAHMANI 6,5  Lle se po’ sulo dicere: “Bravo!” Doppo â bbella atalossa (prestazione) d’Udine ajere nce dette ‘a  cunferma dimustranno  nun sulo d’essere pronto e sicuro cu ògne taccullo   (intervento),ma pure ca ll’alliamajo (affiatamento) cu  Kalidú cresce ogne ghiuorno. Fove custretto a dd’ascí ô 47’ doppo ‘na brutta pallunata ‘nfaccia ca ‘o stupetiaje. [dô 48'  MANOLAS[Chitelassa] 6,5 S’êva repiglià doppo ‘a fessaria  fatta cu ‘a vecchia zoccola e sse repigliaje, trasenno cu ccegna e azzaja  (grinta e caparbietà) e ffacennose subbeto sèntere cu ‘nu paro ‘e trasute pe pulezzà ‘a muntaca (area di rigore) senza tanti cumprimente; avsse avuto sparagnarese ‘o cartellino jalizzo (giallo) ô niajo  (nel finale).

 KOULIBALY[‘O Ggialante] 7,5  N’aculla( una muraglia) ca se prupunette  bbuono pure ‘nnante, quanno scennette pe ffà partí ‘a munavara  (manovra) cuana (partenopea); p’’o riesto cumannaje ô ssolito a mmestiere ‘a trasera  (difesa) rafaddanno  (respingendo) ògne attacco duriano, senza maje jí dint’ê chiavette!

Mario RUI 6,5 Se ll’êtte ‘a vedé cu ‘nu  Candreva ca nun mullaje maje, ma ‘o purtuchese’o riuscette a bbluccà senza sfregazze (sbavature).

RUIZ[Anemalonga] 7,5 Grossa atalossa (prestazione) gestiunanno (gestendo) a mmestiere ‘o pallone ‘mmiez’ô campo e signanno ‘o zzero a ddoje  cu ‘na matàla (perfetta) pricisa rasulata mancina  ca mannaje ‘o pallone addó ‘o purtiere nun putette arrivà. Cumprimente!   

 Zambo ANGUISSA[‘O ‘Ntussecuso] 8 Nun se sparagnaje e nun mullaje maje: fove patrone ‘e ll’ armidanno (centrocampo) tassarianno (accelerando) e abbettianno  (rallentando) cumme e cquanno vulette. Sciapó!

 LOZANO 7 - Turnato titulare  facette vedé d’essere ‘nforma, magnannose a cchillu puveriello  d’ Augello ca jette ô manicomio e s’êtte arrennere primma d’essere jettato fora da ll’ucummo (arbitro) ‘O messicano  pennellaje ‘o missiddo  (l'assist) pe Ccaromecosta e ppo chillo pe Zielinski dimustranno d’essere ‘mpurtante p’’o juoco ‘e  Spalletti. [da ll'82'  OUNAS 6 Poche minute,ma ‘e sfruttaje bbuono sfresanno (sfiorando) ll’addaffa (la rete) cu ‘na catàra (diagonale) mancina a ‘ncrucià.

 ZIELINSKI 7 – Turnato  titulare, migliuraje ll’armidanno d’’o Napule e cce dètte ‘o piacere ‘e farece apprezzà ‘na pricisa  cagliosa mancina soja  chella d’’o zzero a cquatto![dô 68'  ELMAS[‘O Turco] 6  Facette justo justo  ‘o ssuĵo tracchiggianno ‘mmiez’ô campo.

 INSIGNE 7,5 Bbella mubbara (partita) d’’o capitano ca fove sempe prisente dint’ô juoco cu ccegna (grinta) e fficre (idee) firmanno ‘e missidde  (gli assist) p’’e primme dduje stuche (gol).

[dô 68'  POLITANO 6 Nun riuscette maje a ttruvà spazzio e ttiempo pe cunchiurere e cce facette vedé sulo quacche tammisso (guizzo) a dritta.

 OSIMHEN[Caromecosta] 8 – Cunfermaje d’essere dinto a ‘nu mumento favurevole e de tené ‘ntenziona ‘e sfruttarlo: signaje ddoje addaffe (reti) e sse ne magnaje allimmeno n’atu paro, pe nun parlà ‘e chillo ca lle cassajeno pe n’attasallulo  (offside) ca ce steva e nnun ce steva! [da ll'81' PETAGNA  6 ‘e stima.]

all.:  SPALLETTI 8 Tene a ddispusizziona ‘na uarrada (rosa) forte i attrezzata e nsi’ a mmo ‘a sta sfruttanno overo bbuono; ajere ‘a scuatra soja fove prutacunista ‘e n’atalossa (prova) ‘e forza e azzaja (caparbietà) e sse mettette tre ppunte sustanziuse dint’â sacca cunquistanno ‘o primmo posto ‘ncrassifica cumpletamente mmeretato!

arb. VALERI 6 Facette chello ch’êv’’a fa…

E bbasta accussí. Putimm’essere cuntente ‘e cumme stanno jenno ‘e ccose… Speranno ‘e nun ce fermà! Mo, si ‘o Cielo ‘o ppermette ce sentimmo llunnerí ca vene e i’ penzo, facenno ‘e scungiure nicessarie, ca ve pozzo cuntà ca ‘o Ciuccio dummeneca  vintiseje ô Maradona à cardato ‘o pilo pure ô Cagliari â faccia ‘e chi ce vo’ male…

‘E cchiú, ‘e cchiú, ‘e cchiú… Ciuccio fa’ tu!

Staveti bbe’. Raffaele Bracale Brak