INTER – NAPOLI [21.11.21] 3 A 2 ‘A VEDETTE ACCUSSÍ

 

INTER – NAPOLI [21.11.21] 3 A 2

‘A VEDETTE ACCUSSÍ

Che peccato guagliú, mammaggia ê cane ‘e cancielle! Però ‘na vota o ll’ata êva ‘a succerere e assaffa (purtroppo) capitaje ajere mmerz’ê sseje ô Meazza addó ‘o Ciuccio cullezziunaje ‘a primma azzimma (sconfitta)’ncampiunato pe mmano d’’a Bbisciona ca ce cardaje ‘o pilo pe tre a ddoje, cusicché ‘o trirece nun ce purtaje furtuna, ma jella e nnun fovemo crestiane d’apprufittà d’’o pontapere pigliato sapato a Ffirenze dô diavulo russo e nniro…. E ddicere ca nunn’ avevamo accumminciato malamente purtannoce ‘nventajo (in vantaggio) cu Zzielinski ô 17’ e nun stevemo jucanno malamente…, ma po ce sturzajemo (sgonfiammo),  appena otto minute doppo quanno cu Ccalhanoglu ‘a Bbisciona se mettette ‘ncopp’a ll’uno a uno cu ‘nu ricore ca però ce steva datose ca ‘o Ggialante fove cuoveto da ‘nu tiro ‘ncopp’ô vraccio largo; e ddoppo d’’o ricore nun fovemo cchiú capace ‘e dà ‘ncullo â Bbisciona cu ‘a soccia  pressiona auta  e quartajola  (forsennata) d’’e primme minute  e gghiette a ffení ca  ‘a  scuatra nosta venette accuppata asasa (soprattutto) ‘mmiez’ô campo e ffove quase naturale ca ‘a Bbisciona nce surpassasse e apprimma cu Perisiccio [44'] e ppo cu Llautaro [61’]  se mettesse ‘ncopp’ô tre a uno e ssulo ô 79’ Ciruzzo [trasuto ô 75’] cu ‘na magaria d’’a soja nce purtaje ‘ncopp’ô tre a ddoje, però po se magnaje ‘o tre a ttre e nce jette vicino Mario Rui fermato da ‘nu bbellu taccullo (intervento) d’Handanovi(cio) e abbuscajemo né ce avastajeno ll’addaffe (reti) d’’o pulacco e dde Ciruzzo pe scanzarce ll’azzimma (sconfitta) amara, anze cchiú ca amara giacché nce refunnettemo tierze e ccapitale datose ca Caromecosta pe ‘na capata ‘nfaccia ‘e Skriniar(re) jette a ffení ô spitale mazzammurrato (fratturato) a ll’azzammo (zigomo) e a  ll’ aibbo (orbita) mancine i à dda stà fremmo pe ‘nu mese!  Quacche cestariello nce à cuovete.  Passammo ê ppaggelle:

 

OSPINA[Expastacrisciuta]6 ‘Ncopp’ô ricore i ‘o tiro ‘e Lautaro lassato libbero da Mario Rui nun ce putette fa niente, ma ‘ncopp’â tacatarrassa   (colpo di testa) ‘e Perisic(cio) se truvaje ‘nu poco fora pusizziona, però facette dduje bbuoni tacculle (interventi) ‘ncopp’a ddoje cunchiusione ‘na vota ‘e  Barella e ‘na vota ‘e Lautaro e cchesto va pe cchello!

 

DI LORENZO 6 Tutto summato smarrunaje sulo ‘na vota rijalanno ‘nu pallone periculuso, ma p’’o riesto fove curaggiuso e ccumbattette nsi’ ô 98’ cuPerisic(cio).

 

 RRAHMANI 6 Se ll’êtte ‘a vedé cu Ccorrea ca tentaje ‘e chiammarselo fora dâ camma (zona) soja stunannolo cu ghiuoche ‘e pristiggio, ma isso nun se facette cartià e ssalvaje pure ‘ncopp’â linia! Bravo.

 

KOULIBALY[‘O Ggialante]5,5 Nun mancaje ‘e presenza, ma ‘nnaccasione d’’o ricore nunn’êsse avuto allargà ‘o vraccio e nun ce ‘o pperdono; però me cumplimento p’’a palla levata   a Dzeko ca dda chella nascette ll’addaffa (rete) ‘e Ciruzzo.

 

 MARIO RUI 5 Me dispiace, ma dê pparte soje ‘a Bbisciona jette a ccarne e mmaccarune e sse ne vedette bbene cu Darmian(ne); sempe attrassato (in ritardo) nun nchiudette ‘ncuollo a Llautaro ‘nnaccasione d’’o tre a uno.  Però êsse pututo signà ‘o tre a ttre e ssulo ‘a pruntezza d’Handanovic(cio) ‘o fermaje. Peccato.

 

 ANGUISSA 5,5 Alicante, sí fove alicante, ma poco tadiddo (efficace).

FABIAN RUIZ[Anemalonga] Serata no. Uno cumme a isso nun po’ cuncedere  a Ccorrea ‘na corza ‘e sissanta metre senza metterce ‘na jamma, stennerlo e ffermarlo… pesce ‘e cannuccia!

 

LOZANO 5 S’appicciaje e sse stutaje cumme ê luciarelle ‘e n’arbero ‘e Natale, ma facette poca luce!

[dô 75’ ELMAS [‘O Turco] 6 Nun facette assaje, ma ‘o ffacette!

 

 ZIELINSKI 7 Tutto summato ‘o  pulacco nun se fermaje maje; nun sulo sbluccaje ‘a facenna cu  ‘na perna da fora,ma da ll’accummenzaglia â fenetura furnette missidde (assist) e cqualità.

 

 INSIGNE 5 È scarreco e sse vedette; facette sola ‘na bbona jucata pe ll’addaffa (rete) ‘e Zielinski, po scumparette. [dô 75’ MERTENS [Ciruzzo] 7 Trasette e [79’] truvaje subbeto n’addaffa (rete) overo bbella, ma subbeto doppo se magnaje ‘o russimmo (pareggio). Peccato. Chi sa’ si fosse trasuto primma!

 OSIMHEN [Caromecosta]5,5 Ce fóssemo aspettato ‘e cchiú; troppo nervuso se vedette poco o niente: una palla lle capitaje i ‘a sfruttaje malamente; pe gghionta ‘e ruotelo se scuntraje  cu Skriniar(re) e ffenette ô spitale. Che ghiella!

[Dô 55’ PETAGNA 6  Trasette mettenno ‘nsuggezzione ‘a Bbisciona jenno a bbattaglià ‘e capa o ‘e piere ‘ncoppo a ògne pallone.

 

 

 

 

All. SPALLETTI 5,5 Nun lle perdono d’avé mannato ‘ncampo Lozano e Insigne e d’averle cagnare tarde; mo âmm’’a vedé cumme è ccapace ‘e gestiunà ‘sta primma  azzimma (prima sconfitta).

Arb VALERI 5 Sventulaje troppi cartelline jalizze (gialli) juste e nno. Nun vedette ‘o vraccio   largo d’’o Ggialante i ‘o salvaje ‘a Varra; p’’o riesto faticaje a gguvernà ‘o sibbacco (match).

E bbasta accussí Dammoce ‘nu pizzeco ‘ncopp’â panza e guardammo ‘nnante; tutto summato simmo ancòra primme pure si cu ll’ossa scassate.

Mo, si ‘o Cielo ‘o ccunzente ce sentimmo ggioverí ca vene pe ccuntareve che succere a Mmosca contr’ô Spartak(che) Mosca  p’’a cuppetta iurupea. Pirciò, m’arraccumanno, miercurí, pure si ‘ntribbuna divano,  mettimmoce sciarpe cappielle e ccappotte ca se va a Mmosca e lla fa friddo!

‘E cchiú, ‘e cchiú, ‘e cchiú… Ciuccio fa’ tu!

Staveti bbe’! R. Bracale Brak