NAPULE MIA!...

Napule mia!…


I

Te stanno distruggenno!… Pure ’o mare
’o mare bbello, t’ànno avvelenato…
’Nun ll’abbastaje ’e s’arrubbà denare,
peffino ’a dignità se so’ pigliata!

Eramo ’na nazione, e a quanto pare
mo simmo meno ’e niente addeventate:
Napule mia, e quanti mmorze amare
ce âmmo agliuttute, nce simmo magnate!

E tutte’ànno azzuppato: chi venette,
chi se truvaje ’e passaggio: o bbuono e ’o tristo
ognuno arricettaje e annascunnette

ognuno addeventaje ’nu cammurrista
pe paccariarte e te spugliarte ’e tutto,
deciso, e comme!, a farlo bbuono ’o bbutto!

II

E tu, mannaggia a tte, tu zitta e mmuta
l’hê fatto fà, senza dicere niente!
Pecché, Napule mia, t’ ’o ssî tenuto
e l’hê permiso a ’sti quatte pezziente

’e scurtecarte?!… E comme l’hê pututo?
E mo? Mo aize ’a capa inutilmente…
È ttarde ormaje, ormaje t’ànno futtuta!
E aje voglia ’e fà nun c’è cchiú salvamiento:
’a ch’ire masta, mo fatte capace
mo staje a guagliona e t’hê ’a tenerte ’a posta.
Che te vuó ribbellarte? Datte pace:

mo nun sî cchiú nisciuna!… E ’e ffaccetoste
ca te danno curaggio, damme retta
te pigliano pe ffessa, nce scummetto.

III

E si t’ ’o dico e nn’ ’o ttengo annascuso,
m’hê ’a credere è pecché me sape a dduro
pe ccomme sî arredotta… e sto’ ’nguttuso
penzanno ca ’sti fforme ’e ’mpustature

’sti giesuite fauze e cuntignuse,
tenenno ’a chiave ’e cchiú ’e ’na mascatura
stànno azzuppanno ’o ppane, ’sti mafiuse
ca parlano facenno ’e prufessure,

ma invece nun le ’mporta ’o riesto ’e niente
’e stu paese cca… ’o fatto overo
è ca fanno ’e sapute unicamente

pe scurchiglià quaccosa a chi nce crere
a tutt’ ’e mmille chiacchiere assurtite…
a ’sti cunziglie… quase maje gratuíte!

IV

E ognuno ’e lloro te caccia ’a ricetta
’o studio fatto apposta e situato,
’a soluzzione ch’è propeto allicchetto
ca costa poco o niente, ma è indicata


pe te salvà…, pe metterte ’nzeggetta,
pe te fà saglí ancora ’a scalinata
e farte fà a figura ’e primm’aletta
comm’ire tanno, ô seculo passato…

E cu ’sta scusa ’e te salvarte ’a pella
vanno ’assettarse ô posto… d’ ’e barune
e masterianno ognuno dint’â tiella,

’a ch’erano sultanto ’e si’ nisciuno,
so’ addeventate tali puzze ’e scienza,
ca tutto cosa… ’o ppigliano ’ncrerenza…

V

Ma ’e fatte nun se vedono… purtroppo!
Chiacchiere e ttabbacchere: e questo è quanto!
Ca si fanno quaccosa, è ’a coppa ’a coppa,
chello ca vede ’a suocera sultanto:

è tutto applò, muféta, ’nu rattoppo
ch’appara ll’uocchie, ma sotto è vacante…
e tu, paese mio, sî sempe zuoppo,
aje voglia ’e cummiglià, sî ’o stesso chianto…

’O stesso chianto ca ggià dura ’a tiempo
e nun ce sta speranza… ’o fatto è sserio
pecché oramaje ’stu chianto tujo è pe ssempe

e mare a nuje, nun ce sta cchiú remmerio:
e a che te serve ca tu aize ’a voce,
quanno pe sempe t’ànno miso ’ncroce?

VI

E nun ’a mo… Facenno bbuono ’e cunte
è cchiú ’e cient’anne e cchiú ca ne staje avenno
corde e funicellate e quante affrunte!
So’ cchiú ’e cient’anne ca tu staje chiagnenno

’a quanno te truvaste chill’accunte,
ca sott’ô colpo e senza jí sapenno
te libberajeno e… appresentajeno ’o cunto
ca p’ ’o pavà, tu ancora vaje pezzènno!

Purtajeno ’a libbertà! E tu ’e crediste!
’A libbertà! E ttu te ll’ammuccaste!
Cu nuje staje bbona! ’E bbraccia ll’arapiste

e te faciste fà crastule craste…
E mmo, mo staje scuntanno ’e peracotte,
ma che vuó fà… ormaje è scurata notte…

VII

E ’o cielo è cupo cupo, senza stelle
e comme a ’nu cecato senza ’o cane
mo vaje arrancanno, ’o vvi’… e, puverella,
te pienze ancora d’ ’a truvà ’na mana

ca t’accumpagna?… hê perzo ’e cerevelle
’sta mana nun ce sta… Nun c’è dimane
ormaje pe tte!… T’ànno spezzato ’e scelle:
nun puó vulà maje cchiú… fattélla ’nchiano

’sta strata ca te resta… Ma sperammo
ca almeno ’o nomme tujo, almeno chillo!,
quaccuno ’o salva… pecché, comme stammo.


i’ ’a veco nera assaje! ’Stu ppucurillo
ca nc’è restato ’e te, quant’ato dura?
Cchiú poco ’e niente, ahimmé, chest’è sicuro…

VIII

Ca comme a pigna d’uva, dalle e ddalle,
n’aceno â vota… ànno distrutto tutto…
Ànno ammunnato bbuono ’o purtuallo
e tiene mente a tte, t’ànno arredutta

sciarmata comme ô peggio sciarabballo…
e pazzianno a asso pigliatutto
ànno arrunzato e mo nun vaje tre ccalle…
E cchisto, terra mia, chist’è ’o custrutto

’e ’sti cient’anne e cchiú… Chist’è ’o finale!
’Na pucuntria cucente comme ’o ffuoco
e ’na tristezza amara ca fa male

e ca t’accedarrà a ppoco a ppoco…
Che bbrutta fine pe chi fuje riggina,
pe tte, Napule mia, che bbrutta fine!


marzo 1995
raffaele bracale
(dal vol. 'E CCOSE D''O PASSATO - ediz. Graus)