SUONNE SUNNATE

Suonne sunnate


…E a uno a uno, tutte so’ cadute
’e suonne ca facevo da guaglione…
Comme d’autunno ’e ffronne, uno muntone
’a vita ll’à arrunzate… e te saluto!

E mo sto’ cca ogni gghiuorno cchiú avveluto
ca cerco ’e me ne farme ’na raggione…
me dico: che vuó fà? chest’è ’a strazzione
chest’era destinato e tanto hê avuto…

Ma nun me ne cunvinco, nonzignore!
E comme, e santu Ddio!, manco tantillo
’e chello ca speraje cu tutt’ ’o core

’O Cielo m’êsse ditto: teccatillo?!
Eppure accussí è, accussí è stato
e so’ rummase, ahimmé, suonne sunnate!

RAFFAELE BRACALE
(dal vol. 'E CCOSE D''O PPASSATO ed. Graus)