MANNAGGIA A TTE!

Mannaggia a tte!


Mannaggia a tte!… Quanto t’amaje e quanto
e comme m’ attaccaje ore e mumente…
e tu, tu bbella, ’nzista e preputente,
me dive spavo e me mullave… e intanto

cu tutto ca me dive gioja e chianto
i’ suppurtavo e nun dicevo niente…,
passavo ’ncopp’ a tutt’ ’o malamente
e m’ abbastaje quacche vaso sultanto!

Po’ me ’nchiantaste e i’ sto’ pavanno ’o cunto…,
ma nun me so’ ’mparato! E mo te conto…
Me songo abbituato…: chist’ è ’o punto!

E ’a tanno saje che porto scritto ’nfronte?
Apprufittate! E ognuna s’ è cunvinta
ca so’ ’nu fesso, ahimmé…, pullasto e pinto!
Raffaele Bracale
(dal vol. 'E CCOSE D''O PPASSATO ed. Graus Napoli 2006)