ll'ora 'e ll'avummaria

Ll’ora ’e ll’ avummaria


I

Ora ’e ll’ avummaria… ’Mmiez’ ê cemmase
’a luce sta tignenno cu ’o turchino
’stu bbellu cielo nuosto settembrino…
’Nu viento doce vasa ’e panne spase

e all’urizzonte, pe ’na ponta ’e vrasa,
’o sole tramuntato, s’ andivina…
Ora ’e ll’avummaria… e chi cammina
ggià stenne ll’ombra soja ’nfaccia a ’sti ccase…

Pò ’o cielo se fa scuro, chianu chiano
e ’a sera s’appresenta e comme sia,
tutto se fa cchiú cupo e a mmano a mmmano

cresce ’int’ ô core ’na malincunia…
N’ ata jurnata sta vedenno ’a fine
e, ’nzieme a essa, d’ ’a vita, ’o cammino…

II

E senza remissione… Scenne ’a sera
e ccassa n’ atu rigo… d’ ’o sunetto!
E tutto passa: ’o tiempo nun aspetta,
girano sempe, d’ ’o rilorgio, ’e sfere…

e ògne tramonto porta ’a notte nera,
ògni bbella serata, ahimmé, s’ ammette
ô scuro…, â fine… pure si ’o merletto
’e ciento stelle fa c’ uno se crere

ca ’a notte è bbella… Addó?… È n’ illusione!
’A notte è nnotte: nun ce stanno sante
e quanno arriva, nun ce sta quistione…,

’o scuro fa paura a tutte quante.
Nun saje addó vaje a ferní… sî ’nu cecato
ca po' sulo ’nciampà, cadé e nient’ ato…

III

Chesto ce aspetta quanno ’a notte scenne…
e aje voglia ’e arrabbattarte, llà s’ arriva!…
Pirciò tu guodatella, finché è viva
’sta luce d’ ’o tramonto ca tentenna

e pò scumpare e ll’ aria va tignenno
cu ’o bblu d’ ’a notte… Nun te ne fa privo
ca quanno sî arrivato all’ abblativo,
pò doppo ’o cchiagne e nce refunne ’e ppenne…

ca nun ce sta cchiú ttiempo ’e turnà areto:
tutt’ ’o perduto è pperzo e te rimane,
te resta sulamente chella mèta

ca, pe destino, nun tène dimane!
Nun ’o sciupà pirciò chistu mumento!
Godete st’ ora! Appassiunatamente!

Raffaele Bracale
(dal vol. 'E CCOSE D''O PPASSATO ed. Graus Napoli 2006)