QUALU DIMANE?...

Qualu dimane?…


I

Notte d’està… ’na via ’mmiez’ â campagna…
e i’, passo passo, vaco lentamente:
dint’ ô silenzio ’e chesta notte ardente,
sultanto ’a luna tengo pe cumpagna…

Sta llà, ’ncimma a ’na cimma ’e ’nu castagno
comme a ’nu faro tunno, janco e lucente
e me rischiara ’a strata pe tramente
sultanto quacche arille canta o chiagne…

Notte d’està… E tengo unu penziero,
uno stultanto, ca nun m’abbandona
e me turmenta e nun me lassa ’e père…

E’ ’na dimanna ca, cchiù ce raggiono,
cchiú nun tène risposta e me martella
finché, ’nu juorno, nun me sbertecella…

II

Qual’ è ’o dimane mio?… Quale m’aspetta?
E m’ ’o dimanno e peggio ca ’na spina
me pogne st’ anema mentr’ i’ cammino…
Qual’ è ’o dimane mio?… E de rimpetto

’sta luna luce e pe me fà dispietto
s’ ’a ride quase… luna malandrina
ca ’o ssape, ’o ssape!, chello ca ’o destino
pe mme tène astipato e a che s’ammette…,
ma fa vedé, ’sta faccia ’e marpiona,
ca nun ne sape niente e nun m’ ajuta…
fa ’a gesuita… guarda, se n’ addona

ca i’ cerco ’na risposta e se sta muta!
’O fatto nun è ’o suojo, e a nniente vale…
ca i’ guardo e guardo: a essa nun le cala

III

Nun vô ’mpicciarse, ’a ’nfama…, luce e ppassa
tène ll’ aria distratta, fa ’a svagata…
vô fà avvedé ca sta penzanno a ato,
mentre ca invece, vène passo passo

appriesso a mme, tenennose cchiú arrasso,
ma lesa a s’annasconnere, ’nfrattata,
tra ll’ arbere d’ ’a notte, una vutata,
’ncaso si all’ intrasatte io me fermasse

pe ll’ affruntà e dirle: Cu tte parlo!…
Ferniscela ’e fà chesta angarella…
Tu tutto saje e ssaje comme ’stu tarlo

me sta pircianno dint’ ê cerevelle…
Piglia curaggio! Schieja ’sti ccarte ’nterra
e damme ’sta risposta. È pace o guerra?…

IV

A mme rispunne, oj luna, o traseténne,
o piglia n’ ata strata, n’ ata via…
e lasseme a mme sulo, comme sia,
si overo chistu fatto nun ’o ’ntienne…

Ma si tu ’o ssaje e quanto sto’ pezzenno
’o vvide e ’a vide chesta pucuntria
ca dint’ ô core percia… luna mia
mòvete a cumpassione e va’ dicenno…
meglio ’na malanova… sissignore!,
’na malanova ca caro me costa,
ca ’stu silenzio c’ avvelena ’o core…,

ca ’sta dimanna senza ’na risposta!
Tanto i’ so’ pronto: nun tengo paura…
Cóntame ’a verità. Chiaro o ’nfiura!…

V

Ma chella ’mpesa tutto à ggià capito
e addó voglio arrivà… e nun le sona…
E ggià ca nun ’a tène ’a ’ntenzione
’e se ’mpignà cu ’a vocca… mo è sparita,

scumparza ’e brutto e comme a n’ eremita
mo stongo sulo sulo… P’ ’o stradone
s’ è ffatto ’o scuro… manco ’nu lampione…
E ll’ aria coce comme a ’na ferita!…

Notte d’està!… Chiagneno ancora ’arille
e i’ vaco ancora passo passo e tengo
chistu penziero ca martella e assilla…

E nun ne vengo a ccapo, nun ne vengo!
E chi forze sapeva, se ricusa
tenennome ’o ddimane mio, annascuso!
Raffaele Bracale
(dal vol. 'E CCOSE D''O PPASSATO ed. Graus Napoli 2006)