SULO PE MME...

Sulo pe mme…


I

Nuttata ’e fine ’austo… Tiene mente
che lluna ’mmiez’ ô cielo s’è allummata…
Pare ’na gran signora ’ntulettata
cu ’nu vestito ’e raso stralucente…

Sta llà cuntenta e pare ca nun sente
ll’ afa ca manco ’e notte s’è calmata…
e zennianno ’a coppa, sta priata
’e ’sta marina ch’è tutta d’argiento…

Notte d’austo: e fragne, a rriva, ’o mare
friccechianno quanno vasa ’arena
e, ’int’ ô silenzio, pare quase, pare

ca canta pe ’sta bella luna chiena…
e canta ’na canzona ca cunzola
’ncopp’ a ’nu tiempo doce ’e barcarola!

II

Notte lucente… E ’a copp’ a ’stu balcone
i’ sto’ chiammanno chi nun me risponne…
se pèrdono ’e pparole meje cu ll’ onne
e ’o nomme sujo se ’ntrezza cu ’a canzone

ca saglie da ’sti scoglie… e marpiona
’a luna sente tutto e tonna tonna
manch’ essa se ne cura… e i’ ce refonno
’o tiempo e ’a serenata… ’Nu lampione,

llà bbascio, segna ll’ angulo d’ ’a via
’a do’ êsse ’a spuntà chella ’e ’na vota…
e invece: niente!… N’ anema ca sia

nun passa pe ’sta strata. E ’a galiota
nun sente ’stu pparlà ch’ è amaro e ddoce
nun sente ’o mare, nun sente ’sta voce…

III

S’ è aizato ’o viento a dirme: Che peccato!
’o mare canta e tu chiammanno staje,
ma si nisciuno sente, che ne faje…,
ma che ne faje ’e ’sta bbella nuttata?

Tutt’ è perduto, ’o vvi’, tutt’ è sprecato
e ca tu chiamme e ccante è chiaro ormaje
ca so’ pparole perze e ttu ’o ssaje
pure si dice: A ’nu mumento a n’ ato

’a veco ’e accumparé…, fatte capace:
nun torna pe ’sta via… Cagna penziero:
s’ è alluntanata… miette ’o core ’mpace

ca ’o fatto d’ ogge nun è chillo ’e ajere…
Sparagna ’o sciato ca nun serve a niente,
e ca tu parle o cante, è inutilmente!



IV

E i’ le rispongo: Embè si chesta è ’a vita,
si essa nun sente e â luna nun le ’mporta,
cu chi t’ ’a vuó piglia… Chesto vô ’a sciorta
e contro â sciorta nun ce sta partita…

Forze aje raggione tu: ll’ aggiu capita…
nun spuntarrà maje cchiú ’a chella porta…
comme si fosse, pe me sulo è mmorta,
nè ’a luna ’a vô sanà chesta ferita…

’O ssaccio! Ma cu tutto chesto, ’o stesso
me va ’e cantà e chiammarla, chella ’mpesa…
pure si è cchiaro ca me faccio fesso

e ca nun vène a farmela, ’a surpresa…
E pe dispietto (o pe malincunia?…)
canto sulo pe mme e accussí sia!…
Raffaele Bracale
(dal vol. 'E CCOSE D''O PPASSATO ed. Graus Napoli 2006)