CESENA – NAPOLI (26/09/10) 1 A 4 Ll’aggiu vista accussí.

CESENA – NAPOLI (26/09/10) 1 A 4 Ll’aggiu vista accussí.

Bello,eccezziunale, ‘a fine d’ ‘o munno, accussí avesse vattiato ‘o Napule si ‘a partita fosse accumminciata ô 60° minuto. Pecché, dicimmoce ‘a verità, rialajemo â squatra cchiú sfelenza e scadente ca nsino a mmo âmmo affruntato n’ora e ‘n gollo (ma chella puzza ‘e Damato ce mettette ‘a mana soja...),e è naturale ca io nun riesco a ffà zumpe ‘e cuntentezza soprattutto penzanno ca poco c’è mancato ca nun me ‘ntussecasse ‘e strangulaprievete a rraú e ‘a brasciola ‘e locena ‘mbuttunata, ‘e patane fritte, ‘a piccola pasticceria e ‘o bicchieriello ‘e aglianeco. Pe bbona sciorta fernette comme maje cchiú penzàvamo ca fernesse, ma resta ‘o fatto ca Sosa e Yebdà so’ dduje uggette misteriuse e ghiucature senza forza, carattere e senza perzunalità,... ‘mmece Cribari rispetto a ll’ati dduje facette ‘nu bbuono primmo tempo(facimmo ca avessemo, finalmente truvato ‘o centrale ca ce serveva, visto ca avimmo vennuto a Rinaudo ca ajere ssera a Ttorino à fatto ‘nu partitone?). Facimmo ca avessemo, finalmente truvato ‘o centrale ca ce serveva pure si cu ‘nu paro ‘e ammenesie ca ggià se sapevano e comunque ‘ncopp’ô gollo nun tenette tutt’ isso ‘a corpa pe ‘nu pare ‘e bbuone mutive: uno, maje puteva penzà ca ll’arbitro avesse permiso a Schelotto ‘e pigliarlo a cauce, mentre isso pruteggeva ‘a palla e passà ‘o pallone a chillo ca signaje; ddoje, maje puteva penzà ca De Sanctis se facesse passà ‘o pallone pe sott’ê ccosce e nun ‘o parasse!Tutto chesto p’ ‘a primm’ora; po ce so’ state ‘o ritorno ‘ncampo d’ ‘e titulare overe (pure si Mazzarri dice ca so’ tutte titolare...) e ‘o Napule sviluppaje ‘a bbella cosa ‘e ll'urdema mezz'ora,ma chella ca**a ‘e primma ora à cunfermato tutte ‘e dubbie mieje ca mo so’ certezze e cioè ca arreto a ll’ unnice titulare (levanno Cribari e Zuniga) nun ce sta nisciuno, nisciuno nisciuno o quase........e nasce ‘na grande arraggia pecché,come dico ‘a tiempo,visto ca ‘a cumbriccola ‘e Dela, Mazzarri e Bigoncino êva deciso ‘e sfultí ‘e ranghe (levannose però ‘e bbunarielle...)fosseno avastate tre acquiste ‘e qualità (uno pe rruolo) pe ffà crescere ‘o Napule e cu ‘a squadra titolare nun ce fossero mancate ‘e suddisfazzione contro ttutte quante visto ‘o livello tieneme-ca-te-tengo ‘e ll’ati cusiddette granne d’ ‘o campionato.
Cumunque mo, ammeno nsino a ggioverí a a ddummeneca ca vène, quanno ‘a chesta parte sbarcarranno Totti e cumpagne (ca tenono sempe ‘o dente avvelenato e vanno ascianno scescé...) gudimmoce chesta ‘mpresa stralucente custruita dô Napule e vulesse arricurdà ca Gargano sta criscenno e sbagliaje assaje cchiú poco d’ati vvote jucanno ‘e primma, tuccanno ‘a palla ‘na vota e vvia e accussí facenno riuscette a mannà ‘mporta ‘e cumpagne;bravo accussí!
Cavani gruosso assaje, Lavezzi micidiale p’ ‘o gollo ca à fatto,Dossena bravo: bbuoni crosse: bellissimo chillo pe Lavezzi ca à pariggiato; à cercato pure ‘a porta ma à truvato Antonioli ch’è sempe ‘nu bbuono purtiere, viecchio e scafato ca sape ‘a Lecca, ‘a Mecca e ‘a via smaldetta e nn’ ‘o faje fesso facilmente; Marekiaro nun s’è vedette quase pe tutt’ ‘a partita, ma fuje friddo determinato e priciso ‘ncopp’ô ricore (e scusate se è ppoco!) e n’ applavuso a pparte pe Michele Pazienza ca pure durante ô primmo tempo avette ‘a fà e facette tutta ‘a fatica pure chella ca avesse avuto ’a fà ll’uggetto misteriuso Yebdà. Comme sia sia ‘e guagliune napulitane cu ttutto ca tenevano ‘ncuollo chella iettatoria maglia blu savoia(ca nun capisco ‘a do’ ca**o è asciuta fora: s’ausava ê tiempe ‘e Reja e purtava ‘na sfiga futtuta;ma pecché nun ‘a stracciano e ‘a jettano definitivamente ?...), ‘nzomma comme è gghiuta e ccomme è venuta ‘e guagliune napulitane se songo levate ‘e pacchere ‘a faccia e tirammo ‘nnante! L'Interre po s’è fermata a Rroma e ‘a classifica è ‘nu poco cchiú ccorta lascianno intatte ‘e speranze e tutte ll’ illusione. Chello ca però zompa a ll’uocchie è ca ‘o Napule joca meglio fora casa!
Pecché ‘o S. Paolo sta addivintanno ‘nu prubblema? Pecché? ‘A primma cosa ca me vene a mmente è ca a Forerotta tutte mettono pressione ê jucature e tutte vulessero vederle fà sfracielle e carneficine... Chist’è ‘o prubblema! E ‘mmece fosse meglio ca forze ô S.Paolo nun s’êsse ‘a mettere ‘o ppepe ‘nculo â zoccola d’ ‘e napulitane e accuntentarse ‘e vederle jucà cautelate, raggiunanno... Chi sa’! P’ ‘o mumento allora dicimmo ca va bbuono accussí; lassammo perdere Yebdà e Sosa,(ca secondo me so’ state pigliate ô... scasso!) e accuntentammoce ‘e Cribari ô posto ‘e Culo’echiummocannavaro e ghiammo annante!!
E mmo ppassammo ê ppaggelle:
DE SANCTIS: 5,5 – Facette atto ‘e presenza: sulo ‘nu paro ‘e vote fuje disturbbato ‘a ll’attacco d’ ‘o Cesena. Ll’unica vota seria ca avesse avuto fà vedé ch’è stato riserva dinto â nazzionale, se facette passà ‘o pallone pe ‘mmiezo ê ccosce! Se facesse benericere ‘a ‘nu moneco o ‘nu prevete ricchione!
CAMPAGNARO: 6- Nun è ancòra perfettamente ‘ncundizzione fisica e mentale; ma comunque Giaccherini nun riuscette a essere particularmente pericoloso.

CRIBARI: 6- Tutto summato abbastanza bbona ‘a partita
d’ ‘o brasiliano; si nun avesse fatto ‘na meza fessaria a vulé pruteggere ‘a palla ‘mmece ‘e jettarla fora, ll’avesse miso cchiú assaje.Doppo sittanta minute se facette sostituí pe stanchezza(‘a quase n’anno nun ghiucava...).
(Cannavaro: 5,5 ‘E stima; nun facette puttanate e pe uno comme a isso è ggià assaje!)

ARONICA: 6 Niente ‘a dicere: sempe attiento, sulo ‘na vota fuje pigliato ‘e contrattiempo ‘a Schelotto ô mumento d’ ‘o gollo cesenate.P’ ‘o riesto prova pusitiva e de qualità.

Pazienza: 7,5 Sempe priciso quanno se trattaje ‘e difennere e suggerí ê cumpagne.Êtte ‘a faticà pe dduje e nun se tiraje arreto! Quantità e cqualità cu recuperi e aperture pe ll’ esterne.

Yebda: 5 – Scadente e senza carattere, nun se capisce si è ccarne o pesce; se facette sciuscià spisso ‘a palla. (Gargano: 8 Jucaje comme me piace a mme,cu decisione, velocità e pricisione senza perdere tiempo cu tticche e ttocche inutile: N’ assisto ‘mpurtante, ‘na traverza pericolosa e tanta fatica: ‘nzomma ‘na prestazione ‘a mettere ‘ncurnice.)


Zuniga: 6,5 – Cchiú ca sufficiente ‘a prova soja; mancaje sulo ‘e lucidità dinto a ll’ urdeme vinte metre. ‘Ncumpenso (‘a granne figlio ‘e ‘ndrocchia, ca à capito tutto d’ ‘o campiunato taliano se procuraje pure ‘nu ricore favezo (ca chella puzza ‘e Damato ricalaje ô Napule, forze pe cumpenzà ‘nu ricore nun dato ô primmo tempo pe fallo ‘e mano: e ‘a chesto se vede ca Damato è ‘na puzza pecché n’errore nun cancella n’ato errore, ‘nquanto se sommano, nun se annullano ll’uno cu ll’ato! ).

Dossena: 7,5 – Finalmente ll’esterno ca ce aspettammo! Bbelli crosse: periculuse e pricise; pruvaje pure spisso ‘a cunclusione ‘a luntano; ‘a fine d’ ‘o munno ll’assisto p’ ‘o gollo d’ ‘o pareggio mumentaneo d’ ‘o Pocho.

Hamsik: 7,5 – Me ripeto: Marekiaro nun se vedette quase pe tutt’ ‘a partita, ma fuje friddo determinato e priciso ‘ncopp’ô ricore (e scusate se è ppoco!) Forze ‘a fascia ‘e capitano lle dètte cchiú responzabbilità, ma quant’ ate avessero signato cu tanta freddezza e decisione ‘o ricore d’ ‘o vantaggio ‘mpurtante.

Sosa: 4,5- Mazzarri ‘o facette jucà addó ‘o Principito nun sape, nè ppo’ gghiucà; che ne puteva surtí?
(Cavani: 9,5 – Cagnaje ‘a faccia d’ ‘a partita cu dduje golle uno cchiú bbello ‘e n’ato, (ma ‘o siconne fuje da museo) e cu ttanti ghiucate ‘e fuoriclasse! Ce ne vulessero n’atu paro comme a isso e ‘mmece ce âmma serví ‘e Sosa o ‘e Lucarelli o ‘e Bucchi: diciteme si è ‘na cosa seria...!

Lavezzi: 8 –Bbella partita: tutte ll’ azzione uffenzive d’ ‘o Napule nascettere dê scatte suje ‘mprevedibbile e fulminante; bbello ‘o gollo p’avé truvato ‘a meglia suluzzione ‘ncopp’ô crosso pennellato ‘e Dossena; peccato p’ ‘o gollo mancatoô finale; passasse cchiú spisso ‘a palla ‘mmece ‘e se n’annammurà!


Mazzarri: 5,5 (media ‘e 4 + 7): 4 p’essere curresponzabbile d’esserse levato tanti jucature (ca fora stanno jucanno a meraviglia comme ajere ssera Rinaudo a Torino...) e d’essere custretto a frijere ‘o pesce cu ll’acqua; 7 p’avé capito ch’era meglio mannà ‘ncampo ancóra ll’unnece titolare overe, visto ca ‘e siconde linee so’ scadente assaje e â fine ll’è gghiuto cu sette parme!
L’arbitro Damato 3- di incoraggiamento; ma è ‘nu chiafeo, fúceto e sciacqualattuca(incapace) e ati vvote addirittura vennuto!Turnato a diriggere ‘o Napule doppo sette mise dê ‘nguacchie d’ Udine, nun nn’ à ‘ngarrata una bbona: ô primmo tempo nun à vuluto vedé ‘nu fallo ‘e mane dint’ a ll’area ‘e Nagatomo, po nun à ammunito Aronica pe ‘na fetenzia ‘e fallo ‘ncopp’ a u Schelotto.Nun à visto ‘o caucione ‘e SChelotto a Cribari dint’ a ll’azzione d’ ‘o gollo d’ ‘o Cesena e pe cumpenzà à rialato ô Napule ‘o ricore ‘ncopp’ a Zuniga!

 prossima!
Brak