VIRZO E RRISO â NAPULITANA

VIRZO E RRISO â NAPULITANA

Assodato apprimma (premesso) ca a Nnapule s’ausa poco ‘o riso ‘a fora ca p’ ‘o sartú,virzo e rriso, riso e ppatane e sulo ‘a poco riso â piscatore assodato apprimma chesto ‘sta vota parlammo proprio ‘e ‘na ricetta antica che è appunto virzo e rriso ca fuje ‘nventata pe ffà ‘nu menestone puveriello e sparagnà ‘e ausà troppa rrobba (patane, fasule, accio eccetera) e accuntentarse sulo ‘e ‘nu bbellu virzo majateco (grande).
Venimmo â riggetta, ca si è cucenata a mmestiere mettennoce tutto chello ca ce vo’(accummincianno dâ ‘nzogna e dê ccotene) è sapurita assaje e aggarba ‘a vocca e ‘o vernecale.

Chello ca ce vo’ pe sseje perzone

‘nu bbellu virzo majateco (grande) ‘e seje o sitticiento gramme,
- miezu chilò ‘e riso
- ‘nu spiculo d’aglio spugliato e ntretato,
- ‘na cepolla rossa ammunnata e ntretata,
- duiciente gramme ‘e cotena ‘e prusutto fiammiggiata, tagliata a strisciulelle quanto a ‘nu dito, lavata e sculata,
- ‘nu cucchiaro ‘e ‘nzogna,
- miezu bbicchiere d’ uoglio ‘auliva stravergine primma spremmuta a ffriddo,
- ciento gramme ‘e scorze ‘e pruvelone piccante d’ ‘o monaco crastïate (ben raschiate) e mmise a mmollo dinto a ‘na ciutulella d’acqua cauda,
- ‘na farínula (un dado) pe broro veggetale,
- cinquanta gramme ‘e furmaggio pecurino tagliato a ffarínule piccerenelle,
- sale fino e ppe peniro macenato a ffrisco quanto ve piace

Comme se prepara:

Dinto a ‘na capace cazzarola pruvvista ‘e cupierchio,a ffuoco sustenuto, mettitece ‘a ‘nzogna e ll’uoglio e aunitece cepolla e aglio ntretate e facitece suffrijere‘e strisculelle ‘e cotena ‘nfunnennole cu ‘nu bicchiere d’acqua vullente fino a cche nun songo bbelle ‘ntennerute . Quanno so’ ccotte e ‘o zuffritto è divintato bello jumnno junno, avasciate ‘o ffuoco e menate dint’â cazzarola ‘o virzo precedentemente tagliato a strisciulelle e lavato. Cummigliate cu ‘o cupierchio e lassate cocere mmiscanno ògni tanto,sempe a ffuoco vascio.
A mità cuttura aunite ‘e ffarínule ‘e furmaggio pecorino e ‘e scorze ‘e pruvelone d’ ‘o monaco crastïate (ben raschiate) e mmise a mmollo dinto a ‘na ciutulella d’acqua cauda;
quanno ‘o virzo è quase cuotto,allungate ‘na ciotola e mmeza d’acqua vullente addó avite sciugliuto ‘a firinula e bbroro veggetale, ammiscate e menate ‘o riso sciacquato e purtatelo a ccuttura pe scarze vinte minute.
A ttutta cuttura avasciate miccio miccio ‘o ffuoco, scummigliate ‘a cazzarola e lassate repusà ‘stu virzo e rriso pe ccinche minute e primma ‘e servirlo mmacenatece ‘a coppa paricchiu ppepe niro.
Pe cunziglio: nun ghittate ‘e scorze d’ ‘o pruvelone, ma ‘na vota ca ll’avite bbuono bbuono crastïate (ben raschiate) astipatavélle dint’ô fricorifero arravugliate dinto a ‘na mappina ‘nfosa, ca pònno sempe serví!
Vino: asciutte e prufumate janche ( Solopaca, Capri, Ischia, Falanghina, Fiano, Greco di Tufo) fridde ‘e fricorifero.
Mangia Napoli, bbona salute! E scialàteve!
Raffaele Bracale Brak