NAPOLI – LAZIO 03/04/11 4 A 3 LL’AGGIU VISTA ACCUSSÍ

NAPOLI – LAZIO 03/04/11 4 A 3
LL’AGGIU VISTA ACCUSSÍ
Eccuce cca. Ajere è ffernuta comme avev’ ‘a ferní cu ‘o Napule a magnarse ‘a Lazzio ‘e ‘na manera o ‘e n’ata. E cchesto putimmo dicere: ca ‘o Napule à fatto ‘o duvere suĵo e ca ‘a sciarpa d’ ‘o Napolista porta bbuono. Chi nun à fatto ‘o duvere suĵo è stata ll’Interre ca sapato a ssera contr’ô Milanno nun ce steva proprio e siconno me ‘a partita ‘e Milano era ‘na pastetta cumbinata...Nun me meragliasse si ll’anno ca vène Etoò jucasse cu ‘o Milanno... Pe cquanto riguarda ‘o Napulo aggiu sentuto ‘e fessarie ‘e Lotito e de quacche pennarulo e aggiu liggiuto ‘e ssolite esaggerazzione sia ‘mpusitivo ca ô ccuntrario...; pe mme ajere ‘o Napule à vinciuto cu ‘o core , comme tant’ati vvote e ce putimmo permettere ‘o lusso ancòra ‘e sunna; ‘e ssituazzione ca parevano girarce contro antrasatta cagnajeno direzzione, s’avutaje ‘o viento e se vincette cu ‘nu Cavani senza pietà,ca êsse pututo arrutunnà a cquatto ‘e golle si chella fetenzia ‘e ll’arbitro avesse cecato a vvedé ca dint’ô recupero Diasso ‘o diferzore caprone ll’aveva abbracciato e trascenato ‘nterrà... P’ ‘o riesto cierte nun ànno jucato ‘nu granché o comme m’avesse aspettato, ma paricchi erano reduce dê fatiche d’ ‘e nnazziunale lloro e se sape ca ‘e soste nun ce avvantaggiano maje! Pe gghionta ‘e ruotolo faceva ‘nu càvero esaggerato e pe cchi à dda rimuntà nun è ccerto ‘nu vantaggio specie cu ‘na squatra comme â Lazzio cu cquatte difenzure appustate, ca spisso addeventajeno seje...; cumunque ‘nu fatto è ccerto mancano sulo sette partite, ll’Udinese à pigliato ‘na vertulina (una bastonatura) dô Lecce, e stammo viaggianno â media ‘e duje punte a ppartita,e ‘sta cosa nun po’ essere ‘nu fatto stucastico (casuale) comme diceno cierte pennarule (nurdiste) aucielle ‘e malaurio; (è dâ primma jurnata ca vanno dicenno ca ‘nu mumento a ll’ato ‘e napulitane ponno fisicamente scuppià e ‘mmece ‘e guagliune puntualmente fernesceno ‘e ppartite ‘ncriscenza); comme ce sta quaccuno ca sustène ca ll’arbitre ce avvantaggiano pe bbia d’ ‘a televisione.... A ll’anema e d’ ‘a palla! Aggi’ ‘a arricurdà a ‘sti pennarule scurdarielle ca quanno nun ce stévano tanti telecammere ‘a juventussa arrubbava a mmeglio a mmeglio e nisciuno vedeva niente (certamente chi tene ‘a varva janca comme a mme s’arricorda ‘e ‘nu certo arbitro terpin che dètte n’inesistente ricore â juventussa a ttiempo abbundandemente scaduto pecché ‘nu mariuole ‘e jucatore jancoenniro ‘nciampecaje dint’ô pallone caqdenno ‘nterra a ppe isso cu ‘o primmo avverzario luntano allimmeno cinche metre... E ce crero ca po nun ‘o facettero cchiú siscà!) Ma lassammo perdere e turnammo a nnuje. Vedimmo ‘e ppaggelle:
DE SANCTIS 5,5: Avette, si vulimmo ‘na solo corpa ‘ncopp’ê golle lazziale, chella ‘e ‘nu trattènere ‘nu pallone ca po Aronica menaje dint’â porta luvarda... ma me facette correre ‘o friddo p’ ‘e ccarne sbaglianno n’asciuta aveta. Niente putette farce ‘ncopp’ ô tocco ‘e ponta esterna ‘e Mauri ca custaje ‘o primmo vantaggio janco-celeste. Rummanette surpreso dâ deviazzione ‘a vicino e nun cuntrastata ‘e Diasso.
ARONICA 5: Troppo affechienzato (precipitoso) cu chillu maleditto autogollo arresecaje ‘e cumprumettere tutt’ ‘a partita d’ ‘e suĵe... ‘Mpurtante ‘na diacunale ‘ncuollo a Zarate, ca ajutannose(nun visto ‘a ll’arbitro) cu ‘na mana riuscette a cunchiudere ll'azzione,ma pe ffurtuna De Sanctis ce stette!.Doppo d’ ‘o sfurtunato autogollo se facette annante ‘ncopp’â curzia cercanno d’affrancarse (di riscattarsi).

CANNAVARO 4: È ‘nu guajo passato! Tène ‘ncopp’â cuscienza ‘o primmo e ‘o siconno gollo d’ ‘a Lazzio.Suffrette assaje ‘a velocità ‘e Zzarate e ‘e ‘ntrusione ( gli inserimenti) ‘e Mauri. E ssí, arricurdànnoce bbuono, culo'echiummo n' a' ppoco a Mmauri, p' 'o fà passà le stennette 'o tappeto russo e cu Diasso nun pruvaje manco a cuntrastarlo 'e capa!
.Ll’unica cosa bbona ‘e tutt’ ‘a partita fuje ca lle jette a dderitto ‘a sponna ca po facette nascere ‘o ricore ‘e Cavani e ‘a sterrafinata (l'espulsione)’e Biava.
CAMPAGNARO 6: Sulo e ddesulato fuje spisso spisso abbandunato ô destino suĵo dê socie e se ll’êtt’ ‘a vedé cu tutte ll’attaccante lazziale; ‘nu paro ‘e attacche cunnite cu ‘nu tiro spaventajeno ‘a difesa lazziale. Perdette pe distrazzione ‘nu pallone periculuso(era ll’urdemo ommo...), ma fortunatamente Sculli servette Zarate ca steva ‘nfuorjuoco.
DOSSENA 6.5: ‘A fora d’ ‘o gollo ca riappicciaje ‘o San Paolo e ‘e luvarde pure assaje fatica ‘e smestuta (di spinta).
(Dô 32°st GARGANO 6: Andivinato ll’effetto (l'impatto) ‘ncopp’â partita.)
YEBDA 5.5: Troppo ‘mpriciso ‘nfase ‘e costruzzione. Soprattutto ô primmo tempo nun assicuraje ‘o nicessario filtro ‘mmiez’ ô campo.
( Dô 39°st LUCARELLI 6: N’azzeccata capata soja facette nascere ‘o gollo d’ ‘o quatto a ttre definitivo).
PAZIENZA 6-: Lassaje ‘nu poco troppo scummigliata ‘a difesa e fuje pigliato ‘mmiezo ‘nfra Brocchi e Mauri pure pe corpa ‘e Yebdà e Marekiaro ca nun ‘o dettero ‘na mana... (Dô12° st MASCARA 6- : Dette qualità e ‘mpunderabbilità (imprevedibilità) â manovra; ‘nu peccato murtale chillo ‘e avé sbagliato ‘nu gollofaccia a ffaccia cu Muslera ‘ncopp’ô doje a ddoje, gollo ca avesse pututo rennere ‘e ccose cchiú facile).
MAGGIO 6.5: ‘O solito muturino ‘ncopp’â curzia ‘e dritta. Nun parette ca risentesse d’ ‘e ffatiche cu ‘a nazziunale prupunennose cu puntualità, ma arrivaje annigliato (poco lucido) ô mumento dicisivo ‘e ll'azzione. Se riscattaje facenno ‘nu capolavoro cu ‘na sponna ‘ntelliggente assaje p’ ‘o Matadorro ca mettette dinto ‘o doje a ddoje!
HAMSIK 6.5: Dint’ ô primmo tempo fuje sfaticato e ‘ncuncrudente ‘a fora ‘e ‘na granna cuncrusione neutralizzata ‘a Muslera ‘ncornerro. Marekiaro truvaje ‘e ccose cchiú ‘nteressante ô siconno tempo.Assaje bbella e de sustanza ‘a diacunale dinto a ll’aria ‘e ricore luvarda cu Zarate oramaje sulo annante a De Sanctisso!
Dint’ â ripresa trasette cu n’ato atteggiamento e ‘a manovra napulitana addevintaje cchiú llustra.
LAVEZZI 7- : Per novanta minuti l'unica manera ca ‘e jucature d’ ‘a Lazzio trovajeno pe fermarlo fuje ‘o fallo sistematico... e Banti ‘nzerraje sempe tutt’ ‘e dduje ll’uocchie... Fuje sempe l'aco d’ ‘a valanza e ll' ommo cchiú ‘mprevedibbile d’ ‘e luvarde.
CAVANI 8: Jucaje comme sape sulo ô siconne tempo, ma – benedico! – facette ‘a terza tripletta ‘ncampiunato e ‘na freddezza ‘e cannuniere ‘e razza. Trascinaje ‘o Napule ô siconno posto e cu chesta media realizzativa putimmo ancòra nun sulo sunnà certi traguardi, ma tenerle overamente a mmanese!Peccato ca cadette dint’â rezza d’ ‘a pruvucazzione e ascette a chi sî ttu e cchi song’ i’ cu ‘nu deliquente comme a Sculli abbituato a menà ‘a pretella e annasconnere ‘a manella..., cuncrusione s’abbuscaje ‘nu cartellino jalizzo ‘a Banti ca chello steva aspettanno e ‘o Matador mancarrà dummeneca ca vène a Bbologna...
’A lezzione ‘e Lavezzi nun le servette, ma pure ca lle fosse servuta, Banti cumunque ll’êsse ammunito... c’era venuto pe cchello!
All. MAZZARRI 7: Soprattutto dint’ ô primmo tempo ‘o cullega Reja vincette ‘a sfita tattica; epperò ‘o livurnese/napulitano aveva dato tale ‘na perzunalità e cumbattività ( grinta) â squatra ca ‘e guagliune suoje surpassanno ‘e scheme jettajeno ‘o core dint’â trincera nemica lla addó e cquanno parevano cundannate; e ‘a benemerenza (il merito) è soprattutto d’ ‘o misterro, ca dint’ô mumento cchiú scuro e cquanno parette stessero pe sbracà,riuscette a tirà fora dê suoje ‘o massimo ‘e cumbattività.
L’arbitro BANTI 3 Overamente 'na granna fetenzia cu 'e nnucchetelle:scuntentaje a ttutte; permettette ê lazziale 'nu juoco allarmante ( intimidatorio) e viulente soprattutto ‘ncuollo a Lavezzi senza sanziunarlo maje; prassempio Diasso s'êsse avuto caccià fora doppo quarantaseje siconne,p’avé, reaggenno, cauciato ‘mpietto a Marekiaro pe ‘nu nurmalissimo fallo ‘e juco; jammo annante: nun vedette 'o gollo 'e Brocchi e pe furtuna d’ ‘a Lazzio trenta siconne doppo Aronica smarrunaje e facette l’autogollo...; teneva puntato a Ccavani e ll’ammunette p’avé risposto a ‘na pruvucazzione cuntinua ‘e cchella carogna ‘e Sculli; nun vulette vedé durante ô recupero tanto ‘nu ricore ‘ncuollo a Cavani afferrato e tirato ‘nterra ‘a chella crapa ‘e Diasso!
E ‘nchiudimmola cca ringrazzianno ‘sti guagliune pe ll’emozzione ca ce ànno dato e p’ avé vinciuto n’ ata battaglia vinciuta cu ‘o core e cu ‘o carattere! Forza Napule e FANCE SUNNÀ ANCÒRA. Ce sentimmo.
R.Bracale Brak