SCIORBA ‘E FUNGE E PPATANE

SCIORBA ‘E FUNGE E PPATANE
Chesta antica sabbrosa sciorba cuntadina è adatta p’ ‘e mise ‘e vierno
Chello ca ce vo’ pe sseje perzone
6 gruosse funge purcine, pulezzate e ttagliate a fellocce p’ ‘o lluongo,
600 gramme ‘e patane vecchie ammunnate e ttagliate a ppacchetelle e lavate,
‘nu buccacciello ‘e ‘nu quarto ‘e fasule cannelline arvate,
‘nu cucchiaro ‘e ‘nzogna,
½ bicchiere d’uoglio ‘auliva dunciglio,
‘na cepolla ndurata ‘e Muntoro ammunnata e ntretata,
‘nu spiculo d’aglio ammunnato e ntretato finu fino ‘nziemea ‘nu tuppeto ‘e prutusino lavato e asciuttato,
6 cucchiare ‘e pignuole abbrustulute ô tiesto,
Sale fino e pepe niro mmacenato a ffrisco q.n. s.



Comme se fa

Dinto a ‘na prupurziunata cazzarola pruvvista ‘e cupierchio ricà ll’uoglio e ‘a ‘nzogna e farve a suassà a ffuoco allero ‘a cepolla.Cunfromme ‘a cepolla à pigliato culore, agnadí ‘e funge, ‘e ppatane e ‘e fasule. Accuncià ‘e sale e ppepe e lassà ‘nzapurí pe cinche minute tuiglianno dellicatamente; a chistu punto agnadí ‘nu litro e mmiezo d’acqua cauda, cummiglià ‘a cazzarola e lassà cocere pe trecquarte d’ora. Primma ‘e ‘mpiattà a ffuoco stutato ‘ncurpurà ‘nu trigliato d’aglio e prutusino e derrammà ògne ppurziona cu ‘o ccaso e ‘nu cucchiaro ‘e pignuole abbrustulute ô tiesto.Accumpagnà ‘o piatto cu fellocce ‘e pane cafone abbrustulute ô tiesto.
Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria e servute a ttiempo (temperatura) ‘e stanza pe magnà.
Mangia Napoli, bbona salute! Scialàteve, cunzulàteve ‘o vernecale e facíteve ‘a scarpetta!
Raffaele Bracale