TIELLA D’ ‘O PARZUNARO

TIELLA D’ ‘O PARZUNARO
Chello ca ce vo’ pe sseje perzone
3 pipere ammunnate d’ ‘o turzo e d’ ‘e ssemmente, lavate e tagliate a rundelle doppie ‘nu centimetro,
4 patane vecchie ammunnate, lavate e tagliate a ppacchetelle,
2 cepolle ndurate ‘e Muntoro ammunnate, lavate e tagliate a rundelle doppie ‘nu centimetro,
2 pastemache ammunnate d’ ‘o turzo, rattate e tagliate a rundelle ‘e miezu centimetro,
100 gramme d’aulive ‘e Gaeta desciusciate,
600 gramme (piso lisso =peso netto) ‘e cemmetelle ‘e vruoccole ‘e fronne ammunnate e lavate,
‘nu bicchiere d’uoglio ‘auliva dunciglio,
dduje spicule d’aglio ammunnate e ntretate finu fino,
‘nu cerasiello percante (piccante)lavato, asciuttato e grabbato (inciso) p’ ‘o lluongo,
150 gramme ‘e casopecurino staggiunato rattato finu fino.
sale duppio ‘na vrancata e ‘na presa,
pepe janco macenato a ffrisco q.n.s.,


comme se fa
Ricà ll’uoglio dinto a ‘na prupurziunata tiella ‘e fierro niro pruvvista ‘e cupierchio, farle piglià calore a ffuoco allero ‘nzieme ô cerasiello percante; appena ll’uoglio è bbello caudo frijerve apprimma ‘e pipere, po ‘e ppatane e all’urdemo cepolle e pastenache e mantené ‘ncaudo; fraditanto dinto a ttre llitre d’acqua vullente salata (vrancata ‘e sale duppio) àrvere teniente teniente ‘e cemmetelle ‘e vruoccole ‘e fronne ammunnate e lavate, scularle e revacarle dint’â tiella ‘nzieme cu tutt’ ‘o riesto d’ ‘e verdure; agnadí ‘o ttrigliato ‘e spicule d’aglio e ll’aulive. Accuncià cu ‘na presa ‘e sale duppio e tantu ppepe quanto ne piace, avascià ‘o ffuoco, ‘ncupirchià ‘a tiella e fà cocere ancòra pe ‘nu quarto d’ora, agnadenno ‘nu poco d’acqua cauda si ‘a tiella s’êss’ ‘a asciuttà troppo.Serví cauda ‘e fuculare chesta tiella d’ ‘o parzunaro derrammata abbunnantemente ‘e caso pecurino staggiunato rattato finu fino.
Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute! Scialàteve e cunzulàteve ‘o vernecale!!
raffaele bracale