MUZZARELLA ‘MPANATA E FFRITTA

MUZZARELLA ‘MPANATA E FFRITTA Chello ca ce vo’ pe sseje, otto perzone: ‘nu kilò e duiciento gramme ‘e muzzarella ‘e vufara tenuta dint’â jacciaja dudece ore e ppo tagliata a ffelle doppie ‘nu centimetro e mmiezo, 400 gramme ‘e mullica ‘e pane casareccio arruscata ô tiesto a 220° e ppo ntretata cu ‘nu mmiscratore, 100 gramme ‘e caso pecurino rattato finu fino, 5 ova, 100 gramme ‘e farina, abbunnante uoglio pe frijere. Comme se fa Appruntà ‘a mullica ‘e pane casareccio arruscannola ô tiesto a 220° e ppo ntretannola cu ‘nu mmiscratore;mettere ‘sta mullica arruscata dinto a ‘nu piatto e ammiscarla cu ‘o ccaso pecurino rattato finu fino.Sbattere ll’ova dinto a ‘na ciotola; tirà fora d’ ‘a jacciaja ‘a muzzarella asciuttata e tagliarla a ffelle doppie ‘nu centimetro e mmiezo; mettere a ffuoco allero allero ‘na tiella a sponne aute e fà callentà ll’abbunnante uoglio pe frijere; fraditanto ‘nfarenà ‘e ffelle ‘e muzzarelle, ‘nfonnerle dint’ a ll’ove sbattute e ppo dint’â mullica ‘e pane ammiscata cu ‘o pecurino e frijere pe ttre minute una â vota ‘sti ffelle ‘e muzzarella; scularle cu ‘na ‘spumàdera sistemannole ‘ncopp’â carta asciugante e servirle ‘ntavula comme trasetura ancòra caude ‘e fuculare accumpagnate cu ‘na ‘nzalatella fresca ‘e rafanielle e de ‘ncappucciata cunnita cu ssale fino,pepe janco mmacenato a ffrisco, uoglio’auliva dunciglio e acito o limone. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! Raffaele Bracale