VERMECELLUNE PERCANTE CU ZUMPAGLIATA ‘E RUCOLA

VERMECELLUNE PERCANTE CU ZUMPAGLIATA ‘E RUCOLA Chello ca ce vo’ pe sseje perzone: 600 gramme ‘e vermecellune, 1/2 bicchiere d’ uoglio ‘auliva dunciglio, ‘nu cucchiaro abbunnante ‘e ‘nzogna, Dduje spicule d’aglio ammunnate e ntretate finu fino, ‘na vrancata ‘e sale duppio, pepe janco mmacenato a ffrisco q. n. p., 200 gramme ‘e cosce ‘e quaglia (gherigli di noci). P’’a zumpagliata ‘e rucola Dudece mazziette ‘e rucola percante, ‘Nu bicchiere e mmiezo d’ uoglio ‘auliva dunciglio, ‘o zuco passato a culaturo ‘e ‘nu limone ‘e Surriento, 100 gramme ‘e cosce ‘e quaglia (gherigli di noci). 50 gramme ‘e pignuole arruscate ô tiesto, dduje spicule d’aglio ammunnate e ntretate finu fino, sale fino e pepe niro mmacenato a ffrisco q.n.s.. Comme se fa S’accummencia appruntanno ‘a zumpagliata ‘e rucola: ammunnà e lavà ‘a rucola scartanno ‘e streppune troppo lunghe e ttuoste; mettera ‘a rucola dinto a ‘nu mmiscaturo cu ssale fino, pepe niro mmacenato a ffrisco, ‘nu bicchiere e mmiezo d’ uoglio ‘auliva dunciglio, ‘nu cucchiaio di aglio ntretato e ‘o zuco ‘e limone passato a culaturo, ‘e cosce ‘e quaglia (gherigli di noci) e ‘e pignuole arruscate ô tiesto.Siffulà e tené a pparte ‘sta zumpagliata ‘e rucola. Arvere ‘e vermecellune dinto a otto litre d’acqua vullente salata (vrancata ‘e sale duppio); scularle vierde vierde,e mantenerle ‘ncaudo.Quanno songo ancòra a mmeza cuttura ricà dinto a ‘na prupurziunata tiella ‘o miezu bicchiere d’ uoglio ‘auliva dunciglio,‘o cucchiaro abbunnante ‘e ‘nzogna e ‘e duje spicule d’aglio ammunnate e ntretate finu fino,e a ffuoco allero fà piglià culore a ll’aglio; appena so’ ppronte agnadí dinto a ‘sta tiella ‘e vermecellune arvate e dduje cucchiare ‘e zumpagliata ‘e rucola, ammiscà e tené tutto a ffuoco allero pe tre minute; vernicià cu ‘o riesto d’ ‘a zumpagliata seje piatte accuppute, arravuglià a nnivo ‘e vermecellune e pusiziunarne ‘nu paro p’ògne piatto; derrammà ‘ncopp’ a ‘sti nive abbunnante pepe janco mmacenato a ffrisco, e ‘e ccosce ‘e quaglia ntretate. Serví ancòra caude ‘e fucularo chisti vermecellune percante. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! Raffaele Bracale