TREGLIE Ô TIESTO

TREGLIE Ô TIESTO triglie al forno Nota Se tratta ‘e ‘nu piatto facile,tassuso (veloce) e sabruso. chello ca serve pe 6 perzone 12 treglie ‘e morze, miezu bicchiere d’uoglio ‘auliva dunciglio, ‘o zuco, passato a cculaturo, ‘e duje limune ‘e Surriento, ‘nu cucchiaro d’arecheta secca, sale duppio cunnito q.n.s. comme se fa Pulezzà ‘e treglie levanno tutt’ ‘e scame, capa, coda e spine; spàrtere ognuna p’ ‘o lluongo facennone dduje sulumiglie, lavarle e asciuttarle. Auntà cu ddoje dete d’uoglio ‘na cummedità bbona p’ ‘o tiesto e metterce dinto tutt’ ‘e sulumiglie uno vicino a ll’ato; sbattere dinto a ‘na ciotola ll’uoglio rummaso cu ‘o zuco ‘e limone passato a culaturo e ‘o ssale duppio cunnito e ricà ‘sta sarzulella ‘ncopp’ê sulumiglie; cumpletà ‘a priparazzione derrammannoce ‘ncoppa ‘o cucchiaro d’arecheta. Passà dint’ ô tiesto ggià caudo (180°) e lassà cocere pe scarze diece minute.Serví caude ‘e tiesto. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e aggarbbatéve ‘o vernecale!! Raffaele Bracale