NAPOLI – A I K 20/09/12 4 A 0 LL’ AGGIU VISTA ACCUSSÍ

NAPOLI – A I K 20/09/12 4 A 0 LL’ AGGIU VISTA ACCUSSÍ È ffatta guagliú, è ffatta! Ajere cu tutto ca ‘ntribbuna ô san Paolo ce steva chillu cestariello ‘e Giggino uocchie-suorte e cu ttutto ca ‘ntribbuna divano ce steva chill’amico ca dice ‘e tifà p’ ‘o Napule, ma (pe ffà ‘nu piacere ô figlio) tene ‘nu debbulo p’ ‘a juventus(sa) e p’ ‘a Lazzio..., cu tutto chesto ajere ‘o Napule ‘ncignaje comme meglio nun puteva ll’E.L.mannannone â casa a chilli puverielle d’ ‘e micciarielle svedese chine ‘e meraviglie e cu quatte sfugliatelle dint’â guantiera! È ffatta guagliú, è ffatta! Meglio nun se puteva accummincià!’O Napule d’ ‘e siconne linie facette chello ca aveva ‘a fà. Certo ‘e micciarielle svedese fujeno poca cosa e si avesse jucato ‘o Napule d’ ‘e pprimme linie se fósse vinciuto cu cchiú larghezza, ma mo nun cercammo ‘o pilo dint’a ll’uovo e cuntentammoce, pure si ll’aggi’ ‘a dicere ca ‘o Napule nun po’ ffà a mmeno ‘mparanza ‘mmiez’ô campo ‘e Inler(ro), ‘e Dzemaili e de Marechiaro pecché Donadel(lo) sta ancòra tiéneme-ca-me-tengo,à dda magnarse ancòra paricchi zampagliune primma ‘e fà ‘na rencontra decente e ‘o guaglione belga-marucchino El-comme-saciccio-se-chiamma nun è nemmeno ‘o lazzo sciuoveto d’ ‘o papuscio ‘e Marechiaro e nn’à dda magnà pane primma ‘e ne puté piglià ‘o posto; ‘o stesso vale pe mMesto ca sí e nno po’ dà ‘a crumatina ô scarpino ‘e Maggio e nun ce illudimmo ca ne po’ piglià ‘o posto! ‘A cosa bbella d’ ‘a serata fuje ca ‘o guaglione Vargàs(so) se sbluccaje e appicciaje tre tricchi-tracche uno meglio ‘e ll’ato dànno ‘na risposta a tutte chilli femmenielle ‘ncumpetente ca dicevano ca ‘o cileno era ‘nu pacco. Uno po’ dicere ca ajere avette vita facile cu ‘e svedese ca (nun cunzideranno ‘nu pare ‘e mammune ‘e culore ca facevano ‘e bruttune) erano proprio troppo tennerielle..., ma i’ ‘o ssapevo ca ‘o guaglione se sbluccava e ca ‘stu fatto êv’ ‘a succedere primma o doppo. E succedette! Peccato ca ‘o guaglione è curto e ‘o centravanti à dda essere auto, si no quanno ‘a piglia ‘na palla ‘e capa? ‘A cosa bbrutta d’ ‘a serata fuje ‘mmece ‘a puttanata ca facette Marekiaro cu chell’ esaggerata falta ‘e riazziona ca lle custaje giustamente ‘o cartellino russo.Da ‘nu campione scafato comme a isso nun me ll’êsse maje aspettato! Passammo ê ppaggelle: ROSATI 7 Finalmente ll’anema longa ecchese Lecce fuje miso a gguardia d’ ‘a porta luvarda risultanno sempe priciso dinto a ògne ‘ntervento;sicuro dint’ê prese aute e puntuale cu n’asciuta ‘nterra â fine d’ ‘a primma mmità e addirittura dicisivo quanno ô 39° Daníelsson ce pruvaje cu ‘na conclusione dê trenta metre.I’ p’ ‘a rencontra cu ‘o Catania ‘o cunfermasse. GAMBERINI 6 Quacche sfregazzo (sbavatura)cca e lla ma ll’ecchese viola s’ ‘a cavaje sempe cu tutto ca dê pparte soje manuvraje Mutumba, prubbabbilmente ‘o cchiú agruppino (vivace) d’ ‘e suoje; cu bbona perzunalità ascette spisso dâ difesa facenno partí ll'azziona. Sujo ‘o bassurero (il suggerimento) pe Vargàs(so) p’ ‘a primma rredda. FERNANDEZ 7 Cummannaje cu mestiere e cu ‘o fisico ‘na difesa ca p’ ‘a verità nun avette troppi penziere; a ll’arranqua, dimustranno granne perzunalità ascette palla ô pere appujanno cu precisione ‘o pallone senza fà lanze a scampule ‘e cape ‘e sacicce comme ‘e ffa culo’echiummo! ‘Stu guaglione è oramaje diventato titulare dint’â nazziunale argentina ma cca nun riesce a essere pigliato ‘ncunsiderazzione ‘a Mazzarri! Misteri misteriosi. I’ p’ ‘a rencontra cu ‘o Catania cunfermasse pure a cchisto. ARONICA 6,5 Partita urdinata. Survigliaje a mmestiere ‘a zzona soja nun cuncedenno niente a nnisciuno ‘a fora ‘e ‘nu passaggio sbagliato poco primma ‘e ll’arranqua. MESTO 5 Bbubbù-bubbà se vuleva da da fà, ma nun cunchiudette niente; nun ‘o ttène; è ‘nu bleffo; aizaje pórvera nun riuscenno a ffà ‘nu cruzzo decente!Pe ghionta ‘e ruotolo nun fuje maje servuto cu precisione e s’aunette ‘a funicella corta e ‘o strummolo tiriteppo! BEHRAMI 6,5 Dint’â serata ca ‘o Napule allignaje (schierò) ‘e siconne linie cu tanti guagliune, riuscette a ffà valé ‘a ‘sperienzia soja a paricchi mumente, ricuperanno pallune e pallune e facenno tanta pressione ca mannaje ô manicomio a cchille ‘e ll’Aik. DONADEL 5 Nun ce simmo! Dimustraje ‘e nun essere ancòra overamente ricuperato; pure distribbuenno (smistando) quacche pallone e facennose sèntere ‘nfase ‘e ‘nterdizzione se vedette ca nun tene ancòra ‘a pulunéssa (brillantezza) justa . (dô 56° DZEMAILI 6,5 Oramaje è ‘na sicurezza ‘mmiez’ô campo. Presente‘nfase ‘e ‘nterdizzione, pronto a accumpagnà ll'azziona ‘nfase ‘e repartita(ripartenza). Pigliaje parte â serata ‘e festa cu ‘na bbotta d’ ‘e ssoje dô bbornio d’ ‘a cama (dal limite dell'area)). EL KADDOURI 5 Accumminciaje bunariello, ma po venette meno dint’ê mmecce, se jette annascunnenno e s’avasciaje troppo nun riuscenno a ddà qualità â manovra d’attacco. E chisto êss’ ‘a essere ‘o sostituto ‘e Marekiaro? Seh, seh: n’atu vullo e ppo se coce! I’ nun voglio riciazzà (bocciare) a nisciuno, ma ‘stu guaglione nn’à dda magnà pane! Aggio paura ca Aurelione nun s’ ‘o po’ vennere ancòra a Marekiaro! (dô 46° HAMSIK 5,5 ‘Nu punto mancante p’ ‘a puttanata fatta!Quanno era trasuto s’era appicciata ‘a luce; s’era piazzato ‘mpusizziona ‘e trecquartista lanzanno cu classe e pricisione esterne e attaccante, comme facette dint’ ‘accasione d’ ‘a terza rredda ‘e Vargàs(so). S’abbuscaje ‘nu cartellino russo pe n’aplossa (ingenua) falta ‘e riazziona e cchesto ‘nu jucatore scafato nun ll’à dda fà!) DOSSENA 4,5 ‘Nu fantasemo braduso (lento) e ‘mpriciso nun ‘ncarraje ‘nu cruzzo degno ‘e ‘stu nomme... È ‘nu guajo passato e nun ‘o vvonno capí! INSIGNE 6,5 Jucaje ê spalle ‘e Vargàs(so) bassuranno (ispirando) diverze azzione periculose. Bravo a lanzà ‘o cileno dint’ ‘accasione d’ ‘o doje a zzero. Po se mettette a ffà ‘o Cavani mettennose a disposizione d’ ‘a scuatra rincurreno pure ll’esterne svedese. VARGÀS(SO) 8 - Finalmente se sbluccaje cu tre rredde tutte ‘na vota, ma cunvincette soprattutto pe ll’atalossa cumplessivamente fatta.Sempe addó ferveva ‘o juoco (nel vivo del gioco), dettaje spisso ‘o muvimento a Insigne e se sacrificaje jenno a secutà (rincorrere) l'avverzario quanno fuje nicessario. (da ll’ 82° ZUNIGA sv) FRUSTALUPI 7,5 – Purtaje – comme a ssempe - assulutamente bbuono ‘stu vice ‘e Mazzarri ca ajere nun stette ‘mpanca pe bbia ‘e ‘na pennenza ‘e squalifica suspesa dâ passata edizzione d’ ‘a Ciampionsa. Pure mannanno ‘ncampo ‘e siconne linie ‘a scuatra allignata (schierata) nchiudette ‘a pratica senza nisciuna preoccupazione e isso preservaje ‘e titulare ‘nvista d’ ‘a traferta ‘e Catania e d’ ‘a recontra ‘nfrasettimanale cu ‘a Lazzio. l’arbitro francese Turpin 5,5 Dduje pise e ddoje mesure: largo ‘e maneca cu ‘e svedese, acatuso (fiscale, severo) cu ‘e cuane! E cu cchesto ve saluto e si dDi’ vo’ ce sentimmo ‘a semmana ca vène. Staveti bbe’! R.Bracale Brak