TRUCCE Â MULINARO

TRUCCE Â MULINARO (trote alla mugnaio) chello ca serve pe quatto perzone: quatto trucce ‘e duiecentocinquanta gramme ll’una (piso lisso) senza capa e senza coda, sventrate, spellate, spinate, lavate e asciuttate; 100 gramme ‘e ‘nzogna, farina q. n. s. ‘o zuco ‘e duje limune ‘e Surriento passato a culaturo, ‘nu tuppeto ‘e prutusino lavato, asciuttato e ntritato finu fino, ddoje prese ‘e sale duppio, ddoje prese ‘e pepe janco mmacenato a ffrisco. comme se fa Appruntà ‘e ttrucce, ‘nfarenarle, salarle e peparle dinto e ffora; fraditanto a ffuoco miccio fà accumplià ‘a ‘nzogna dinto a ‘na tiella ‘e fierro niro, e frijerve tre minute pe faccia ‘e trucce;passate ‘e seje minute agnadí ‘o zuco d’‘e duje limune ‘e Surriento passato a culaturo, aumentà ‘o ffuoco e fà peppià pe ‘nu paro ‘e minute; purziunà ‘o pesce dinto a quatto sperlunghelle caude e derrammarle cu ‘o tuppeto ‘e prutusino lavato, asciuttato e ntritato finu fino; serví caude ‘e fuculare. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Raffaele Bracale