SAMPDORIA- NAPOLI 30.09.2012 – 0 A 1LL’AGGIU VISTA ACCUSSÍ

SAMPDORIA- NAPOLI 30.09.2012 – 0 A 1 LL’AGGIU VISTA ACCUSSÍ Che bbella jurnata guagliú chella d’ajere:’a rubbentus(sa) ll’autriere aveva chiammato,cunzignanno quatto purpette â scuatra ‘e Zemàn(no), ca pe ghiella soja tène ‘na difesa ca fa schifo...e sso’ prubbleme suĵe) e ajere ‘o Napule rispunnette comme i’ speraje ca rispunnesse e cioè vincenno pure si surtanto pe uno a zzero, ca onestamente nun fuje ‘nu risultato da alliccarse ‘e mustacce, ma meglio ‘e niente visto ca ajere ‘o Napule dimustraje a ttutte quante ca ‘a squatra ce sta e ca finalmente è addeventata zucarrona (cinica) e appressurata (sbrigativa)(comme à dda essere ‘na scuatra ca vo’ vencere quaccosa...) e dimustraje a ttutte quante ca si nun po’ fà paura, nun tène paura ‘e nisciuno e nun lle puteva fà ‘mpressione ‘a scuadrella ‘e chillu traditore ‘nquacchiato ‘e sossazza (lebbra) juventina ca risponne ô nomme ‘e Ciro Ferrara. Che resate guagliú, che resate:‘a pòvera marcapitata Sampedoria d’ajere nun ce potette fà assaje e â fine perdette ‘a ‘mbattibbilità , cu ttutto ca pe bbuone sessantacinche minute êva tenuto ‘o pallino ‘mmano, tuzzanno però cu ‘e ccorne ‘nfacci’ô muro ‘e Campagnaro, Cannavaro e Gamberini, senza maje riuscí a ‘mpenzerí a Morgan(no) De Sanctis. Ô Napule avastaje unu contropiede a mmestiere appruntato ‘a Inler(ro) e ‘a mMarechiaro ca fuje stiso ‘nterra ‘a Gastaldello appena trasuto dinto a ll’area ‘e ricore sotto a ll’uocchie ‘e Tagliavento ca cu ‘nu chiappo’ncanna fuje custretto a siscà ‘o ricore p’ ‘o Napule e, ppe furtuna nosta, ‘o Matadòr(ro) Pintauro ajere nun se sbagliaje e sfurnaje ‘na riccia cauda ‘e tiesto (forno) e ttanto avastaje pe permettere ô Napule ‘e vencere ‘a rencontra, sufferta sí, ma ‘mpurtante assaje e angappà ‘a rubbentus(sa) ‘ncimm’â crassifica! Cavani,cu chest’ ata sfugliatella doppo chelle servute â Lazzio, se jette a piazzà ‘ncimma â classifica d’ ‘e cannuniere d’ ‘o campiunato.E mmo nun mettimmo lemmete â Pruvverenza! Cu ‘stu Napule cca ca s’è mmiso a ffà ll’ommo pusitivo e appressurato (sbrigativo) ca fuje siscato dê duriane , ma salutato ‘a tanti tifuse luvarde, (cuntanno pure chille ‘ntribbuna divano) cu ‘o core dint’ ô zzuccaro, cu ‘nu Napule accussí, ca po’ ancòra crescere, tutto è ppussibbile; ce putimmo aspettà qualunqua cosa! Ma nun ‘o dicimmo; anze facimmo corne e pp’ ‘o mumento cuntentammoce ‘e stà primme ‘ncrassifica pure si ‘ncunduminio. Po, comme diceva Totò :”Da cosa nasce cosa!...” Passammo ê ppaggelle va’’: DE SANCTIS 6 ‘A Samp, p’ ‘e primme sissanta minute facette bbubbú, bbubbà, ma po ‘mporta tiraje poco o niente e si nun fósse stata pe quacche punizziona, preoccupazzioni isso nun avette, e pe ‘na vota nun me ne détte a mme! CAMPAGNARO 7,5 Dê pparte d’ ‘o Toro nun se passaje; pe ll’accotto (anticipo) e ‘o puzamiento (spinta) uffenzivo fuje sempe ‘o meglio d’ ‘o terzetto. ‘Nchiusura ‘e rencontra tenette ancòra sciato e fforza pe ffarse tutt’ ‘o campo accumpagnanno ll’azziona e cercanno ‘e nchiuderla. CANNAVARO 6- Smarrunaje quacche vvota ‘nmarcatura, ma sempe senza danno riuscenno spisso a ‘ntervení ’nsiconna battuta. GAMBERINI 6,5 Centrale ritruvato,accumminciaje a guvernà ‘o centro-mancina cu bbona perzunalità. MAGGIO 5,5 Durante ô primmo aione mancaje pe ppoco ‘na rredda; po a ll’ arranqua (nella ripresa) risultaje assaje ‘stranio (estraneo) ô juoco manuvrato, forze pecché poco adatto ô nuovo tipo ‘e juoco luvardo,ca cerca ‘e vvie centrali.( Dô 91° MESTO sv) BEHRAMI 6,5 Curaggiuso e agnànimo (generoso), cumbattette nfi’ ô 90° cu tutto ca ‘nu delinquente duriano ll’êva apierto a ssanco ‘o fronte, cu ‘na malegna ampujata (gomitata)ca lle spaccaje ‘o surciglio (sopracciglio) e lle facette perdere paricchiu sanco. INLER 6,5 Faticaje paricchio dint’â schióta(ombra); perdette però ‘nu paro ‘e pallune ca uno comme a isso nun se po’ permettere ‘e perdere specie ‘int’â pusizziona soja. Però ‘o pasiglio (passaggio) a Marekiaro ca purtaje ô ricore, fuje ‘nu bisciú e ssulo dô pere suĵo puteva partí! ZUNIGA 5 Aizaje parecchia pórvera ‘ncopp’â curzia ‘e mancina e, ô ssolito, tutte chilli initule ricate (dribbling) e garabbate (ghirigori) me facetteno attaccà ‘e stentine! HAMSIK 6,5 Soprattutto durante ô primmo aione se jette annascunnenno e se chiammaje fora; pe furtuna po decidette ‘e jucà allimmeno cinche minute e avastaje ‘nu parpadío (spunto) d’ ‘e suĵe miso a ffrutto ‘a Cavani ca nun fallette ‘o ricore ca Marekiaro s’era prucurato, e se decidette ‘a rencontra. ‘O putizzo (zampino) suĵo ‘e ‘na manera o ‘e n’ata nce sta sempe. (Da ll’84° DZEMAILI s.v.) PANDEV 5,5 Doppo d’avé accumminciato linnamente (alla grande) ‘o campiunato alla grande il campionato, mo se sta affluscianno e ajere se vedette ca steva stanco. À dda faticà pe ripigliarse e forze s’avesse arrepusà ‘nu poco accummincianno ‘a ggioverí, pure pecché areto tene a Insigne ch’è ffrisco, ‘o ttene e ‘o vvo’ fà! (Dô 65° INSIGNE 6- Friccecariello e assaje cinetico (molto mobile), manca ancòra ‘nu poco ‘e perzunalità, ma è ‘na bbella rialtà e pporta pure furtuna: comme trasette ‘o Napule signaje e vincette!). CAVANI 7 Sulo p’averce fatto vencere ‘a rencontra! Miercurí ssera êva fatto bbuono tutto ‘a fora d’ ‘o ricore , ajere facette quase ‘o ccuntrario, ma chello ca conta è ‘o risultato! All. MAZZARRI 6,5 Oramaje vederlo cacciato fora nun fa cchiú maraviglia, ma fósse ora ca s’abbituasse a tenerse cionca ‘a lengua o a pprutestà cu cchiú calma. Chesto pe ‘na parte; pe chell’ata meglio accussí, visto ca cu ‘o sostituto se vence sempe! Piace però ‘a scuatra finalmente zucarrona (cinica) e appressurata (sbrigativa) ca riuscette a uttené’o risultato cchiú gruosso cu poca fatica. Vencere pure ‘a rencontra d’ajere (forze ‘a cchiú ttosta ‘e chelle affruntate nfi’ a mmo) valette quaccosa ‘e cchiú d’ ‘e tre ppunte ‘ncrassifica; valette ‘a cunvinzione ‘e puté stà addó se sta. Arbitro TAGLIAVENTO 4,5 – , Vulesse proprio vedé ‘o cummissario ‘e campo comme ll’à trattato a cchistu parrucchiere ‘e Terni (ca, comme facette a Pichino,era stato chiaramente mannato p’accurtà ‘e passe napulitane, ma nun ce riuscette pure si tentaje d’ ‘o ffà lassanno correre paricchi purcarie d’ ‘e jucature duriane delinquente patentate ca isso nun sanziunaje quase maje...). Ajeressera ‘stu ‘ntontero ( ca si fa tinture e ppermanente comme arbitraje ajere ssera... ‘e ssignore lle scippano ‘a faccia...) sistematicamente se ne futtette d’ ‘o recolamento e spisso ‘e ffalte ‘e ssiscaje ô ccuntrario; ‘o ricore, comme aggiu ditto, ll’êtt’ ‘a dà cu ‘nu chiappo ‘ncanna e pp’ ‘o riesto se facette scappà ‘a mano ‘a partita e poco mancaje ca nun fernesse a mazzate. Fosseno state nicessarie quacche cartellino jalizzo o russo ‘e cchiú spicialmente cu chilli delinquenti futtute d’ ‘e jucature ‘e Ferrara ca facettero ‘e guappe e ‘e pruvucature! Sullevaje assaje pulemiche pe bbia ca cacciaje fora a mMazzarri, ma francamente s’êss’ ‘a capí che cosa ll’ êva ditto e lle dicette Mazzarri ca nun tène pile ‘ncopp’â lengua! ‘Ncuncrusione dicimmo ca nun fuje ‘nu Napule bbello ma finalmente zucarrone (cinico) comme à dda essere ‘na granna scuatra,ca sapette aspettà ‘a raíva (la sfuriata) aggressiva d’ ‘a samp fatta cu ‘na pressiona locca (pressing forsennato).’E duriane però ce riuscettono sulo pe ‘na sessantina ‘e minute ricurrenno pure ê mmazzate e a ffalte pesante e periculuse, poco o niente sanziunate ‘a chella fetenzia ‘e ll’arbitro ca nun putette fà a mmeno d’assignà ‘o ricore ô Napule..., ma p’ ‘o riesto se chiammaje fora e se mettette ‘e mmane ‘ncopp’ a ll’uocchie e ‘ncopp’ê rrecchie pe nun vedé e nun sentí comme quanno ‘nu delinquente doriano rumpette a ssanco ‘o surciglio a Behrami cu n’ampujata assassina e isso nun sulo nun ammunette ‘o jucatore ‘e Ferrara, ma nun siscaje manco ‘a punizzione. Ma era scritto ca ajere ‘o Napule êva vencere e, fernuta ‘a raíva duriana, â primma accasione ‘a scuatra luvarda (ato ca ‘o pappavallo ‘e Lotito) comme a ‘nu falcone raivuso (rabbioso) s’avventaje ‘ncuollo â presa (preda) e nun le lassaje scampo â faccia d’ ‘o traditore, ‘nquacchiato ‘e sossazza juventina Ciro Ferrara e â faccia ‘e tutte quante ‘e duriane ca ajere jucajeno cu ‘o sanco a ll’uocchie e ‘o curtiello ‘mmiez’ê diente, manco avesseno avanzato quaccosa d’ ‘o vviecchio; nun me meravigliasse si se venesse a ssapé ca Agnelli e Fiàt(ta) ll’avevano prummiso ‘na cosa ‘e sorde si fermavano ‘o Napule! Ma se facceteno lla, anze cchiú ddinto ‘e do’ sanno lloro: nun ce riuscettono e nun ce putevano riuscí pecché ajere mmèsemo (persino) ‘a difesa luvarda dimustraje granna sabbaduría (grande maturità) a ppietto ‘e ll’anno passato, quanno ‘sti partite se perdevano o nun se vincevano! Chist’anno aggio ll’impressione e nun me vulesse sbaglià... ca ‘o Napule à capito ca contro ê ppruvinciali nun se po’ smarrunà e cchello ca conta è ‘o risultato e d’‘o riesto, míngule e ‘ntíngule,se ne po’ fà lengue e Mennellicche e cilantre (coriandoli) pe Carnevale! E mmo nun fermammoce cca; ggioverí ce s’apetta ‘a trasferta ulandese pe ll’E.L. e dummeneca e ssera arriva ô san Paolo ll’Udinese e ll’âmm’ ‘a scummà ‘e sanco! E cu chesto ve saluto. Ce sentimmo, si dDi’ vo’, viernarí e ppo llunnerí. Staveti be’! R.Bracale Brak