MEZEMANECHE D’’A STAGGIONA

MEZEMANECHE D’’A STAGGIONA Chello ca ce vo’ pe quatto perzone 400 gramme ‘e mezemaneche, ‘na cepolla ndurata ‘e Muntoro ammunnata e ntretata, 500 gramme ‘e cucuzzielle piccerille e vvierde, 100 gramme ‘e pancetta affummecata tagliate a ffarinule ‘e miezu centimetro ‘e squina, 2 bustine ‘e safrone, ’Nu bicchiere d’ uoglio ‘auliva dunciglio, 100 gramme ‘e caso pecurino rattato finu fino, ‘nu tuppeto ‘e prutusino lavato, asciuttato e ntretato finu fino, sale duppio ‘na vrancata, pepe janco macenato a ffrisco q.n.s. Comme se fa Lavà, asciuttà e ttaglià a rundelle doppie miezu centimetro ‘e cucuzzielle; ricà ll’uoglio dinto a ‘na prupurziunata tiella e a ffuco allero fà piglià culore ô ttrigliato ‘e cepolla; a ‘stu punto agnadí ‘a pancetta a ffarinulee farla suassà; agnadí ‘e rundelle ‘e cucuzzielle, allungà cu ‘o miezu bicchiere‘e acqua caudo addó so’ state accumpliate ‘e ddoje bustine ‘e safrone, ‘ncupirchià e lassà cocere pe quatto minute a ffuoco allero;fraditanto àrvere teniente teniente ‘e mezemaneche dinto a ‘na caurara cu otto litre d’acqua vullente salata (vrancata ‘e sale duppio). Scularle e revacarle dint’ â tiella e tenercele pe quatto mminute sempe a ffuoco allero, ammiscanno e derrammanno cu ‘o ccaso pecurino,e cu ‘o ppepe janco macenato a ffrisco; fora d’ ‘o ffuoco derrammà cu ‘o tuppeto ‘e prutusino lavato, asciuttato e ntretato finu fino; ammiscà ancòra e ‘mpiattà. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule! Scialàteve e facítene saluta!! Raffaele Bracale