SAMPDORIA – NAPOLI ( 24/01/16) 2 A 4

SAMPDORIA – NAPOLI ( 24/01/16) 2 A 4 ‘A VEDETTE ACCUSSÍ Tutto a pposto guagliú, putimmo essere cuntente! Ajere ‘o Napule a mMarassi vincenno, anze sbrasanno, contr’â scuatra ‘e Muntella dètte ‘na granna risposta a cchillu nnacchennello ‘e mancini e a ll’interra, ca pe pparta soja, fove fermata ‘ncasa soja ‘ncopp’ a ll’uno a uno dô Carpi e ss’arenaje a cquota quarantuno ‘ncrassifica, addó ‘a scuatra cuana (azzurra), ajere cu ‘na maglia sango ‘e puorco, se cunfermaje a cquarantasette punte ‘ncimm’â crassifica, festiggianno ‘a guantiera d’‘e cquatte sfugliatelle [ddoje ricce e ddoje frolle] cunzignata â scuatra ‘e Muntella; peccato però ca pe ddoje vote Reina nun riuscette a mmettere ‘na pezza a ddoje distrazzione d’’a trasera (difesa) nosta cuncedenno dduje stuche (gol) â Sampedoria can un se ll’êsse mmeretato pe cchello ca se vedette ‘ncampo e fforze ‘o risultato finale fove pure stritto p’’o Napule visto ca ‘o Pipita [pure signanno’o primmo stuco (gol) chillo ca sbluccaje ‘a mubbara (partita), se ne magnaje n’ati dduje a ttu ppe ttu cu Viviano ]. Pacienza! Ll’importante era ‘e vencere e sse vincette largo! Putimmo essere cuntente! Passammo ê ppaggelle: REINA 6 Pure ajere, comme dint’a ll’urdeme tre mubbare vinciute êtte recogliere ‘o pallone ‘nfunn’ô sacco. Ma nun me sento ‘e metterlo cchiú ppoco, ricurdanno doppo tre mminute ‘nu lanzo a zzuco ‘e caramella p’’o Pipita ca però ‘o sciupaje. Dico sulo peccato pecché se facette fessià dô tiro ‘e Correa e fforze êsse pututo tentà coccosa ‘e cchiú ‘ncopp’â cabbesera(testata) d’ Ederro. HYSAJ 6- Truttaje cuntinuamente ‘ncopp’â curzia ‘nchietta cu Allanno e cCagliecònno e sse facette nutà pure a ll’epata difenziva (fase difensiva).Peccato ca se facette magnà ‘ncapo da Ederro ‘nnaccasione d’’o doje a ttre! ALBIOL 6 Soprattutto p’esserse abbuscato ‘o ricore d’’o doje a zzero. P’’o riesto se facette valé ‘ncopp’a ttutt’’e pallune tairre (aerei) arresecanno niente. KOULIBALY 6- Facette súbbeto capí a cCorrea can un fósse stato ‘na passiata; cumplessivamente duje sfregazze (sbavature) durante ô primmo ajone (tempo),e n’avanzata sballata a ccentrocampo ca cuncedette ‘o primmo stuco â Sampedoria. Meglio a ll’arrancua (ripresa), quanno facette valé tutta ll’armaddia (fisico) soja. GHOULAM 5,5 Miezu zifo (voto) mancante pecché sufferette bastantemente a cCarbonero; meglio a ll’arrancua (ripresa) quanno tenette ‘a pusizziona, ma cumplessivamente ati vvote jucaje meglio. (Dô 71' STRINIC s.v.). ALLAN 6,5 Luttaje comme a ‘nu lione ‘mmiez’ô campo ‘ncopp’a ttutt’’e pallune e spisso se menaje annante; peccato ca ‘nchiudette cu ‘nu poco ‘e ritardo ‘ncopp’ a cCorrea ‘nnaccasione ‘e ll’uno a ddoje, ma cumbattette nsi’ ô prazzo (fine) senza ‘e mullà ‘nu centimetro. JORGINHO 6 Ô ssolito jucaje ‘na cifra ‘e pallune e nne sbagliaje sulo seje; s’êsse pututo sparagnà ‘a nutazziona (ammonizione)pigliata doppo sulo dudice minute; granna ‘a chiusura d’’o 33’ ‘ncuollo a Ederro. HAMSIK 6,5 Cumplessivamente bbona atalossa (prestazione) d’’o capitano, ma ‘o zifo (voto) se ll’ammeretaje soprattutto p’’o stuco (gol) fatto sguscianno ‘mmiezo a ttre avverzarie.Ce mettette pure ‘o ssuojo ‘nnaccasione d’’o primmo stuco cuano (azzurro) pecché fove isso ca safianno (pressando) a bBarreto ‘o custringette a sbaglià.. CALLEJON 6 Core e pulmune, partecipaje cuntinuamente â pressiona (al pressing);da ricurdà comme mettette Insigne ‘nnante a vViviano doppo ‘na ventina ‘e minuti e ppoco doppo quase truvaje ‘o stuco (gol) doppo splendida n’azziona d’Allan.Se chiammaje ll’applauso p’’a palla data ô 43’ ô Pipita ca però sciupaje.(Da ll'84' El KADDOURI s.v.) HIGUAIN 7 Cumplessivamente cinche stuche (gol) contr’â Sampedoria e cu cchillo d’ogge vintuno ‘ncrassifica d’artigliere (goleador) addó se cunferma primmo; doppo tre minute se magnaje ‘o stuco (gol) d’’o vantaggio, ma seje minute doppo se facette perdunà sfruttanno ‘o rijalo ‘e bBarreto e mettenno ‘a palla ê spalle ‘e Viviano; a ‘nu certo punto se facette 50 metre ‘e corza facenno cacà sotto tutt’’a trasera (difesa) duriana. Fove egoista quanno preferette cunchiudere chino ‘mmece ‘e serví a gGiorgigno dint’â camma (in area). Ma è gghiucatore can un se ne po’ ffà a mmeno e sse vedette pure ajere! Insigne 6,5 Nove stuche (gol) ‘int’â tempurata (stagione),’nu ricore forte e ppriciso ca Viviano nun riuscette a ffermà, pure andivinanno ‘a squina (l’angolo). Pure quanno se spustaje a ddritta ‘a qualità nun venette meno;ô pprincipio d’arrancua (ripresa) sprecaje ‘na bbona accasione,ma po custringette a cCassani a s’abbuscà ‘o siconno cartellino jalizzo (giallo) e ppirciò cchillu russo. E abbastaje. Bravo! (Dô 75' MERTENS 6,5 – Trasette e dint’ a ttre mminute nchiudette ‘o fullè (match). Cumprimente). Sarri 6,5 Quanno se vence, vence pure ‘o trainerre e ajere Sarri ‘ncarraje tutto. Nun po’ ca farce piacere. arbitro ORSATO 6 E fermammoce cca, cuntente ‘e chello ch’è succieso e ddannoce appuntamento, si dDi’ vo’ a ddummeneca ca vene doppo d’’o scontro casalinco cu ll’ Empoli, quanno spero ca ce levammo ‘e pacchere ‘a faccia pigliate cu ‘o pareggio d’’a mubbara ‘e ll’ affarta (andata). R.Bracale Brak