SCIORBA ‘E FAVE SECCHE E CCECORIA

SCIORBA ‘E FAVE SECCHE E CCECORIA (zuppa di fave secche e cicoria) chello ca ce vo’ pe 4 perzone 300 gramme ‘e fave secche lavate sotto a ‘nu striepeto d’acqua fredda, 600 gramme (piso lisso) ‘e cecoria ammunnata e llavata, duje spicule d’aglio ammunnato e ntretato finu fino, ‘nu puparunciello percante (piccante)lavato, asciuttato e grabbato (inciso) p’ ‘o lluongo, sale duppio ‘ddoje vranchetelle, sale fino e ppepe janco mmacenato a ffrisco q.c.n.v. ‘nu bicchiere d’uoglio ‘auliva dunciglio, 8 felle ‘e pane casareccio arruscate ô tiesto, Comme se fa Lavà ‘e ffave e metterle a bbagno pe seje o sett’ore dinto a ‘na zupperella d’acqua fredda; scularle e metterle a ccocere a ffuoco doce pe ‘nu paro d’ore dinto a ‘na cazzarola cu ‘nu litro d’acqua fredda salata cu ‘na vranchetella ‘e sale duppio;appena cotte passà tutto dinto a ‘nu mmiscratore, agnadí miezu bicchiere d’uoglio e ‘nu spiculo d’aglio, accuncià ‘e pepe e e siffulà a vvelocità sumèra (a bassa velocità)nfi’ a uttené ‘na crema críceta e malacosa; Fraditanto pulezzà ‘e ccecorie, sciacquarle e àrverle dinto a ppoca acqua accunciata cu ‘na vranchetella ‘e sale duppio; scularle e ripassarle dinto a ‘na tiella cu mmiezu bicchiere d’uoglio, ‘nu spiculo d’aglio ntretato e ‘nu puparunciello percante (piccante)lavato, asciuttato e grabbato (inciso) p’ ‘o lluongo, Regnere quatto zupperelle ‘e terracotta cu dduje cuppine ‘e crema ‘e fave e appujarve ‘mmiezo ‘na bbona frucchettata ‘e cecoria repassata; serví cauda ‘e fuculare chesta sciorba accumpagnata cu ‘e ffelle ‘e pane casareccio arruscate ô tiesto. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! Raffaele Bracale