NAPOLI – GENOA (10.02.17) 2 A 0 ‘A VEDETTE ACCUSSÍ

NAPOLI – GENOA (10.02.17) 2 A 0 ‘A VEDETTE ACCUSSÍ Tutto a pposto guagliú!Ajeressere ô san Paolo ‘o Napule paccheriaje ‘o gGenoa cunquistanno n’ata nichemata (vittoria) ‘mpurtante e ca ce vuleva visto ca ‘e tre ppunte d’ajere ce cunzentono p’’o mumento ‘e zumpà ‘a cullo ê pecurare ‘e spalletti piazzannoce ô siconno posto ‘ncrassifica allimmeno nsi’ a ddimane â mezza! Ve stevo dicenno nichemata (vittoria) ‘mpurtante pure si poco sustanziosa i arrivata sulo a ll’arrancua (nella ripresa), quanno, finalmente!, doppo ‘nu primmo ajone (tempo) [va’ a ssapé ‘o ppecché...] senza ‘a solita ajàvia (vivacità )e ccu ppoca cegna (grinta) Ciruzzo se decidette ‘e metterese a ffà ‘o spezziale e ccu ddoje jucate d’’e ssoje cunzentette primma a Zielinski (50’) e ppo a gGiaccherini (68’) ‘e mettere palla ê spalle ‘e Lamanna risulvenno ‘a prattica e assicurannoce ‘a nichemata (vittoria) ca ce vuleva e ca pareva nun vulesse vení visto ca ‘e crifune allimmeno p’’e primme vinticinche minute d’’o sibbacco (match), comme m’aspettavo, jucajeno cu ‘o curtiello ‘mmiez’ê diente mettenno ‘ndifficultà ê cuane (azzurri). Po però, arrivate a ll’arrancua, ‘o Napule accumminciaje a ffà ‘o Napule i ‘o risultato arrivaje e ppe mme rappresenta ‘nu bbuonu arcabbanno (viatico) p’’a nacchèlla (trasferta) ‘e Ciampionsa contro chillu bbrutto accunto ch’è ‘o rialmadriddo! Passammo ê ppaggelle: REINA 6,5 Miezu zifo (voto) ‘e cchiú pecché si praticamente nun êtte ‘a fà quase niente pe ttutta ‘a mubbara (partita) e ll'unica parata,manco difficile, ‘a facette ‘ncopp’a ‘nu tiro centrale ‘e Hiljemarke, ‘ncumpenso se chiammaje ll’applavuse d’’e bbemate (spalti) cu dduje pricise, granni lanze luonghe ‘e sittanta metre, cumme a cchille ca faceva Krolle! MAGGIO 7 Bbella e ssuddisfacente atalossa (prestazione) d’’o vicchiaccone nuosto ô posto d’’o scualificato Hysaj; jucaje cu attenziona e ppricisiona levannose ‘a suddisfazzione ‘e mettere ‘a musarola apprimma a pPalladino e ddoppo a cchillu chiattone ‘e Taarab(ba)tte e gghienno cchiú ‘e ‘na vota a iabrà (crossare). ALBIOL 6 Atalossa (prestazione) tranquilla cu ppoca fatica visto ca ‘o gGenoa fove rugnoso a ll’armidanno (centrocampo), ma dê pparte soje se facette vedé poco. KOULIBALY 6 Sulo ‘na vota chillu scassacacchio ‘e Simeone ‘o riuscette a ssuperà jenno a ccunchiurere, ma senza fà danno.’Ncumpenso poco mancaje ca nun facesse chiagnere a lLamanna cu n’ illa (acrobazia) sottoporta. GHOULAM 7 Pure ‘int’ ê mumente cchiú ‘mpicciuse d’’o Napule, isso fove uno d’’e cchiú mmuttane (energici); sempe attiento all’epata (fase) difenziva, annante risultaje a mmancina ll’isaratanno (riferimento) custante p’’e cumpagne ca ‘o cercajeno spisso; sfresaje (sfiorò) ddoje vote ‘o stuco (gol) ‘na vota direttamente cu ‘nu tiro ‘e squina (corner), n’ata vota cu ‘na bbella timmurria (punizione). ZIELINSKI 7,5 Accumminciaje cu ‘o contagocce, ma po sagliette ‘e zamma (quota) addivintanno a ddritta n’isaratanno (riferimento) custante p’’e cumpagne e ccupulianno (dialogando) assaje cu gGiaccherini. ‘A perna d’’a serata soje fove ll’addaffa (rete), cu ‘nu tiro dô lemmeto, ca sbluccaje ‘o sibbacco (match) e llevaje ‘a caracca (ansia) ô Napule. DIAWARA 6,5 Ggestiunaje (gestí) a mmestiere e ccu perzunalità ‘o juoco nun perdenno maje ll’ uddú (calma) nicessario cu ttutto ca fove marcato assaje; a ll’arrancua (ripresa) jette pure vicino ll’addaffa (rete). HAMSIK 5,5 Nun m’’a sento ‘e darle ‘o seje, visto ca nun fove ‘o solito Marekiaro ‘e ‘sti tiempe e s’accuntentaje ‘e n’atalossa (prestazione) dicimmo nurmale, quase arrepusannose ‘mpruspettiva d’’o Rialmadriddo.[dô 75' ALLAN s.v.] GIACCHERINI 7 Nunn’è Peppe ‘a ‘nguenta [Callejon], ma cercaje ‘e fà ‘o ssuojo mo partenno ‘a dritta, mo spustannose p’ati ccamme (zone) d’’o campo furnenno pparicchi iabbre (cross) e ffacennose truvà lla addó Ciruzzo [Mertens] lle dette ‘a palla da menà sulo dinto signanno ‘o doje a zzero.Prumosso.[dal 74' ROG 6 Pochi minute, ma ll’abbastajeno pe ffà vedé ca ‘o ssape i ‘o vvo’ fà!] MERTENS 7 Comme v’aggiu ditto, facette ‘nu primmo ajone (tempo) [va’ a ssapé ‘o ppecché...] senza ‘a solita ajàvia (vivacità )e ccu ppoca cegna (grinta) tanto ca nun me parette isso; ‘e bbuono sulo ‘nu bbelle lanzo, nun sfruttato, pe Llorenzigno; pe ffurtuna ca a ll’arrancua accummincia a gghiucà comme sape fà, cu bbelli ghiucate tanto ca putimmo dicere ca ‘a nichemata (vittoria) fove targata Ciruzzo! [dô 78' PAVOLETTI 4 Nunn’ è bbuono nè ppe ffrijere, nè pp’arrostere; trasuto pe ffà piglià sciato a cCiruzzo,aizaje porvera dimustranno ca tene ‘e piere ‘e lignammo. ] INSIGNE 6,5 – Comme ô ssolito dimustraje d’essere agruppino ( vispo) e ddurante ô primmo ajone (tempo) fove ll’unico a ccercà ‘a porta ‘e Lamanna ca però ce mettette sempe ‘na pezza. all. SARRI 5,5 ‘A scuatra vincette, ma isso nun me piacette; sciglienno a gGiaccherini dètte ‘nu signale forte: chillo ‘e nun vulé cagnà idea e ca p’’o mumento vo’ fà jucà ‘e tre lla ‘nnante senza ‘nu vero marcazzo (punta) tenennose ancòra ‘mpanca a sant’Arcadio e fà trasí a cchillu pacco ‘e Pavoletti! ‘E bbuono ca durante ll’affasilla (intervallo) riuscette a mmettere tranquille ‘e suoje ca truvajeno ‘e tre ppunte d’oro! arbitro GIACOMELLI 4 Chille ca ‘o difenneno diceno ca arbitra comme a n’arbitro ‘ngrese tamillanno(tollerando) troppo. I’ dico ch’è scemo e nun s’è llevato ‘o vizzio nun darece ‘nu ricore comme ggià facette a pPescara austo passato; ajere ‘o ffacette futtenose d’’o sbuttulone fremmo avuto ‘a Marekiaro ca fove stiso dint’â muntaca (area di rigore) gd’’e crifune.Sulo ‘nu cecato nun ll’êsse visto. E fermammoce cca, accuntannoce ‘e chello ca succedette ajere, pure si me fósse piaciuto ‘e vencere cchiú llargo... e ddammoce appuntamento, si dDi’ vo’, pe ggioverí ca vene vota,doppo d’’a nacchèlla (trasferta) ‘nterra spagnola p’’a mubbara ‘e Ciampionsa, speranno ‘e nun turnà sciaccate! Staveti bbe’. R.Bracale Brak