SASSUOLO – NAPOLI ( 23/04/17) 2 A 2‘A VEDETTE ACCUSSÍ

 

 

SASSUOLO – NAPOLI ( 23/04/17) 2 A 2

‘A VEDETTE ACCUSSÍ

Mannaggia chello ca nun se po’ ddicere, guagliú! Tenco ‘o bbeleno nfi’ a ‘mpont’ô musso e ancòra nun ce pozzo credere ca ajere a ll’ora ‘e ll’apritivo ‘o Napule a rReggio Emilia nun riuscette  a vvencere contr’â scuatra ‘e culo’echiummo e a stiento riuscettemo a recogliere ‘nu punticciullo addó ce ne fosseno servuto tre e s’êven’’âccucchià ‘ncasanno ‘a mana subbeto senza aspettà ll’arrancua (ripresa) quanno [52’] finalmente Ciruzzo riuscette a ffà chiagnere a cConsigli e cce purtaje ‘nvantaggio.Me credette ca da chillu mumento fóssemo addivintate carrarmate e nn’êssemo fatto purpette d’’e profuche d’’o Sassuolo; ‘mmece chi t’’o ddà?  Rallentajemo, nun ce déttemo sotto e addirittura ô 59’ cu ‘nu sciarirro (scellerato) pasiglio ‘e capa a gghí arreto ‘o capitano nuosto mettette a  bBerardi ‘ncundizziona ‘e signà e agguantà ‘o russimmo (pareggio);po ce se mettette ‘a jella e ppe ddoje vote [ ‘na vota cu Ciruzzo e ppo cu Llorenzigno cugliettemo n’afachía (traversa) e ‘nu palo] piezzo e ppejo po succedette a ll’ 80’  quanno  Koulibalý cunzettette a cculo’echiumo ‘e ‘mpignà a rReina ca facette chello ca puteva rispingenno ‘a palla a ddritta addó steva appustiato ‘na maglia verde  e nnera [Ragusa],chisto cartiaje a  Hysai ca  restaje a gguardà i ‘a palla arrivaje a n’ato d’’e lloro [Mazzitelli] ca libbero e ffranco cu ‘nu càtaro (diagonale) forte ce facette chiagnere e ffovemo custrette a ccorrere appriesso ô risultato e cquanno  Sarri facette trasí a sant’Arcadio pe ffurtuna   ll’ancappajemo a ll’85’ mettennoce ‘ncopp’ô doje a ddoje ca po però  nun fovemo cchiú ccrestiane ‘e schiuvà. Tutto chesto senza cuntà ca durante ô primmo ajone(tempo)  chillu nnacchennello fuceto e cchiafeo ‘e ll’ucummo (arbitro) Damato [3,5] ca è ‘e Barletta   [ e ccomme a ppugliese  certamente   ttifuso jummerdino] ce nijaje ‘nu ricore sacrusanto ‘ncuollo a cCiruzzo. Nc’è ppoco ‘a fà, simmo nate pe suffrí e cce riuscimmo bbuono e ppure ajere nun simmo riuscite a vvattere ‘a scuatra ‘e culo’echiummo e nce refunnettemo ati dduje punte. Mannaggia chello ca nun se po’ ddicere! Passammo ê ppaggelle e vv’avviso ca, nun avenno vinciuto, aggiu levato miezu zifo (punto) a ògneduno ‘e lloro:

REINA 5,5 – Sicuro quanno ascette e ppochi cunchiusione lle detteno penziere;’ncopp’a ll’addaffa (rete) ‘e Berardi nun ce putette fà niente,êsse pututo tentà coccosa ‘e cchiú ‘ncoppa cchella ‘e Mazzitelli, ma avenno fatto appena ‘nu miezu miraculo ‘ncopp’â cunchiusione ‘e culo’echiummo, nun s’aspettava d’essere subbeto ‘mpignato e ppo Mazzitelli tiraje libbero e ffranco!

HYSAJ 5   Jurnata no p’’o meza cucchiarra ca durante ô primmo ajone (tempo) fove cundizziunato dô sole, a ll’arrancua (ripresa) se facette cartià  ‘a  Ragusa, e ssufferette si dâ parta soje ce steva Berardi.

ALBIOL 5 - Cuncentrato e attiento  sia cu Defrelle ca cu  Matri, ma paricchio  cafillo (distratto) quanno nun ascette a nchiudere ‘ncuollo a  mMazzitelli. 

Koulibaly 5  ‘A fessaria fatta a ll’80’cunzentenno a cculo’echiummo ‘e tirà, ce facette scurdà ‘a prudezza fatta durante ô primmo ajone  (primo tempo) salvanno ‘ncuollo a  dDefrelle.

STRINIC 5,5  Cumplessivamente quacche ppasso arreto a ppietto ‘e ll’urdemi asciute, ma tutto summato nun facette guaje. [Da ll’ 85'  GHOULAM sv]

ALLAN 6 –Ggià durante ô primmo ajone  se vedette ca ‘o vvuleva fà, ma nunn’avette nisciuna accasione ‘mpercussiona.   Ô 70’ Sarri cercaje coccosa ‘e cchiú i ‘o sacrificaje. [Dô 70’ ZIELINSKI 5,5  Dètte cchiú cqualità annante i ‘a manovra se ne ggiuvaje, però ‘ncopp’a ll’addaffa (rete) ‘e Mazzitelli fove paricchio  cafillo (distratto)  pur’isso.] 

JORGINHO 5,5  Partette malamente pressato comme fove ‘a ll’avverzarie;cercaje ‘e migliurà, ma cumplessivamente  facette poco.[Da ll’83’  MILIK 6,5  Finalmente sant’Arcadio ca pure ajere ce  levaje ‘e ccastagne dô ffuoco!  Doppo tanta sufferenzia, tanta ggimma (palestra), tanta panca,trasette isso e ‘ncapo ‘e duje minute ce rijalaje ‘o russimmo   (pareggio) e sfucaje strillanno comme a ‘nu demmonio: n’allucco ‘e libberazziona.Ce vuleva! N’addaffa (rete) mmeretata assaje!]  

HAMSIK 4,5  Nun se mmereta ‘e cchiú ‘o capitano ca ajere nun me piacette nun sulo  p’’a fessaria fatta, comme v’aggiu ditto, ô 59’ cu ‘nu sciarirro (scellerato) pasiglio ‘e capa a gghí arreto, ma pure pecché sottoporta nun fove maje mascullo (lucido) e vvenetteno a mmancà pure quacche bbuonu lanzo p’’e suoje. Peccato! Pe mme  Sarri, sbagliaje   facennolo  scennere ‘ncampo cu ttutto ca Marekiaro, comme se vedette,nunn’êva aclussato  (smaltito) ‘o ‘mpiccio urganico (problema fisico). Dico i’: ‘o capitano nun sta ancòra ô ciento pe cciento..., tiene ‘a belva [Rog], ch’aspiette p’’o fà jucà?      

CALLEJON 6.5  Ggià durante ô primmo ajone (nel primo tempo) se  vedette ch’êsse pututo fà male jucanno ‘ncopp’a curzia ‘e dritta, ma êttem’aspettà ll’arrancua (ripresa) pe vvederelo apprufittà ‘e ll’unica cosa bbona fatta da Marekiaro quanno ‘o mettette ‘ncundizziona  ‘e fà chell’jusaida (assist) a zzuco ‘e caramella p’’a capa ‘e Ciruzzo ca nun se facette prijà e cce purtaje ‘nvantaggio.

MERTENS[Ciruzzo] 6,5 Nun ce sta  niente ‘a fà,pure ajere se sapette rennere periculuso e ògne ppallone ch’arrivaje dê pparte soje fove ‘nu prubblema pe cculo’echiummo e ssocie.’A palla bbona ll’arrivaje, comme v’aggiu ditto, ô 52’ e ffacettemo festa e nn’êssemo fatta ‘e cchiú si ‘nu poco cchiú ttarde, sotto ll’ora ‘e juoco nun êsse pigliato, comme ‘mmece succedette, ‘o sette d’’a porta ‘e Consigli cu ‘nu spettaculare tiro ‘e timmurria (punizione). Peccato!

INSIGNE 6  Me parette ca ‘o rinnovo d’’o cuntratto [ca finalmente,  cunzente â mugliera soja  ‘e jí a ffà ‘a spesa senza fà signà  chello ca accatta] ll’êsse miso ‘o ppepe ‘nculo; ‘o frattese tenette ‘o père caudo e cce pruvaje cchiú ‘e ‘na vota senza però maje riuscí a mmetere ‘mpenziero a cConsigli; pe gghionta ‘e ruotolo ce se mettette pure ‘na jella   futtuta a nun farelo fistiggià comme succedette quanno a ll’arrancua (ripresa) se libberaje ‘e   Lirola e ttiraje ‘nu granne càtaro  (diagonale) e ccugliette ‘o palo. Che peccato!

All. SARRI 5 Quanno nun  se vence  sbaglia  pure  ‘o muntarribbo (allenatore),e ccumminfatte  coccosa ajere ‘o nuosto sbagliaje; ‘mprimmese facette jucà a mMarekiaro ca nun steva ô ciento pe cciento e ppo nun à ancòra capito ca à dda essere isso  a  ffà capí ê suoje ca soprattutto mo durante ll’urdemi mubbare (partite) ‘e campiunato ànn’’a essere cchiú ffetiente, ànn’ascí dô campo a ccurto ‘e sciato e  sputanno sanco  e ca  nun ànno ‘a  dà a nnisciuno ‘a pussibbilità ‘e farece sufferí e ccasu maje ‘ntussecarce comme mmece succedette ajere ca ‘e nuoste rijalajeno sia ‘o primmo ca ‘o siconno stuco (gol) cu ddoje fessarie!

Arb. DAMATO 3,5 E ggià v’aggiu ditto ‘e ‘stu sacchetto d’’a mmunnezza ummeta ca ce necaje ‘nu ricore sacrusanto, ne nutizziaje a cquatto d’’e nuoste, ma sparagnaje cchiú dd’uno ê jucature d’’a scuatra assineja (satellite) d’’a vecchia zoccola e ‘nchiudette ll’uocchie ‘ncopp’a ttanti fetenzie ‘e culo’echiumo e ssocie! Ma che ce putevemo aspettà ‘a ‘nu barlettano, ca comme v’aggiu ditto  ‘a chillu  pugliese  ch’è certamente è  ttifuso jummerdino e vvenette pe spezzarce ‘e passe?

E ffermammoce cca aspettanno ca pe ttutta ‘a semmana alliggerimmo ‘o bbeleno pigliato ajere, ‘nvista ‘e  dummeneca a ssera quanno jammo a gghiucà a mMilano contr’â scuatra d’’o bbiscione ca sapato à pigliato ‘na scutuliata dâ Fiorentina e sperammo ca ‘e cinise nun licenzano a pPioli e cce fanno truvà ‘nu mutarribbo (allenatore) nuovo ca nurmalmente nun perde, mmece nuje âmm’’a jí lla pe vvencere e – casu maje -  struppiarle; nun ce putimmo permettere ‘e nun farelo e accussí, si dDio vo’, ce sentimo p’’o primmo ‘e maggio  speranno, corne facenno, ca ve pozzo cuntà bboni ccose! Staveti bbe’!

R.Bracale Brak