NAPOLI – UDINESE (C.I.19/12/17) 1 A 0 ‘A VEDETTE ACCUSSÍ

NAPOLI – UDINESE (C.I.19/12/17) 1 A 0

‘A VEDETTE  ACCUSSÍ

E ppure chesta è ffatta guagliú e ce âmmu levato n’atu penziero, ‘o passaggio ‘e turno ‘ncoppa itaglia ajeressera ô san Paolo addó ‘o Napule avette raggiona ‘e ll’Udinese pure si sulo p’uno a zzero quanno,  doppo ‘a bbellezza ‘e sittanta minute passate a sbattere cu ‘a capa ‘nfacci’ô muro d’’e duje pulmmanne ca Oddo êva miso ‘nnante â muntaca (area di rigore) d’’e janche e nnire, mentre ‘o purtiere nuosto Sepe se cuntava ‘e pile e ògne ddiece lle metteva ‘na nucchetella. Certo pe vvencere nun avastajeno ‘e siconne linie d’’o rutizzio (tur-over) sustanziuso vuluto ‘a Sarri e s’êtte aspettà ca ‘o muntarribbo (allenatore) nuosto capesse ca nun se po’ ffà a mmeno ‘mparanza ‘e Lorenzigno e cCiruzzo e ‘e ffacesse trasí ‘ncampo ô posto ‘e chill’aseno ‘mmiez’ê suone chiammato Giaccherini e ‘nu Peppe ‘a ‘nguenta  spaisato a ‘nu pizzo ca nunn’era ‘o suĵo. Trasute Lorenzigno e cCiruzzo nun passajeno ca tredice minute e sse tiraje ‘o capo ‘nterra proprio cu lLorenzigno, ca piscato da ‘nu bbasurero (suggerimento) a zzuco ‘e caramella ‘e Ciruzzo, piazzaje ‘nu càtaro (diagonale)azziccoô palo luntano, futtette a Scuffett(e) i ‘a pratteca nchiudette pecché da chillu mumento a gghí ‘nnante nun succedette praticamente nient’ato. Mo âmm’’a sapé sulo cu cchi ce ll’avimm’’a vedé e sperammo ‘e jí ‘nnante pecché ll’appetito vène magnanno.  Passammo ‘e  ppaggelle:

   SEPE 6

 Cumme v’aggio anticipato pe ttutto ‘o sibbacco (macth)nunn’êtte ‘a fà manco ‘o saciccio e nnisciuno taccullo (interviento) cumplicato.

MAGGIO 6

Atalossa(prova) senza prubbleme p’’o capitano, ca facette ‘o duvere suĵo.

MAKSIMOVIC 6

A ppietto d’’o cumpagno ‘e sezziona(reparto) fove respunzabbile ‘e quacche sfregazzo (sbavatura), ma tutto summato ‘o seje s’’o mmeretaje pure pecché dê pparte soje’e janche e nnire se vedetteno poco.

KOULIBALY[‘O Gialante] 6.5

Priciso cu ‘e pasiglie(passaggi) e attiento quanno nchiudette, gestiunanno ‘a sezziona cu ttutta ‘a presenzia soja.

HYSAJ [Meza Cucchiara] 6

Guardaje ‘o bbidone suojo lla ddereto e ppochi vvote se vedette ‘nnante

ROG 6.5

‘Na vera ammanna  (sicurezza) ‘mmiez’ô campo, addó se facette apprezzà pe ccegna (grinta) e mmuvimento, ricuperanno pallune e mmettenno ‘ndifficultà a cchiú dd’uno accummincianno da Hallfredsson(ne).

JORGINHO 6

Bbona atalossa ( prestazione) soprattutto a ll’arrancua  (nel secondo tempo),quanno trasenno Ciruzzo e lLorenzigno s’arapetteno spazzie ‘e juoco e isso putette urtizzà  (verticalizzare) meglio.

ZIELINSKI 6

‘A vacante i ‘a chiena: doppo ‘nu primmo ajone (primo tempo) cumplicato, ca nun truvaje spazzie, trasenno Ciruzzo e lLorenzigno  isso putette farese vedé cchiú spisso a ll’epata (fase) uffenziva.

OUNAS 5,5

Miezu zifo (voto) mancante, pecché  cchiú ca sfresà (sfiorare) sott’â mez’ora ll’addaffa (rete) cu ‘nu tiro ca accarezzaje ‘o palo ‘e  Scuffet(te),p’’o riesto nun riuscette a ffarese nutà. Troppo poco!  (Dô 76′ ALLAN 6 Trasette a gghiuche fatte pe difennere ll’uno a zzero e ffacette ‘o ssuojo.)

CALLEJON[Peppe ‘a ‘nguenta] 5,5

 Miezu zifo (voto) mancante, pecché custretto a gghiucà ô pizzo ‘e Ciruzzo senza tené allimmeno uno ca ‘o sustenesse cercaje ‘e fà coccosa, ma sufferette cchiú d’’o nnicessario e sbagliaje ‘nu paro ‘e vote palle ‘nteressante.  [Dô 58′ MERTENS[Ciruzzo] 7  Trasette  purtanno cchiú ajàvia (vivacità) e mmuvimento lla ‘nnante; soja ‘a palla d’oro pe lLorenzigno ca mettette a ffrutto.]

GIACCHERINI 4

 Da paricchio steva menanno cauce pecché ‘o muntarribbo (l’allenatore) nun ‘o faceva jucà e prutestava, minaccianno ‘e vulersene jí. E sse ne jesse, se ne jesse cchiú ogge ca dimane! I’ nun m’’o fósse maje accattato. Ajere ca Sarri ll’accuntentaje facennolo jucà dô primmo minuto isso aizaje pórvera pe cquase n’ora e nnun cumbinaje ‘nu saciccio; bbuono facetteno ‘e cumpagne a gghiúcà ‘ncopp’a ll’ata curzia, nè me maraviglio ca Sarri se pentette e s’’o chiammaje ‘mpanca.[Dô 58′ INSIGNE 7,5  Fove nicessario ca Sarri facesse trasí a isso i a cCiruzzo, pe ccagnà passo e risolvere ‘a facenna. Cumminfatte, ‘na vota trasuto, ‘o frattese mettette ‘o ppepe ‘nculo â scuatra soja tiranno doppo pochi siconne e ‘ncapo ‘e triddice minute [ô 71’], â primma vera accasione, nun perdunaje, signaje e  nchiudettemo ‘a pratteca.]

All. SARRI 5,5

E ppe fforza ca ‘sta vota nun lle pozzo mettere ‘o seje, pe fforza! Pecché pozzo pure capí ‘o rutizzio (tur-over) sustanziuso, ma isso avesse avut’’a capí ca nun po’ ppermetterse ‘e levà ‘mparanza ggente cumme a lLorenzigno e cCiruzzo e nnun po’ custringere a pPeppe ‘a ‘nguenta a ccagnà posto spustannose a ccentro quanno nun tene a cchi ‘o sustene ‘a vicino, si no po fa ‘a bbrutta fijura d’essere custretto a ffà marcia arreto e mmannà ‘ncampo ‘e titulare p’essere levate, comme succedette, ‘e ccastagne dô ffuoco.

Arb. PASQUA 56 Facette ‘o duvere suĵo.

E ffermammoce cca. Âmmu miso n’ata preta p’’a coppa itaglia e vva bbuono accussí; ma mo però âmm’’a turnà a ppenzà ô campiunato e  ss’à dda turnà a vvencere accumincianno ggià  da dummeneca ê ttre quanno ô san Paolo scenne ‘a Sampedoria! Accussí sperammo e ssi dDi’ vo’ ve ne parlo llunnerí ca vène.

Staveti bbe’. R.Bracale Brak