SACICCE Ô ZUCO ‘E PUMMAROLE CU FFASULE CANNELLINE

SACICCE Ô  ZUCO ‘E PUMMAROLE CU FFASULE CANNELLINE

Chello ca serve pe  sseje perzone

 ‘Nu kilò e duiciento ‘e cape ‘e sacicce a pponta ‘e curtiello,cu ‘o fenucchiello,

1/2 bicchiere ‘e  vino janco asciutto,

 miezu kilò ‘e pummarole  fresche, tipo Roma o san Marzano, lavate, scuttate  e  pelate, o ‘na bbuatta (‘e miezu kilò)  ‘e pummarole  pelate;

duiciento gramme ‘e ‘nzogna,

sale fino e ppepe niro macenato a ffrisco quanto ne serve,

dduje vasette  ‘a treciento gramme ll’uno ‘e fasule cannellini arvate (lessati),

‘na cepolla ndurata ammunnata e ntretata,

‘na pastenaca grossa ammunnata e ntretata,

’na lomma (costa) d’accio ammunnata e ntretata,

‘nu gruosso túppeto (ciuffo) ‘e prutusino lavato, asciuttato e ntretato finu fino.

Prucedimento

Appruntà pe pprimma cosa  ‘o zuco ‘e pummarola  sciuglienno a fuoco  doce dinto a ‘nu gruosso rutiello ciento gramme ‘e ‘nzogna  e facennove po  piglià culore  â cepolla,  a ll’ accio e â pastenaca ntretate; auní ‘e ppummarole fresche scuttate e spellate o ‘a buatta ‘e pelate scartannone ll’acqua ‘e cunzervazzione e ffà cocere pe ‘nu quarto d’ora tenenno ‘o rutiello cummigliato;mettere ‘o ssale e ‘o ppepe macenato a ffrisco  sulo â fine ‘e cuttura; auní ‘e fasule cannelline arvate scartannone ll’acqua ‘e cunzervazzione. Fà férvere  (sobbollire) pe n’ati ddiece minute  e mantènere ‘ncaudo.Fraditanto accumplià  (sciogliere) dinto a ‘na tiella ‘e fierro niro a ffuoco allero (vivace) ll’ati cciento gramme ‘e ‘nzogna ,  e auní ‘e ccape ‘e sacicce sciacquate doppo d’averne spurtusato ‘a pellecchia cu ‘e pponte ‘e ‘na furchetta o cu n’aco saccurale,mettere tanta acqua fredda nfino a ccummiglià a ffilo ‘e ccape ‘e sacicce  e farle cocere, avascianno ‘o ffuoco, nfino a che risultano saussate  (rosolate); allora ‘nfonnerle cu ‘o   vino janco, aumentà pe ‘nu poco ‘o ffuoco e cquanno ‘o vino sarrà svapurato, taglià ‘e sacicce a rundelle aute miezu centimetro e aunirle ô zuco ‘e pummarole e ffasule a ffuoco doce pe ll’urdeme cinche minute  facenno ammiscà (amalgamare) ‘e sapure.Purziunà mettenno assaje pepe macenato a ffrisco e ‘o prutusino ntretato. Chesti sacicce ô  zuco ‘e pummarole cu fasule cannelline vanno servute caude ‘e furnello!

Vini: Curpuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria  e  servute a ttiempo  (temperatura) ‘e stanza ‘a magnà.

Mangia Napoli, bbona salute! Scialàteve e aggarbbatéve ‘o vernecale!

Raffaele Bracale