MILAN – NAPOLI (29.1.19 C.ITA) 2 A 0 ‘A VEDETTE ACCUSSÍ

MILAN – NAPOLI (29.1.19 C.ITA) 2 A 0

‘A VEDETTE ACCUSSÍ

Che ddelusiona e cche scuorno guagliú! ‘O Napule visto ajeressera, ‘ncoppa itaglia a ssan Siro contr’ê demmonie ‘e Gattuso, fove overamnte ‘o cchiú bbrutto ‘e tutt’’a caracudamma (stagione), anze – pe ddicerla accussí cumme fove  - praticamente nun ce stette proprio e cchille mise ‘ncampo dô Jancone zumpettiajeno p’’o campo senza ficre (idee)e ssenza cegna (grinta)  e dint’a nuvanta quatto minute nun foveno crestiane ‘edà ‘na carocchia, ‘nu paccaro, ‘na zingarda o ô mmacare ‘na sputazzata ‘nfaccia a ll’avverzarie e ffove naturale essere scunfitte pe ddoje a zzero e ghittate fora dô coppa itaglia cassanno n’atu rico da sott’ô sunetto d’’e speranze noste  pe ‘sta caracudamma (stagione), visto ca ‘ncopp’ô campiunato ggià da tiempo nc’êvemo miso ‘nu crucione, ‘ncopp’â coppa itaglia nce ‘o mettettemo ajeressera e mmo nun ce rummane ca ‘na sperazella tantella: chella d’’a coppa piccerella airupea..., ma cu cchello visto ajeressera è mmeglio guagliú ca nun ce dammo punie suvierchie ‘mpietto... rassignannoce a essere ancòra ‘e si’ nisciune d’’o campiunato tagliano. Me chiagne ‘o core, ma purtroppo chiste so’ ‘e fatte  e ll’’aggi’ ‘a dicere  senza pigliarese p’’o prozo! Ll’aggi’’a dicere ca dô Jancone me fósse aspettato coccosa ‘e cchiú e ca, doppo d’’o zzero a zzero ‘ncampiunato ‘e cinche juorne arreto, ‘ncoppa itaglia a ssan Siro   contr’ê demmonie ‘e Gattuso, êsse miso ‘ncampo ‘na furmazziona attrezzata pe vvencere e nno chella d’ajeressera cumpletamente sbagliata accumincianno dô purtiere ca dduje tire ‘mporta ll’arrivajeno e ffoveno ddoje addaffe (reti) senza ca isso tentasse niente. Piezzo e ppejo fove chillu ‘ntontero ‘e Maksimoviccio miso ô posto d’’o Masto addó, penzo, ca Luperto êsse fatto meglio visto ca ‘o serbo nun è proprio attrezzato pe ffà ‘o centrale i ‘o ddimustraje facennose cartià da Piatecche ca cchiú ‘e ‘na vota s’’o facette ‘nzogna e ppummarole. Jammo annanze: ‘o ‘Ncrifato, forze ancòra frasturnato d’’e vvoce ‘e mercato ca ‘o vedevano a pParigge, pur’isso nun facette manco ‘o saciccio risultanno assente ‘ngiustificato, mentre annante Lorenzigno aizava porvere e – cumme ggià lle capita da cchiú ‘e ‘na mubbara (partita) sparaje a vvrenna senza maje truvà ‘a porta,e ssenza maje dà ‘na mana a ssant’Arcadio ca pure luttanno cumme a ‘nu lione, nun riuscette a mmettere ‘mpenziero a Ddonnarumma ca ll’unica parata ll’êtt’’e ‘a fà a ll’arrancua pe ffermà ‘nu bbellu tiro ‘e Ounas(se), trasuto pe mmetterce ‘na pezza. ‘Ncunchiusione nun ce facettemo maraviglia, ‘ntribbuna divano, d’’a scunfitta,ca fove mmeretata   e ssenza muazze (scuse).

Mo êsse ‘a fà ‘e ppaggelle... ma nun ne vale ‘a pena: mecco quatto a ttutte quante senza scennere ‘int’ê particulare, e nnun me sbaglio!     

E ccu cchesto ve saluto e si dDi’ vo’ ce sentimmo dummeneca  ca vene  doppo ca sapato a ll’ra d’’e ppastarelle   ‘o Napule  ô san Paolo aspetta ‘e duriane ‘e Quagliarella  e ll’âmm’a fà vrognele vrognole pe llevarece ‘e pacchere ‘a faccia d’’o tre a zzero a gGenova e   accussí spero ca  pozzo cuntareve cose bbone. Staveti bbe’. R.Bracale Brak