FIORENTINA – NAPOLI (9.02.19) 0 A 0 ‘A VEDETTE ACCUSSÍ

FIORENTINA – NAPOLI (9.02.19) 0 A 0

‘A VEDETTE ACCUSSÍ

 Che peccato, guagliú e cche nnervatura essere custretto, doppo chillo cu ‘e demmonie ‘e Gattuso, a ccummentà n’atu russimmo (pareggio) d’’e cuane (azzurri) ca ajere ô Franchi a ll’ora d’’e ppastarelle lassajeno dduje punte taminne (preziosi) e s’ êtten’’a cuntentà ‘e ‘nu punticciullo sulo, acqua ca nun leva zabbaja (sete) e nun serve a ‘nu saciccio dàtose ca stasera ‘a vecchia zoccola ‘ncontra ‘o Sassuolo [n’ata d’’e scuatre assineje (satelliti) soja e ttène ‘e tre ppunte assicurate purtannose a ssissantatreppunte ‘ncrassifica addó nuje stammo ‘nchiummate a ccinquantadoje! E cche ce vulite fà? Che ne parlammo a ffà quanno chillo visto ajere ô Franchi contro ê profuche ‘e chella faccia ‘e cucuzza cu ‘a varva janca ‘e Pioli, fove ‘nu      Napule troppo sciupone  e cu nnove [e ddico nove!] bboni accasione avute nun foveno crestiane ‘e nne menà dinto , nun dico cinche o seje, ma allimmeno ‘nu paro! E cche saciccio! Cert’è ca  ll’itimma (colpa) fove ‘nu poco ‘e tutte quante, ‘mprimmose d’’e nassie (attaccanti), ma po  pure d’’e mastusteje (mediani)! E ggià, pecché quanno s’attacca  ‘mparanza , tutte tèneno ‘o sacrusanto  duvere ‘e cercà ‘a porta e mmacare centrarla signanno cosa ca ‘mmece ajere  nun succedette ‘nu poco p’’o covélo (catenaccio) arajauano (viola),  ma cchiú ancòra p’’a ‘mprecisione  d’’e nuoste ca da poche passe o tirajeno fora o pure ‘mbracci’ô purtiere lloro addó êssen’avut’ ‘a sfunnà ‘a rezza! E accussí mo ce truvammo a cce ammaricà (rammaricarci) p’’e punte perze, ma forze nun ce  aspettavemo ‘na  Fiorentina accussí ‘nzaluta da metterce ‘ndifficultà soprattutto ô primmo ajone  (nel primo tempo) addecattanno  (pressando) aute e nzerranno tutte ‘e llinie noste ‘e pasiglio. Quanno po..., finalmente ‘e nuoste abbiajeno a zzallabbà (palleggiare) sulo tanno truvajemo quacche  chesema (varco) jenno ‘mporta, ma senza centrarla maje... E nun me se venesse a ddicere ch’è ccumpricato jucà a Ffirenze e ca ll’urdema vota addirittura asseccajemo mazzate perdenno, pecché i’ dico ca quann’uno ave nove  [e ddico nove!] bboni accasione tene ‘o duvere ‘e menarne dinto  allimmeno ‘nu paro... nun po’ sbagliarle tutte quante!  Pirciò è inutile parlà ancòra ‘e scutetto; cu ‘sti chiare ‘e luna è ggià tanto si salvammo ‘o siconno posto!  E aggiu ditto chello ca sentevo ‘e dicere; passammo ê ppaggelle:

MERET[‘O Lungagnone] 6,5: Fove troppo ‘mpriciso cu ‘e piere puggianno  (rilanciando) a vvienetenne, ma difennette bbuono ‘a porta e ppure si ‘a Fiorentina facette  poco o niente pe mmetterlo ‘ndifficultà, durante ô ajone (nel primo tempo) cu ‘nu granne taccullo (intervento)  riuscette a ffermà n’ arturriddo (siluro) ‘e  Veretout(te) e ssalvaje ‘o natiggia (risultato)!

HYSAJ[Meza Cucchiara] 6:  Jucaje ‘na mubbara (partita)senza chizza(infamia) e ssenza madda (lode),però nun facette fessarie e ttutto summato po’ gghí bbuono accussí.

MAKSIMOVIC[‘O ‘Ntontero] 6,5: Nun saccio cumme fove, ma ajere ‘o serbo fove ‘nfr’ê meglie d’’e suoje jucanno ‘nu bbuonu sibbacco (match): dê pparte soje ‘e riffe o ‘e raffe nun passaje nisciuno e cquanno  succedette ca fove ll’urdem’ommo se dimustraje priciso e ddachicco (puntuale)’nchiudenno ‘ncuoll’a ll’avverzario ‘e turno.

KOULIBALY[‘O Ggialante] 6: ‘A solita atalossa (prestazione) ‘e sustanza fatta d’attenziona e ppricisiona, dimustranno ca sta abbianno a ttruvà cu ‘o ‘Ntontero ‘na certa ‘ntesa casa ca lle permettette d’aizà ‘na bbona aculla (diga) addó jetteno a ttuzzà ll’ arajauane (i viola).

Mario Rui s.v.Jucaje troppo poco pe ddarele ‘nu zifo (voto); sfurtunato cchiú ca che ‘ncapo ‘e quatto minute fove custretto a dd’aizà bbannera janca, lassanno ‘o campo pe bbia ‘e n’arazabbejo (infortunio)catitaole ‘ntrasatte. E ffacitelo bbenericere! [dô 4′ GHOULAM 5,5:Miezu zifo (voto) mancante pecché pure si appressuraje (spinse) assaje ‘ncopp’â curzia soja, nun ne caccaje zuco, nun riuscenno a ccrià prubbleme a ll’avverzarie ca quanno scennetteno p’’a curzia soja passajeno cchiú ‘e ‘na vota.

CALLEJON[Peppe ‘a ‘nguenta] 5,5: Miezu zifo (voto) mancante pecché pure si ajere jucaje ‘o solitu sibbacco (match) ‘e muazzinno (equilibratore),mettenno allimmeno ‘nu paro ‘e vote ê cumpagne sule ‘nnant’ â porta, quanno lle capitaje ‘a palla bbona ‘a sparacchiaje fora. E cchisto è ppeccato murtale ca nun pozzo perdunarle.

ALLAN[‘O ‘Ncrifato] 6,5:Vedettemo n’ata vota ‘o jucatore tutto cegna (grinta), corza e azzaja (impegno) ca secutaje chi fósse fósse basta ca tenesse ‘o pallone ‘nfr’ê piere; nun mullaje ‘nsi a ll’urdemu minuto e  ascette doppo esserse fatto ‘nu prozo tanto!

FABIÀN RUIZ [Anema Longa] 5,5: Me dispiace ma ll’attacca miezu zifo (voto) mancante pure a isso  pecché ajere jucanno a ccentro ô posto ‘e Marekiaro nun me piacette: nun facette ‘a mubbara (partita) ca ‘ntribbuna divano ce fossemo aspettato e ffove uaddò (macchinoso) e bbatiejo (lento) dimustranno de nunn’essere ancòra attrezzato pe ffà ll’arvasatto centrale (centrocampista centrale). ‘Nu poco meglio quanno cagnaje pusizzione pe gghí a ccunchiurere, ma sfresaje (sfiorò) sulamente ll’addaffa (rete). Troppo poco!

ZIELINSKI 5,5: Miezu zifo (voto) mancante pure a isso  pecché ajere pure jucanno ‘na bbona mubbara (partita) ‘ncopp’â curzia e accumpagnanno spisso ‘a  munauara (manovra) d’ajummo (attacco),quanno, ‘nnante a   Llafont(e) lle capitaje ‘a palla bbona, nun fove crestiano ‘e signà permettenno ô purtiere ‘e fà bbella fijura. E cche saciccio!

MERTENS [Ciruzzo] 5: Me dispiace pe Cciruzzo ma ll’attocca addirittura ‘nu zifo (voto) mancante   pecché ajere,nun saccio da che dipenne,  si vedette  poco e nniente ggiraje a bbacante e se magnaje addirittura ddoje addaffe (reti) sulo ‘nnant’ô purtiere; quanno, doppo n’ora e cchiú ‘o Jancone ‘o levaje, ‘ntribbuna divano dicettemo ‘mparanza: “Finalmente te sî ddiciso a dd’’o levà!”[Dô 62′ MILIK[Sant’Arcadio] 6: Trasette troppo tarde quanno ‘e cumpagne nun teneveno cchiú ucudda (benzina) ‘ncuorpo e nnun  riuscetteno a ddarele ‘na mana: ll’arrivaje sulo ‘na palla scamosa, troppo decentrata pe mmenarla ‘mporta; ‘nzomma facette chello ca putette!     

INSIGNE[Lorenzigno] 5 : E cche ne parlammo a ffà?! Ll’aggi’a fforza mettere ‘nu zifo (voto) mancante dàtose ca pure ajere ‘o frattese jucaje ‘na mubbara (partita) senza zuco e ssenza cunnimma e nnun riuscette maje a essere zincatejo (incisivo) e ccuncreto; avette ‘ncapo ‘e diece minute ‘e juoco n’accasiona overo grossa e nnun riuscette a   cciarcalassarla (concretizzarla). Ma va’ a ffà ‘e ppezze! ‘O Jancone ‘o levaje troppo tarde.[dô 77′ VERDI s.v.: Pur’isso jucaje troppo poco pe ddarele ‘nu zifo (voto).]

All. ANCELOTTI[‘O JANCONE] 5 Penzo ca ajere sbagliaje furmazione d’ajummo (attacco) facenno a mmeno ‘e Sant’Arcadio dô primmo minuto e ffacette troppo tarde ‘e cagne nicessarie. Accussí nun se va a nnisciuna parte!

Arb. CALVARESE 5 Grossi fetenzie nun ce ne facette, ma siscaje a bbienetebbe nchiudenno spisso ll’uocchie pe nnun vedé; ‘e cchiú ne nutizziaje (ammoní) troppe d’’e nuoste  i ‘o ffacette  appena ‘nu cuano se canzava ‘e dicere  a n’avverzario:”Che bbell’uocchie ca tiene!

E ffermammoce cca. Jette cumme jette e ddammoce n’atu pizzeco ‘ncopp’â panza, ma nun pozzo suppurtà ca quatto scieme,scurnacchiate ‘e quatto sorde, strunze cu ‘a nocca    ajere dê ccurve arajauane (viola) nun sulo ce affennetteno cu ‘o solitu: “Vesuvio, lavali col fuoco”, ma ce jastemmajeno pure a ssan Gennaro! Nunn’’o  ppozzo suppurtà pecché nisciuno fà niente pe ffà fení ‘sti scuonceche ca nun stanno nè ‘ncielo, nè ‘nterra! Fermammoce cca dànnoce appuntamento si ‘o Cielo ‘o vvo’, a vviernarí ca vène pe ccummentà ‘o sibbacco (match) d’E.L. ‘e ggioverí a ssera   cu ‘o Zurigo â casa lloro, speranno ca ‘o Ciuccio  fa cose bbone dàtose ca oramaje sulo ‘a speranzella d’’a Cuppetta aiurupea ce rummane visto ca dâ coppa itaglia simmo asciute e ‘ncopp’ô campiunato ce âmmu miso ‘nu crucione tanto! Staveti bbe’!

R.Bracale Brak