DON CICCILLE ‘NCRUVATTATE ‘E SI’ PREVETE

 DON CICCILLE ‘NCRUVATTATE ‘E SI’ PREVETE

Chello ca ce vo’ pe sseje perzone

600 gramme ‘e don ciccille ‘ncruvattate,

300 gramme ‘e ricotta rumana,

150 gramme ‘e pancetta affemmecata a varriglie  (cm. 5 pe 2 pe 1),

 ‘nu bicchiere d’uoglio dunciglio,

‘na cepolla ndurata ‘e Muntoro ammunnata e ntretata fina fina,

50 gramme ‘e pignuole passate a ttiesto caudo,

50 gramme d’uva passa  ammullata cu  acqua vullente e ppo spremmuta,

‘nu tuppeto ‘e prutusino lavato, asciuttato e ntretato finu fino,

sale duppio ‘na vrancata

sale fino e ppepe niro mmacenato a ffrisco q.n.s.

comme se fa:

Dinto a ‘na prupurziunata tiella a sponne aute ricà ll’uoglio  e a ffuoco allero fà piglià culore ô ttrigliato ‘e cepolla; agnadirve ‘e varriglie ‘e pancetta affummecata e farle suassà pe cinche minute. Àrvere teniente teniente ‘e don ciccille ‘ncruvattate dinto a ‘na caurara cu abbunnante acqua vullente salata (vrancata ‘e sale duppio) e, ‘na vota sculate, revacarle dint’â tiella ammiscannole a mmestiere pe farle ‘nzapurí a ffuoco miccio; e ssempe a ffuoco miccio agnadí ‘a ricotta dellajata cu ‘nu cuppeniello d’acqua ‘e cuttura d’ ‘a pasta; agnadirve ll’uva passa e ‘e pignuole e fora d’ ‘o ffuoco  ‘o tuppeto ‘e prutusino lavato, asciuttato e ntretato finu fino, ammiscà e ‘mpiattà cumpletanno ‘e piatte cu abbunnante pepe niro mmacenato a ffrisco.Serví súbbeto. Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria  e  servute a ttiempo  (temperatura) ‘e stanza pe magnà. Mangia Napoli, bbona salute! Scialàteve e cunzulàteve ‘o vernecale! Raffaele Bracale