NAPOLI- BRESCIA (29.9.19) 2 A 1 ‘A VEDETTE ACCUSSÍ

NAPOLI- BRESCIA (29.9.19) 2 A 1

‘A VEDETTE ACCUSSÍ

E cche saciccio guagliú! Pussibbile ca nujaute ‘ntribbuna-divano nun simmo crestiane ‘e vederece ‘na mubbara (partita) d’’o Napule senza penziere e ssenza apprenzioni (preoccupazzione)? Pussibbile ca nun riuscimmo a ttené ‘a porta acrata (inviolata) e aîmm’’a piglià allimmeno n’addaffa (rete)?  E ccumminfatte chesto nce succedette pure  ajere contr’â scuatra brisciana ca ô 97’ vattettemo pe ddoje a uno, doppo d’avé nchiuso ‘o primmo ajone (tempo) ‘ncopp’ ô doje a zzero e ce aspettavemo ca a ll’arrancua (ripresa) êssemo sbrasato. Ma chi t’’o ddà?  A ll’arrancua (ripresa) ‘mmece ‘e fà n’atu pare d’addaffe (reti) [cumme se fósse pututo fà] êttem’’a sufferí paricchio pe nun subbí ‘o russimmo (pareggio) d’’o Brescia ca cu Bbalotelli [ô 67’] appena doppo ch’era asciuto Chitelassa arazzabbiato  (infortunato)   ce ‘o mettette a ppitoffio senza ca ‘o Ntontero ‘o marcasse a mmestiere. E ssapite pecché nun signajmo cchiú? Pecché ‘o Spetaccuso mammuoccelo e bbuono  nun fove crestiano ‘e signà, Peppe ‘a ‘nguenta sciupaje tre o quatto palle bbone e Cciruzzo se magnaje ll’addaffa (rete) d’’o tre a zzero mentre Zielinski  aizava porvera e nnun cunchiureva ‘nu saciccio. E nnuje fossemo ‘a scuatra ch’êsse ‘a cumpetere cu ‘a Bbisciona i ‘a vecchia zoccola ca ‘e ‘na manera o n’ata nun sbagliano ‘nu sibbacco (match)?       Quanto ve preco, nun ce pigliammo p’’o prozo!

Nun se po’ vvedé ‘na scuatra ca juca bbunariello ‘o primmo ajone (tempo), ma po votta a ffení  n’arrancua senza ggenio e ssenza ficre (idee) [quanno ‘mmece êsse avut’’a nchiudere ‘a mubbara (partita)]! Purtroppo chisto è ‘o Napule ‘e ‘sta caracuddamma (stagione). Che ce vulite fà?

Passammo ê ppaggelle:

OSPINA[Pastacrisciuta] 6: Urdinaria amministrazziona p’’o purtiere nuosto ca pe nun lassà ‘e cumpagne ‘ndiece strignette ‘e diente doppo ‘na bbotta pigliata; sse pututo però fà coccosa ‘e cchiú, ascenno ‘ncopp’a ll’addaffa (rete) ‘e Bbalotelli.

GHOULAM 6:  Se vedette però cchiú arreto ca annante.

MANOLAS[Chitelassa] 7: ‘Mpignato a ddifenere i âttaccà fove prutacunista nun sulo d’’o stuco (gal) bbuono e dde chillo annullato dâ Varra ma pure ‘e mubbara  (partita) pricisa e ddicisa difennenno a mmestiere  nunn’ arresecanno niente e ffacennose sèntere cu ‘a cegna (grinta) soja; peccato ca êtte ascí ô 66’ pe ‘nu ‘mpiccio, me pare, â coscia [Dô 66′ LUPERTO 6: Mantenette bbuono ‘a linia d’’a trasera trasenno ô posto ‘e Chitelassa].

MAKSIMOVIC[‘O ‘Ntontero] 5,5: Miezu zifo (voto) mancante pecché sino a cche nce fove Chitelassa  rummanette cuncentrato  e nnun smarrunaje, ma asciuto ‘o cumpagno ‘e sezziona (reparto) perrdette ‘a scienza i â primma accasione Bbalotelli ‘e capa  ‘o superaje e cce futette. Ascette ô 76’ pe bbia ca ‘a bbotta pigliata cu ‘o Cagliari turnale a ffarese sèntere.[Dô 76′ HYSAJ [Meza Cucchiara]6: Facette ‘o ssuĵo.]

DI LORENZO 6,5: Bbella atalossa (prestazione) apprimma cumme udé (terzino) e ppo cumme centrale; scennette pure annante servenno palle periculose.

ZIELINSKI 5: ‘Nu zifo (voto) mancante pecché, cumme v’aggiu ditto, aizaje sulo porvera e nnun cunchiurette ‘nu saciccio senza maje rennerse   periculuso  cu ‘e tire da luntano.

 ALLAN [‘O ‘Ncrifato] 6,5: ‘Ncriscenza, difennette bbuono e ttajennaje (impostò) cu pricisione  e bboni istiglie  (verticalizzazioni) puntuali.

RUIZ[Anema Longa] 6,5: Uno d’’e meglie, appressuraje (spinse),difennette e ttiraje da luntano periculosamente dànno zzureja (velocità) â munavara (manovra).

CALLEJON[Peppe ‘a ‘nguenta] 6,5: fove ‘nteliggente, serío (veloce)e nnicesario cumme ‘nnaccasione d’’a primma addaffa (rete); peccato ca po a ll’arrancua (ripresa) mannaje ‘ncurva tre o quatto bbelli ppalle

MERTENS[Ciruzzo] 7,5: È ssemp’isso ll’ommo ‘e cchiú d’’a scuatra nostra; annante superaje ‘nzureja (in velocità) ll’avverzarie e ccu ppricisione facette cchiú ‘e ‘nu saillo (dribbling). Senza prubbleme ll’addaffa (rete) ca signaje e ppeccato ca se ne magnaje n’ata.

LLORENTE[‘O Spetaccuso] 5,5: Miezu zifo (voto) mancante pecché,si è overo ca  facette  a spallate cu ‘atrasera (difesa) d’’e rrundinelle pe ffà spazzio ê cumpagne, sotto porta, mammuoccelo cumm’è, nun fove crestiano ‘e signà sciupanno quacche ppalla.[Dô 73′ ELMAS[‘O Turco] 6: Ce mettette ggenio e ccegna (grinta) senza sparagnarse maje e mminaccianno ‘a trasera  (retroguardia) d’’e rrundinelle.

All. ANCELOTTI [‘O Jancone] 6 Pe ‘e tre ppunte mise dint’â sacca, ma ll’arrancua (ripresa) d’’a scuatra nun piacette a nnisciuno.

Arb.:  MANGANIELLO 5 ‘Sta meza cazetta piamentese fove acatuso (fiscale) i attiento  sulo quanno parette a isso, ma spisso nun vedette quacche ccarí (fallo) d’’e rrundinelle e nnicessitaje d’ ‘a Varra ca lle cunzola ‘a zia moneca p’annullà n’addaffa (rete) pe pparta.

E fermammoce cca, tutto summato si nun cuntente, allimmeno   suddisfatte  ‘e cumme jette e soprattutto d’avé mantenuto ‘o passo d’’a vecchia zoccola e Bbisciona;  mo se torna  a gghiucà p’’a Ciampionsa   miercurí   ca vene e ‘mmerz’ê ssette se va a gghiucà cu ‘o Ggenk(che) e i  spero ca, si ‘o Cielo ‘o vvo’ ggioverí ve pozzo   cuntà ca si   ‘o Napule nunn’ à arfuzzato (vinto) n’ata vota allimmeno nunn’ à abbuscato sempe cu ‘abbona ‘razzia  d’‘a chenca ‘e ll’arbitre! Staveti bbe’.

R.Bracale Brak