NAPOLI – TORINO (29.2.20) 2 A 1 ‘A VEDETTE ACCUSSÍ

NAPOLI – TORINO (29.2.20) 2 A 1

‘A VEDETTE ACCUSSÍ

Cu n’addaffa (rete) p’ajone  (per tempo) ‘a primma firmata Chitelassa ô 19’i ‘a siconna a ll’82’ a ffirma ‘e  Di Lorenzo ‘o Ciuccio ‘nzertaje ‘a quinta arnassa  (vittoria) dinto a ll’urdemi sseje asciute ‘e ‘stu campiunato stracce e ppetacce mettenno sotto ‘o  Torino pe ddoje a uno. Servette sulo a mmetterce ‘nnapprenziona  ‘o stuco  (gol) d’Edera, lassato troppo sulo ô 91’. ‘Nzomma s’affuzzaje (si vinse) e pputimmo dicere ca  sí,sí guagliú, ll’arraja (cura) ‘e Gattuso sta arammellanno   (funzionando) e ajeressera ô san Paolo ‘o Ciuccio se mettette n’ati tre ppunte dint’â sacca saitarranno (dominando) cchiú ‘e chello ca dicette ‘o natiggio (risultato) ca fove assaje busciardo; cumminfatte ‘o Ciuccio êsse pututo sbrasà si ‘e nuoste fosseno state cchiú ppricise sottoporta e c’êsseno miso cchiú ccazzimma e asciarra (cattiveria) e asasa (soprattutto si quacche ghiucatore ddoje o tre vvote  fósse stato meno cazzumio (egoista) sparacchianno fora e avesse dato palla a Ssant’Arcadio meglio piazzato e ppronto a ssignà. Sinamparco (comunque) ce pigliajemo ‘e tre ppunte  piazzannoce, p’’o mumento, ô sesto posto ‘ncrassifica cosa ca   vale’nu posto dint’â cuppetta airupea, cattajo (traguardo) ca ‘o Napule ‘e  Gattuso s’ammereta cumme aradaranno  (minimo)!

Passammo ê ppaggelle:

 OSPINA[Pastacrisciuta] 6 Quase nun s’êtt’’a spurcà ‘e guante pure quanno dint’ê primme cinche muinute ‘o Toro attaccaje a ccapa sotto; cumplessivamente fove chiammato a ffermà ‘nu paro d’armunadère (spioventi) aute, ma nun periculuse. Forze êsse pututo ascí ô 91’ ‘ncopp’ô jabbro (cross) p’ Edera, lassato sulo da  matusteje (mediani) e udí (terzini), ma ‘o perdono.

 DI LORENZO 7 Cumplimente pe ccomme s’ addajaje (si inserí a ll’82’ signanno ll’addaffa (rete) ca cedette ‘e tre ppunte. Arreto nun s’êtt’’a dannà pe ffermà a Ansaldi ca dê pparte soje se facette vedé sulo ‘int’ô niajo (nel finale).

 MANOLAS[Chitelassa] 7  Granna atalossa (prestazione) arreto cumannanno ‘a trasera (difesa) e twenenno d’uocchio mo a Bbelotti  mo a  Zzaza can un foveno maje, proprio maje ‘nu prubblema. Ce mettette ‘a jonta jenno a ssignà ‘e capa ‘o stuco (gol) ‘e ll’uno a zzero cosa ca ‘o facette essere ommo-sibbacco (match).

 MAKSIMOVIC[’O ‘Ntontero] 6,5 Ajere jucaje a mmestiere  ‘na mubbara (partita) atti stuppanno a enta,senza nisciunu sfregazzo (sbavatura).’Nchietta cu Chitelassa mettette ‘a musarola a   Bbelotti  i a  Zzaza.

 HYSAJ[Mezacucchiara] 6 mubbara (partita) attienta stuppanno a Dde Silvestri, ca nun facette danne; nunn’êsse avut’’a lassà sulo a Edera ô 91’. Pacienza.

 RUIZ[Anemalonga] 6  Nce ‘o mecco pure si nun fove lammajo (brillante) cumme era stato cu ‘o  Barcellona e ffove isso a ss’addurmí ‘nnaccasione ‘e ll’addaffa (rete) d’Edera.

 LOBOTKA 6,5  Priciso e ssistimato facette ‘nu sibbacco  (match) ‘e bbona perzunalità  facennose apprezzà mo palliggianno, mo facenno aculla (diga) ‘mmiez’ô campo; se chiammajell’applavuso cu ‘na lifavva (serpentina) ca quase ‘o purtaje a ssignà.  [Dô 79’ ALLAN – sv.]

ZIELINSKI 6,5  Atalossa (prestazione) attienta e ardaccailla (duttile) mustrannose taminno  (prezioso) ‘int’ê ddoje epate (fasi).

 POLITANO 5,5 Ancora fora da ‘e muvimente d’’a scuatra se vedette poco e ffacette cchiú ppoco risultanno ‘a nota stunata d’’a serata. À dda crescere i ‘o pputesse fa!. [Da ll 83’  ELMAS [‘O Turco] sv.]

 MILIK[Sant’Arcadio] 6  Carimmo (generoso) cumme a ppoco jucaje p’’a scuatra cu ttanti sponne e mmuvennose pe ffà spazzio;sotto porta lle fósse attuccato ‘nu ricore a ffavore, ma ll’ucummo (arbitro) nchiudette ll’uocchie; avette pochi ppalle ‘a jucà e ddoje o tre vvote ‘e cumpagne nun ‘o vedetteno e nnun lle passajeno palla. Peccato. [Dô 74’ MERTENS[Ciruzzo] 6,5  Trasette e ffove dicisivo cu cchella palla tagliata ca Di Lorenzo mettette a ffrutto!

 INSIGNE[Lorenzigno] 6  Nun lle pozzo mettere ‘e cchiú pecché pure si fove assaje prisente  fove pure assaje ‘mpriciso e ffacette poco a ppietto ‘e chello ca po’ ffà; ‘e cchiú se magnaje n’addaffa (rete) quanno Ansaldi lle rijalaje ‘na palla d’oro.

all.  GATTUSO 7 Finalmente ‘a scuatra ‘a vedettemo ‘nsaluta i ‘e natigge (risultati) nun mancano ; p’’a primma vota dint’a cchistu campiunato ‘o Ciuccio ‘nfilaje tre arnasse (vittorie) cunzecutive.  Fósse venuto primma ‘stu sargente ‘e fierro forze ‘o Napule stesse cchiú ‘nnante.

arb. MARIANI 5 Nun vulette vedé quanno N’koulou se carriaje ‘nterra a Ssant’Arcadio ‘nnante ‘a porta cranata e nnun ce dette ‘nu ricore sacrusanto e pp’’o riesto fove troppo ‘e maneca larga cu ‘e tante delincuente ‘e Longo [cumme a Rrincon(ne), scola vecchia zoccola]ca traseveno a ffà male e nnun ne cacciaje a nnisciuno!

E bbasta accussí. Mo p’’o campiunato se ne parla dummeneca otto marzo quanno  jammo a Verona contr’ê lucale pariente ‘e chella zoccola ‘e Giulietta, però primma ggioverí ca vène tenimmo n’appuntamento ‘mpurtante, chillo ô san Paolo cu ‘a Bbisciona, p’’a sfarnaja (semifinale) ‘e coppa itaglia e ssi ‘o Cielo ‘o vvo’ ve ne parlo viernarí ca trase speranno ‘ca pozzo cuntareve bboni ccose.

Staveti bbe’ Raffaele Bracale Brak