QUANNO TANT’ANNE FA

QUANNO TANT’ANNE FA

Quanno tant’anne fa ero guaglione e fino a cquanno me campaje mammà,  nun ce fove  ricurrenza ‘e nascita o pure ‘e nomme ca nun fosse scetato dall’addore d’ ‘a ciucculata ca dâ cucina se spanneva pe tutt’ ‘a casa  e se veneva a ‘mpezzarse nsi’ a ssott’ ê llenzole dànnome ‘o bongiorno e ll’augurio… Era tanta ‘a frennesia ca me pigliava ca scavezo e bbuono currevo   dint’ â cucina  pe ffareme nuovo nuovo cu ‘na ciotola ‘e chella ciucculata c’addurava ‘e cannella, ‘e garofano e dde Strega comme fosse stato ‘nu vero sanguinaccio… Era sulo ciucculata allungata cu ‘o llatte, ma teneva n’addore e ‘nu sapore ca nn’aggiu ‘ntiso e assapurato cchiú, comme nun aggiu assapurato cchiú chilli biscotte sciampagnine cruccante, frische  e ssapurite assaje ca i’ me spugnavo a dduje pe vvota dinto a cchella ciucculata addurosa e m’arrecriavo ‘a vita mia scialuso e suddisfatto…

Mo se nn’è pperzo ll’uso! Mammà nun ce sta cchiú,nun songo cchiú guaglione,  è arrivato ‘o diabbete e ati mmalatie  e m’ànno tagliato ‘e vivere: mo, quanno è ‘o juorno d’ ‘a nascita  o d’ ‘o nomme,si me va bbuono!…, m’aggi’ ‘a arrangià cu ‘nu cafè luongo  e fforze ‘nu curnettino senza crema o marmellata…. Ato ca sciampagnine e ciucculata!

E se nn’è gghiuto a ffarse benericere n’atu piezzo d’ ‘a vita mia…

E  âmmo cassato n’atu rigo ‘a sott’ ô sunetto; e chijammencella a llibbretta! Chesta è ‘a vita! Cu chi t’ ‘a piglie?

Che ce vuó fà?

Raffaele Bracale