NAPOLI - JUVENTUS (C.I.finale17.6.20) 4 A 2 [d.r.] ‘A VEDETTE ACCUSSÍ

NAPOLI - JUVENTUS (C.I.finale17.6.20) 4 A 2 [d.r.]

‘A VEDETTE ACCUSSÍ

Biancale, fuja-fuje, trezziole e bbotte a mmuro, guagliú ! ‘O Napule ajeressera jette a ll’Ulimpico ‘e Roma contr’â vecchia zoccola, ‘a vattette  e sse purtaje â casa ‘a Coppa Itaglia ddoppo ‘na mubbara (partita) ca tutto summato dicette poco, asasa (soprattutto) rejenno ‘o primmo ajone (durante il  primo tempo) assulutamente muazzinno (equilibrato),addó ca ll’arrancua (ripresa) fove  quase tutta d’’o Ciuccio ca però nun riuscette a ttirà ‘o capo ‘nterra cumm’êsse pututo fà si ‘e nuoste fósseno state cchiú ppricise, tanto è vvero Vero ca ‘e nuvantatré   minute se nchiudetteno ‘ncopp’ô zzero a zzro e ppo, cumme vo’ ‘o reculamento nuovo s’êtte ‘a passà súbbeto ‘e ricure ‘e ffove tanno ca venette fora preputente ‘o gulío d’’a scuatra cuana (azzurra) d’affuzzà (vincere) assulutamente rijalanno ‘a Coppa a Rtinghio, â Città i a ttutte chille ca cumme a nnujaute ‘ntribbuna divano teneno ‘a vecchia zoccola ‘ncopp’ô vernecale. E cce riuscetteno ggià cu ‘o Lungagnone ca facette ‘o ssuojo fermanno ‘o primmo tentativo jummerdino chillo ‘e Dybala   ca ca pe pprimmo s’appresentaje ‘ncopp’a ll’armanno (dischetto). Piezzo e ppejo ‘o siconno tentivo jummerdino, chillo ‘e Danilo ca cumm’i’ prunusticaje mannaje ‘a palla ‘ncopp’â ll’afachía (traverza); ‘e nuoste ‘mmece nun ne sbagliaveno nisciuno da Lorenzigno a Ppolitano, dô ntontero a Ssant’Arcadio   ca cu ‘na pricisa, forte e ssistimata botta mancina ce purtaje ‘ncopp’ô quatto a ddoje nchiudenno ‘o sibbacco (match) e ccunzignannoce ‘a Coppa vuluta e ccertamente mmeretata.Passammo ‘e ppaggelle:

MERET[‘O Lungagnone] 7,5  N’asciuta ‘ncopp’ê piere ‘e Ronaldo levannolo ‘a palla e pp’ ‘o rispunnette sempre presente ‘ncopp’a cquacche ttelelefunata da luntano, ma asasa spettaculare cu cchella parata ca fermanno ‘o tentativo ‘e Dybala da ll’unnece metre mettette súbbeto ‘nchiaro ‘e ccose cumme steveno e ccumme fósse juta a ffení; pure Pastacrisciuta lle sbattette ‘e mmane! 

DI LORENZO 6  Attiento i accuncio s’accuntentaje ‘e fà ‘o ssuĵo restanno arreto senza scennere annante pe mmettere ‘a musarola a Ddaglas(se)Costa  o a Rronaldo ca ògne ttanto accumpareva ‘ncopp’â curzia.

MAKSIMOVIC[‘O ‘Ntontero] 7 – Pure ajeressera ce piacette pe ccumme nchiudette asasa (soprattutto) ‘e capa e ppure quanno facette repartí ll’azziona da reto nun facette scicchezze.’E cchiú cu ‘na chiantella ca: scànzate!, signaje ‘o ricore ca ll’attuccaje.

KOULIBALY[‘O Ggialante] 6,5 S’’o mmereta pure si durante ô primmo ajone (nel primo tempo) facette ‘nu paro ‘e fessarie palla ô pere, ma ‘ncupertura nun facette sfregazze  (sbavature).

MARIO RUI 6  Pur’ isso cumme a Ddi Lorenzo nun scennette ‘nnante pe mmettere ‘a musarola a  Ccuadrado  o a cchi capitasse ‘ncopp’â curziamancina e cuncentrato cumme fove arreto nun sbagliaje niente.  [Da ll’80’ HYSAJ[Mezacucchiara] sv]

Fabian Ruiz[Anemalonga] 5,5  Miezu zifo (voto) mancante pecché sí fove ô ssolito cumpassato e ‘nteliggente, currenno a ccapa sotta, ma êsse avuto ‘a cercà ‘a porta e nnun ‘o ffacette asasa (soprattutto) durante ô primmo ajone (nel primo tempo)quanno cu ‘o parlànfaccia a ddispusizzione se ntalliaje e pperdette ‘o mumento prupizzio. [Da ll’80’ ALLAN[’O Ncrifato] sv.]

DEMME 6,5  Miezu zifo (voto) mancante pecché sí fove funnamentale a ccentro d’’o campo  nun sulo facenno ‘a fatica cchiú sporca,ma pure rumpenno ‘o juoco, e facenno girà ‘a palla sempe ‘e primma , quanno avette ‘na bbona accasione ‘e signà fove sulo periculuso, e ccunzignaje  palla ô vicchiaccone jummerdino.

Zielinski 5,5  Miezu zifo (voto) mancante pecché, cumme ggià se vedette cu ‘a Bbisciona, pure ajeressera nun stette ‘ncundizziona e sse vedette poco e nniente a ll’epata uffenziva  (nella fase offensiva). [Da ll’88’  ELMAS[‘O Turco] 5 ‘Nu zifo (voto) mancante pecché nun pozzo perdunarle chell’accasiona avuta appena trasuto: cu tutt’’a porta a ddispusizzione,cugliette ‘o palo! Nunn’è ppussibbile! ]

CALLEJON [Peppe ‘a ‘nguenta] 5,5 Pure a isso miezu zifo (voto) mancante pecché  durant’ô primmo ajone  (nel primo tempo) facette quacche fessaria ‘e troppo abbianno ll’azziona, quase cumme si stesse jucanno cu ‘e stentine ‘mmano; è ‘nu poco ‘e tiempo ca nunn’è isso.Peccato. [Dô 66′ POLITANO 6,5  Trasette e mme partette cchiú agruppino  pimpante ‘e Peppe ‘a ‘nguenta; avette ‘nu paro d’accasione e avesse pututo fa ‘e cchiú però ‘o ssuĵo, tutto summato ‘o ffacette cumpreso ‘o ricore ca ‘o vicchiaccone nun riuscette a ffermà.]

MERTENS[Ciruzzo] 5,5 Me dispiace metterle miezu zifo (voto) mancante, ma ll’aggi’’a fa datose ca Ciruzzo êtt’’a stregnere ‘e diente pe starece e ffistiggià ‘o rinnovo ‘e cuntratto, però fenette nchiuso  ‘nfra De Lait(te) e Bbonucci can un lle facetteno quase vedé palla. [Dô 66′ MILIK[Sant’Arcadio] 6 Nce ‘o mecco ‘e stima e pp’’o ricore d’’o quatto a ddoje ca nce cunzignaje ‘a coppa, però lle tiro ‘na recchia pecché nun sfruttaje ô 76’ ‘na palla d’oro avuta ô lemmeto d’’a muntaca (area di rigore) jummerdina, palla ca isso nun fravecaje ‘morta, ma mannaje ‘ncopp’â loggia d’’o palazzo ‘e rimpetto. Che peccato.]  

INSIGNE[Lorenzigno] 6 Nun facette cape d’angelo, ma cugliette ‘nu palo cu ‘nu bbuonu tiro ‘e timmurria (punizione) sulo ‘nu poco largo. Êsse pututo cagnà ‘a mubbara (partita); pacienza!  Ce piacette però cumme tiraje  ‘o ricore!

all: GATTUSO 7,5 Vulette affuzzà (vincere) e cce riuscette  mannanno ‘ncampo ‘na scuatra assaje cuncentrata ca apprimma resistette a ll’uffenziva jummerdina e ppo tentaje quacche surtita i a ccunte fatte ll’accasione cchiú ppericulose foveno chelle ch’avette ‘o Ciuccio.Po arrivajeno ‘e ricure cu cchello ch’isso vuleva. Cunchiusione? Sesta Coppa Itaglia vinciuta dô Napule! Biancale, fuja-fuje, trezziole e bbotte a mmuro, guagliú !

Arb. DOVERI 6 Facette ‘o duvere suĵo.

E bbasta accussí. Ve saluto e si ‘o Cielo ‘o vvo’ ce sentimmo mo cumme a mmo nun saccio quanno: aggiu perzo ‘o cunto. Staveti bbe’ .

R.Bracale Brak