‘NZALATA ‘E MARE

‘NZALATA ‘E MARE

Chello ca serve pe 12 perzone:
Dduje purpe ‘e ‘nu chilò ll’uno,

 ‘Nu chilò ‘e calamare,

‘Nu chilò ‘e jammarielle frische ‘sgarpate (sgusciati),

‘Nu kilò ‘e cozzeche ‘e Taranto,

Miezu kilò ‘e vongole verace(cu ddoje corne),

2 spicule  d’aglio vestute e scamazzate,

‘o  zuco passato  cu ‘nu culaturo ‘e gasa (un colino di garza)  ‘e duje limune ‘e Surriento,

‘Nu  bicchiere e mmiezo  d’uoglio ‘auliva dunciglio  (extra vergine p.s. a f.),

sale duppio cunnito  (alle erbette) e ppepe janco q. n. s.,

‘Na cemmetella (rametto) abbunnante  ‘e peperna ntretata ‘nzieme a ‘nu spiculo d’aglio ammunnato,

 Ddoje tazzulelle ‘e acito janco.

Comme se fa

Pulezzà e àrvere apprimma   ‘e  purpe e ppo  ‘e calamare  dinto a  abbunnante acqua salata. Pe cocere ‘o purpo tenite presente ca ce vo’ ‘o dduppio d’ ‘o tiempo nicessario p’àrvere ‘e calamare.

 A pparte àrvere dinto a  abbunnante acqua salata (addizziunata ‘e ‘na tazzulella ‘e acito janco)  ‘e jammarielle ‘scarpate.   Mettere dinto a ‘na prupuziunata cummerità pruvvista ‘e cupierchio miezu bicchiere d’uoglio e  ‘e duje aglie vestute e scamazzate e agnadirve ‘e cozzeche ( lavate e  scupettiate a ffunno   p’ eliminà  bisso e ‘ncrustazzione) ‘nzieme  ê vvongole  lavate; ‘ncuperchià  e tenerle a fuoco miccio nfi’  a cche cozzeche e vongole nun se so’ tutte arapute.  Levà ‘a cummedità dô ffuoco e piglià ‘e frutte scartanno ‘e scorze e sistimà ‘e frutte  dinto a ‘na ciotola cuperte dô jusso (il liquido) ca  cozzeche e vvongole  arapennose ànno libberato (rilasciato);naturalmente chistu jusso s’ à dda passà  cu ‘nu culaturo ‘e gasa (un colino di garza) pe trattènere quacche fetenzia  (impurità).

Appena ‘o purpo e ‘e  calamari so’ ccuotte,vanno sculate e ppo  se taglia ‘o  purpo a pezzulle(tre cm.) e ‘e calamari a  anellucce.A chistu punto se piglia ‘na grossa zuppiera e s’ammescano purpe, calamare, cozzeche, vongole e ghiammarielle cunnenno tutto cosa cu ‘na sarzulella fatta   sbattenno dinto a  ‘na ciotola, cu ‘na furchetta  ll’uoglio rummaso, ‘o zuco passato  d’ ‘e limune, ‘na presa ‘e  sale duppio cunnito (alle erbette), ‘o  ppepe janco  macenato a ffrisco, ‘na tazzulella  d’acito  e agnadenno ‘o jusso libberato ‘a cozzeche e vvongole e ppassato  cu ‘nu culaturo ‘e gasa. Spruzzà  riccamente (abbondantemente) cu ‘o ttrigliato  (trito) d’ aglio e peperna . Serví ‘ntavula, come trasetura doppo  d’ avé tenuto pe n’ora ‘a zuppiera  dint’â jacciaja.

Brak