NAPOLI-ROMA (5.7.20) 2 A 1 ‘A VEDETTE ACCUSSÍ

NAPOLI-ROMA (5.7.20) 2 A 1

‘A VEDETTE ACCUSSÍ

Tutto a pposto guagliú, tutto a pposto! Ajere a nnotte ô san Paolo ‘o Napule, chiejanno ‘a Roma ‘e Fonseca pe ddoje a uno, se mettette dint’â sacca tre ppunte pesante assaje, tre ppunte ca cunzentono ô Ciuccio d’angappà ô quinto posto ‘ncrassifica proprio ‘e rumanise, quinto posto ca mo cumme a mmo è quanto ‘e meglio se po’ ffà e ssi vve dico ca âmm’’a dicere grazzie a Ggattuso nun me sto’ muzzecanno ‘a lengua; oramaje cu Rringo , ‘o Napule cuncede assaje poco a ll’epata difenziva  (in fase difensiva)squatranno (schierando) ‘na mediana cchiú vascia pe nnun furní spazzio ê nassie (attaccanti) avverzarie, ma senza fa a mmeno ‘e zzallabbà (palleggiare) e ccupulià (dialogare) cu ‘e tre lla nnante. E ttutto chesto vedettemo ajere a nnotte i ‘o Napule affuzzaje (vinse) smarrunanno suo ‘na vota ô 60’ quanno ‘e tre d’a mediana ‘mmece ‘e fà aculla (diga) ‘nnante a  Mkhitaryan(ne) s’allargajeno i ‘o lassajeno libbero ‘e tirà e dde farece male, russimanno (pareggiando ll’addaffa (la rete)ca ô 55’ êva signato Peppe ‘a ‘nguenta. Menu male ca po ce penzaje Lorenzigno a ll’82’ a mmettere ‘e ccose a pposto, truvanno ‘a porta cu ‘nu granne tiro a ggiro, cosa ca nun faceva ‘a paricchio. Passammo ê ppaggelle:

MERET[‘O Lungagnone] 6- Ll’attocca ‘o meno pecché êsse pututo fà coccosa ‘e cchiú ‘ncopp’a ll’uno a uno rumaniso; p’’o riesto  nunn’êtte ‘a fa ‘o straurdinario.

 DI LORENZO 6,5  Bbona atalossa (prova ‘e ll’udí (terzino) ‘e dritta ca se facette truvà sempe libbero p’accumpagnà ll’azziona e ppure arreto difennette a mmestiere.

 MANOLAS[Chitelassa]] 6,5 Sibbacco (match) assaje pusitivo p’’o greco ca se facette truvà sempe pronto ‘e capacullabburanno cu ‘o Ggialante. Ascette sulo quanno, doppo cchiú ‘e n’ora Gattuso s’’o chiammaje ‘mpanca pe ffarelo risciatà. [Dô 63' MAKSIMOVIC[‘O ‘Ntontero] 6 Mez'ora senza fessarie. Si mettette a ccentro  e ffacette ‘o ssuĵo.]

 KOULIBALY[‘O Ggialante] 6,5 ‘Nu cummò cu ‘o specchio  zubbo(solido) e cuncentrato. Mettette ‘a musarola a  Dzeko e gghiucaje spisso ‘e tacatammo  (d'anticipo).

MARIO RUI 7  Ajere ‘ntribbuna-divano piacette a ttutte furnemnno una d’’emmeglio atalosse (prove)d’’a caracuddamma (stagione); mpurraje (spinse) paricchio e ffirmaje ‘nu bbellu jabbro (cross) pe Ssant’Arcadio e cchillu missiddo (assist) a zzuco ‘e caramella pe Peppe ‘a ‘nguenta. ‘E cchiú, poco mancaje ca nun signasse. Ch’ato se po’ vvulé?

FABIAN RUIZ[Anemalonga] 6- Me dispiace, ll’attocca ‘o meno pecché partette bbuono ‘nzertannose e cupulianno cu Ssant’Arcadio, ma po avette ‘nu paro d’accasione bbone i ‘e sprecaje. Senza scurdarce ca pur’isso ô 60’ lassaje campo libbero a Mkhitaryan(ne) allargannose. [Da ll’ 86' ELMAS[‘O Turco] 6 ‘e stima]

DEMME 6 Miezu zifo (voto) mancante pecché lassaje strata libbera a Mkhitaryan(ne), ma p’’o riesto atalossa (prova) ‘e spessore luttanno e cumbattenno.[Dô 70' LOBOTKA 6  Trasette e ppe vinte minute tiraje fora ‘e ccianfe (artigli).]

ZIELINSKI 6 Miezu zifo (voto) mancante pure a isso pecché pe ffaticà, faticaje, ma fove poco cuncreto sciupanno ‘nu paro d’accasione.

CALLEJON[Peppe ‘a ‘nguenta] 6,5 Atalossa (prestazione) a ddoje facce: durante ô primmo ajone quanno  nun fove  né llammajo (brillante)nè mascullo (lucido) ô mumento ‘e tirà perdenno spisso tiempo.Meglio a ll’arrancua (ripresa)quanno trasette ‘ntenziunato a ffà ‘e cchiú e ccunfatte signaje, sbluccanno ‘a facenna.Peccato ca po nun sfruttaje ‘na palla rispinta da ll’afachia coveta da Sant’Arcadio. [Dô 70' LOZANO 6  Trasette pruvanno a sfruttà ‘a zzureja soja, ma nun avette nisciuna accasione.]

 MILIK [Sant’Arcadio 6+ Tantu muvimento,n’afachia coveta cu ‘na granna cabbesera (colpo di testa)e bbuonu cupulià (dialogare) cu Anemalonga.[Dô 63' MERTENS[Ciruzzo] 6 – Trasette e sse mettette a ddispusizziona d’’a scuatra; jette vicino a ssignà ddoje vote.Po’ ffà ‘e cchiú, ma cuntentammoce.]

Lorenzo INSIGNE[Lorenzigno] 7,5 Meglio d’ati vvote; ajere se dètte da fa currenno, cupulianno (dialogando ) e jabbranno (crossando) e ffinalmente! Centraje ‘a porta cu ‘nu ‘nduvinato tiro a ggiro ca ce facette affuzzà (vincere) ‘Assa fa ô Cielo! 

all.  GATTUSO 7 ‘A scuatra soja truvaje zurea (ritmo) e asasa (soprattutto) saluta ‘e cerevelle, jucanno bbuono divertenno e affuzzanno (vincendo). Scusate si è ppoco.

Arb. ROCCHI 6 M’aspettavo ‘e peggio, ma fetenzie nun ce ne facette.

E fermammoce cca. Mo miercurí se va sott’â lantera contr’ê crifune lucale e ssi ‘o Cielo ‘o vvo’ ve ne parlo ggioverí ca vene. Staveti bbe’. R.Bracale Brak