LARDIATA SAFRUNATA

 

LARDIATA  SAFRUNATA

 

Chello ca ce vo’ pe sseje perzone

600 gramme ‘e mezzanelle murcellate a ppiezze ‘e quatto centimetre ,

 ‘na cepolla ndurata ‘e Muntoro ammunnata e ntretata,

250 gramme ‘e lardiciello a varriglie ‘e cm. 5 pe 2 pe 1,

2 bustine ‘e safrone,

‘Nu bicchiere d’ uoglio ‘auliva dunciglio,

100 gramme ‘e caso pecurino rattato finu fino,

‘nu tuppeto ‘e prutusino lavato, asciuttato e ntretato finu fino,

sale duppio ‘na vrancata,

 sale fino e pepe janco macenato a ffrisco q.n.s.

 

Comme se fa

 

Ricà ll’uoglio dinto a ‘na prupurziunata tiella e a ffuco allero fà piglià culore ô ttrigliato ‘e cepolla; a ‘stu punto agnadí ‘e vvarriglie ‘e lardiciello e ssempe  a ffuoco allero farle  accumplià pe cinche minute e accuncià ‘e sale e ppepe; fraditanto arvere teniente teniente ‘e mmezzanelle dinto a ‘na caurara cu otto litre d’acqua vullente salata (vrancata ‘e sale duppio). Scularle e revacarle dint’ â tiella agnadenno ‘e ddoje bustine ‘e safrone accumpliate cu ‘nu poco d’acqua ‘e cuttura d’ ‘a pasta  e tenercele pe quatto mminute sempe a  ffuoco allero, ammiscanno e  derrammanno cu ‘o ccaso pecurino,e cu  ‘o ppepe janco macenato a ffrisco; fora d’ ‘o ffuoco derrammà   cu ‘o tuppeto ‘e prutusino lavato, asciuttato e ntretato finu fino;  ammiscà ancòra e ‘mpiattà. Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule,  bbona salute! Scialàteve e cunzulàteve ‘o vernecale!! Raffaele Bracale